“រក្សាចាស់បង្កើនថ្មី!” ប្រសាសន៍ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន បានលើកឡើងក្នុងពិធីពិសាអាហារសាមគ្គីមហាគ្រួសារនៃក្រសួងព័ត៌មាន

ភ្នំពេញ៖ ឯកឧត្តម នេត ភក្ត្រា រដ្ឋមន្ត្រីក្រសួងព័ត៌មាន បានលើកពីចំណុចសំខាន់ក្នុងពិធីពិសាអាហារសាមគ្គីមហាគ្រួសារនៃក្រសួងព័ត៌មាន ៖ រក្សាចាស់បង្កើនថ្មី!។
“កាសែតកម្ពុជាបានចេញផ្សាយឆ្នាំទី១ លេខទី១ របស់ខ្លួននៅថ្ងៃទី២៥ ខែមករា ឆ្នាំ១៩៧៩ ដែលរហូតមកដល់ពេលនេះមានអាយុគម្រប់ ៤៦ ឆ្នាំ! កាសែតកម្ពុជាបានដើរតួនាទីយ៉ាងសំខាន់ក្នុងនាមជាឃោសនិក និងជាអ្នកនាំសារជូនដល់ប្រជាពលរដ្ឋនិងជាឧបករណ៍គ្រប់គ្រងការងារសតិអារម្មណ៍របស់រដ្ឋយ៉ាងសំខាន់នៅទសវត្សរ៍ឆ្នាំ ១៩៨០ និងតរៀងមក។ កាសែតនេះបានអាក់ខានក្នុងការបោះពុម្ពផ្សាយមួយរយៈ ហើយកាលពីថ្ងៃទី២២ ខែមករា ឆ្នាំ២០២៤ កន្លងទៅនេះ ខ្ញុំបានដាក់ឱ្យដំណើរការផ្សព្វផ្សាយជាទម្រង់អេឡិចត្រូនិកដែលមានទាំងភាសាខ្មែរ និងអង់គ្លេស។ នៅថ្ងៃនេះ ក្នុងគម្រប់ខួបលើកទី៤៦ ឆ្នាំ កាសែតកម្ពុជានឹងត្រូវបោះពុម្ពផ្សព្វផ្សាយឡើងវិញ នឹងចែកចាយជូនក្រសួងស្ថាប័ននានាជាប្រចាំថ្ងៃ និងជូនបងប្អូនប្រជាពលរដ្ឋសម្រាប់ការអាន។ ទោះបីជាប្រព័ន្ធផ្សព្វផ្សាយទំនើបរីកចម្រើនខ្លាំង ប៉ុន្តែប្រព័ន្ធផ្សព្វផ្សាយប្រពៃណីនៅតែដើរតួនាទីសំខាន់ដដែលក្នុងការផ្តល់ព័ត៌មានពិត និងជាប្រភពដ៏សំខាន់សម្រាប់ផ្ទៀងផ្ទាត់ព័ត៌មានក្នុងបរិបទឌីជីថល។