គ្រោះថ្នាក់ចរាចរណ៍ទាំងព្រឹក

ភ្នំពេញ៖ បុរសម្នាក់ត្រូវបានស្លាប់ភ្លាមៗនៅនឹងកន្លែងកើតហេតុដោយសារ បើករថយន្តក្នុងល្បឿនលឿន រេចង្កូតជ្រុលទៅបុកជាមួយរថយន្ត១គ្រឿងទៀត។

ហេតុការណ៍នេះកាលពីម៉ោង៦ព្រឹក ថ្ងៃទី១៦ ខែមករា ឆ្នាំ ២០២០ តាមបណ្ដោយផ្លូវបេតុងមួយកន្លែងក្នុងសង្កាត់កាកាបទី ២ ខណ្ឌពោធិ៍សែនជ័យរាជធានីភ្នំពេញ។ ជនរងគ្រោះឈ្មោះ ប៉ា ចាន់ពិសិទ្ធ អាយុ៣៣ឆ្នាំ មុខរបរជាអ្នកគក់ជេររថយន្ត ស្នាក់នៅក្នុងបុរីឈូកវ៉ា១ ក្នុងសង្កាត់កាតាប២ ខណ្ឌពោធិ៍សែនជ័យ រាជធានីភ្នំពេញ។ បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានរថយន្តព្រូស១គ្រឿង ពណ៌ស ពាក់ស្លាកលេខ ភ្នំពេញ 2AQ-9139 បើកបរដោយបុរសម្នាក់ក្នុងទិសដៅបញ្ច្រាស់ទិសគ្នាក្នុងល្បឿនលឿន លុះមកដល់ត្រង់ចំណុចកើតហេតុបានជ្រុលទៅបុកពេញទំហឹងជាមួយនិងរថយន្តកូរ៉េពណ៌ស ១តោនកន្លះ ពាក់ស្លាកលេខ ភ្នំពេញ 2AK-7485 បើកបរដោយបុរសម្នាក់ក្នុងទិសដៅបញ្ច្រាស់ទិសគ្នា បណ្ដាលឲ្យភាគីខាងម្ចាស់រថយន្តព្រូសស្លាប់ភ្លាមៗនៅនឹងកន្លែងកើតហេតុតែម្ដង ចំណែកឯរថយន្តទាំងពីររងការខូចខាតយ៉ាងដំណំ ឯសពជនរងគ្រោះក្រោយពេលធ្វើកុសល្យវិច្ច័យរួចបានប្រគល់ជូនទៅសាច់ញាតិយកទៅធ្វើបុណ្យនៅវត្តក្រាំងធ្នង់តាមប្រពៃណី។

សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញចរាចរណ៍ផ្លូវគោក ដើម្បីធ្វើការវាស់វែងទៅលើរថយន្តទាំងពីរ នឹងស្ទូចយកទៅរក្សាទុកនៅការិយាល័យចរាចរណ៍ផ្លូវគោករង់ចាំការដោះស្រាយគ្នានៅពេលក្រោយតាមផ្លូវច្បាប់៕​ by PATHOM