ពិធីសម្ពោធពិព័រណ៌សិល្បៈកម្ពុជា កូរ៉េ រួមគ្នានៅខេត្ដសៀមរាបសម្រាប់កិច្ចសហប្រតិបត្តិការផ្នែកវប្បធម៌ និង ទេសចរណ៍ឱ្យកាន់តែស៊ីជម្រៅរវាងប្រជាជាតិទាំងពីរ

ឯកឧត្តម ប្រាក់ សោភ័ណ ខេត្តសៀមរាប បានបង្កើតនូវចំណងសម្ព័ន្ធមេត្រីភាពជាមួយខេត្ត-ក្រុង នៃសាធារណរដ្ឋកូរ៉េ ចំនួន ៣ខេត្ត-ក្រុង រួមមានទីក្រុងស៊ូវ៉ុន នៃខេត្តឃ្យុងគី ខេត្តជុងចុងណាំដូ និងខេត្តកាងវ៉ុន តាមរយៈទំនាក់ទំនងខេត្ត-ក្រុងសម្ព័ន្ធមេត្រីភាពទាំងនេះ ខេត្តសៀមរាប ទទួលបាននូវលទ្ធផល នៃកិច្ចសហប្រតិបត្តិការគួរឲ្យកត់សម្គាល់ទាក់ទងទៅនឹង វិស័យវប្បធម៌ សង្គមកិច្ច កសិកម្ម អប់រំ ទេសចរណ៍ សុខាភិបាល ពាណិជ្ជកម្មជាដើម ដោយផ្លែផ្កាទាំងនេះ កើតចេញពីភាពជាបងប្អូន ទំនាក់ទំនង មិត្តភាព និងកិច្ចសហប្រតិបត្តិការល្អរវាងខេត្តសៀមរាប និងខេត្ត-ក្រុង សម្ព័ន្ធមេត្រីភាព នៃសាធារណរដ្ឋកូរ៉េ ។ ពិធីសម្ពោធបើកពិព័រណ៌សិល្បៈកម្ពុជា-កូរ៉េនេះ​ ជាព្រឹត្តិការណ៍អន្តរជាតិមួយសម្រាប់ខេត្តសៀមរាប នៅដើមឆ្នាំ២០២៥ ជាពិសេស កិច្ចសហប្រតិបត្តិការរវាងប្រទេសកូរ៉េ និងកម្ពុជា ប្រជាជនកម្ពុជា និងប្រជាជនកូរ៉េ ក៏ដូចជាការផ្សព្វផ្សាយវប្បធម៌ អរិយធម៌ខ្មែរ-កូរ៉េ ការទាក់ទាញភ្ញៀវទេសចរអន្តរជាតិមកទស្សនាខេត្តសៀមរាប ព្រមទាំងបានចូលរួមចំណែកលើកស្ទួយដល់វិស័យទេសចរណ៍ក្នុងខេត្ត ព្រមទាំងបងប្អូនប្រតិបត្តិករទេសចរណ៍ក្នុងខេត្តសៀមរាបទាំងមូល ដែលកំពុងប្រាស្រ័យទាក់ទងនឹងសក្តានុពលវិស័យទេសចរណ៍ជាចម្បងនេះ។

លោកជំទាវ ជ្រឹង បុទុមរងី្ស ឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ បានបញ្ជាក់ថា ការតាំងពិព័រណ៌នេះ បានដើរតួជាកាតាលីករដ៏សំខាន់ សម្រាប់កិច្ចសហប្រតិបត្តិការផ្នែកវប្បធម៌ និង ទេសចរណ៍ឱ្យកាន់តែស៊ីជម្រៅរវាងប្រជាជាតិយើងទាំងពីរ នេះជានិមិត្តរូបនៃស្មារតីយូរអង្វែង នៃទំនាក់ទំនងការទូត​ វប្បធម៌ និងពង្រឹងចំណងមិត្តភាពប្រទេសទាំងពីរ។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈបានគូសបញ្ជាក់ថា ពិព័រណ៌ សិល្បៈកម្ពុជា កូរ៉េនាពេលនេះ បានឆ្លុះបញ្ចាំងពីការរប្តេជ្ញាចិត្តរួមគ្នា ក្នុងការជម្រុញនូវការផ្លាស់ប្តូរសិល្បៈ និងការអភិរក្សកេរ្តិ៍ដំណែលវប្បធម៌នៃប្រទេសទាំងពីរ។ ព្រឹត្តិការណ៍ពិព័រណ៌នេះត្រូវបានផ្តួចផ្តើមរៀបចំឡើងក្នុងគោលបំណងផ្សព្វផ្សាយ តំបន់បេតិកភណ្ឌពិភពលោករបស់កម្ពុជាតាមរយៈការបង្ហាញសម្រស់ ដ៏វិចិត្រនៃប្រាង្គប្រាសាទបុរាណ និងស្នាដៃដ៏វិសេសរបស់បុព្វបុរសខ្មែរ និងការបង្ហាញវប្បធម៌កូរ៉េនៅលើឆាកអន្តរជាតិ។ វប្បធម៌រូបបិយ៍ និង អរូបបិយ៍ នៅកម្ពុជាបានកំពុងទាក់ទាញក្នុងវិស័យទេសចរណ៍ ហើយក៏ជាប្រភពសេដ្ឋកិច្ចជាតិមិនចេះរីងស្ងួតទៀតផង។ ក្នុងនោះឯកឧត្តម និង លោកជំទាវបណ្ឌិតសភាចារ្យ បានធ្វើ ការកោតសរសើរ វាយតម្លៃខ្ពស់ចំពោះវិចិត្រករ ដែលបានបង្ហាញនូវស្នាដៃប្រកបដោយភាពច្នៃប្រឌិត ភាពរស់រវើកនៃ គំនូរមានវិញ្ញាណ ដែលធ្វើឱ្យការតាំងពិព័រណ៌នេះ មានសម្រសស្រស់ស្អាត និងស្របតាមវប្បធម៌។ ស្នាដៃសិល្បៈបានបង្ហាញពេលនេះ ជាបេះដូងនៃជំនាញសិល្បៈ​ និង បេតិកភណ្ឌវប្បធម៌ដ៏ល្អបំផុត ការផ្លាស់ប្តូរវប្បធម៌ គឺជាការបង្ហាញពីភាពដ៏ បរិសុទ្ធបំផុត នៃការទំនាក់ទំនងរវាងមនុស្ស និង មនុស្ស និង ការផ្សាភ្ជាប់ដួងចិត្ត កាបង្រួបបង្រួមមនុស្សជាតិ យល់ដឹងពីគ្នាផងដែរ៕ អត្ថបទ រូបភាព រដ្ឋបាលខេត្ត