Updating ចំនួនអ្នកស្លាប់ដោយសារវីរុស COVID-19 កើនដល់១ ៨៧៣នាក់ ខណៈចំនួនអ្នកឆ្លងកើនដល់ ៧៣ ៤២៩នាក់
បរទេស៖ បើយោងតាមការចុះផ្សាយរបស់សារព័ត៌មាន South China Morning Post អាជ្ញាធរសុខាភិបាលខេត្តហ៊ូប៉ី ប្រទេសចិន ដែលជាចំណុចកណ្តាលនៃប្រភពវីរុសកូវីដប្រភេទថ្មី COVID-19 បានរាយការណ៍ថា មានអ្នកស្លាប់ថ្មីចំនួន ៩៨នាក់បន្ថែមទៀត ករណីស្លាប់នៅក្រៅប្រទេសចិន មានតែ ៣ករណីតែប៉ុណ្ណោះ គឺនៅជប៉ុន ហ្វីលីពីន និងហុងកុង។
បើគិតត្រឹមម៉ោង៨និង២៤០នាទី ព្រឹកថ្ងៃអង្គារ ទី១៨ ខែកុម្ភៈ នេះដែលសរុបចំនួននៅទូទាំងពិភពលោកមនុស្សស្លាប់ទាំងអស់កើនដល់ ១ ៨៧៣នាក់ ខណៈចំនួនអ្នកឆ្លងកើនដល់ ៧៣ ៤២៩នាក់។
បើតាមបច្ចុប្បន្នភាពនៃទិន្នន័យរបស់គណៈកម្មាធិការសុខាភិបាលជាតិចិន អ្នកជំងឺជាង ១០ ០០០នាក់ ត្រូវបានរាយការណ៍ថា ស្ថិតក្នុងស្ថានភាពគ្រោះថ្នាក់ និងប្រមាណជាង ១០ ០០០នាក់ដូចគ្នា បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ ។
ដើម្បីទប់ស្កាត់ការរីករាលដាលយ៉ាងឆាប់រហ័សអាជ្ញាធរចិន បានប្រកាសបិទទ្វារទីក្រុងប្រមាណជាង ៨០ នៅក្នុងខេត្តជិត ២០ ចាប់តាំងពីការរីករាលដាលនៃជំងឺនេះ។
វិធានការណ៍តឹងរ៉ឹងរួមមានការគ្រប់គ្រងចលនារបស់អ្នកស្រុក និងយានយន្តនិងការរឹតត្បិតការចូលទៅកាន់សហគមន៍លំនៅដ្ឋាន និងសមាសធាតុនានាកំពុងត្រូវបានអនុវត្តនៅទូទាំងប្រទេស ៕
