” ថ្នាំញៀន ថ្នាំឆ្កួត ” នគរបាលប៉ុស្តិ៍កំពង់ស្វាយបានឃាត់ខ្លួនជនសង្ស័យ២នាក់

ជនសង្ស័យមានគ្នាចំនួន ២នាក់ដែលសមត្ថកិច្ចឃាត់ខ្លួនបាន ទី១ឈ្មោះ រី ស្មៀន ភេទប្រុស អាយុ៣៦ឆ្នាំ ជនជាតិខ្មែរ មុខរបរកសិករ មានទីលំនៅភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្ដាល ទី២ឈ្មោះ ហុង សុខា ហៅ(លី) ភេទប្រុស អាយុ២៦ឆ្នាំ ជនជាតិខ្មែរ មុខរបរមិនពិតប្រាកដ។​ វត្ថុតាងដកហូតរួមមាន ម្សៅក្រាមព៌ណសថ្លាសង្ស័យជាសារធាតុញៀន(ម៉ាទឹកកក) ចំនួន ២កញ្ចប់តូច ម៉ូតូមួយគ្រឿងម៉ាក HONDA BEAT ពណ៌សក្រហម ពាក់ស្លាកលេខ ភ្នំពេញ ១HS-១៦៩៩ មានលេខតួ​ ៩០១៦៨៤៤ និងលេខម៉ាសុីន ៩០១៧០៨០ សេរីឆ្នាំ២០១៩ ។

សភាពនៃរឿង កំលាំងសមត្ថកិច្ចប៉ុស្តិ៍នគរបាលកំពង់ស្វាយ បានសហការណ៍ជាមួយកំលាំងប្រជាការពារធ្វើការល្បាតនៅក្នុងមូលដ្ឋានឃុំកំពង់ស្វាយ ដូចសព្វមួយដង ពេលជិះល្បាតមកដល់ចំនុចកើតហេតុខាងលើ ក៏ឃើញជនសង្ស័យទាំងពីរនាក់កំពង់ជិះម៉ូតូ ដោយមានការសង្ស័យកំលាំងសមត្ថកិច្ចឃាត់សួរនាំរួចធ្វើការឆែកឆេរ ក៏ប្រទះឃើញម្សៅក្រាមពណ៌សថ្លាសង្ស័យជាសារធាតុញៀនខុសច្បាប់(ម៉ាទឹកកក)ចំនួន ២កញ្ចប់តូចនៅនឹងជាប់នឹងខ្លួនឈ្មោះ ហុង សុខា ហៅ(លី)ភេទប្រុស ឃើញដូច្នេះសមត្ថកិច្ចក៏ឃាត់ខ្លួនជនសង្ស័យទាំងពីរនាក់មកធ្វើការសាកសួរនៅប៉ុស្តិ៍នគរបាលកំពង់ស្វាយ។​

នៅចំពោះមុខសមត្ថកិច្ច ជនសង្ស័យទាំងពីរនាក់បានសារភាពថា ថ្នាំញៀន(ម៉ាទឹកកក)ចំនួន ២កញ្ចប់តូចនេះជារបស់ខ្លួនពិតប្រាកដមែន ដោយខ្លួនបានជិះម៉ូតូទៅទិញពីបុរសម្នាក់មិនស្គាល់ឈ្មោះ នៅឯភូមិឫស្សីជ្រោយ ឃុំស្វាយប្រទាល ស្រុកស្អាង ខេត្តកណ្តាល ដើម្បីយកទៅប្រើប្រាស់។​

ក្រោយពីទទួលបានចម្លើយសារភាពរបស់ជនសង្ស័យទាំងពីរនាក់រួចហើយ សមត្ថកិច្ចប៉ុស្តិ៍នគរបាលកំពង់ស្វាយ បានបញ្ជូនជនសង្ស័យទាំងពីរនាក់ រួមទាំងវត្ថុតាងទៅកាន់អធិការដ្ឋានស្រុកកៀនស្វាយដើម្បីបន្តចាត់ការតាមនីតិវិធី៕