ជីវិតអ្នកក្រ លោកតាខំធាក់ស៊ីក្លូទាំងយប់ដើម្បីចិញ្ចឹមជីវិត ត្រូវឡានបុកស្លាប់គួរឲ្យអាសូរ
ភ្នំពេញ៖ បុរសចំណាស់ អាយុជិត៨០ឆ្នាំម្នាក់ ខណៈពេលកំពុងធាក់ស៊ីក្លូដឹកស្រី្តម្នាក់ ដើម្បីយកប្រាក់ចិញ្ចឹមជីវិតស្រាប់តែ មានរថយន្ត ១គ្រឿងបើកមកបុកពីក្រោយពេញទំហឹង ហើយអូសទាំងស៊ីក្លូ ទាំងរបើកអូសទាំងមនុស្សរាប់សិបម៉ែត្រ បណ្តាលឲ្យស្លាប់នៅនឹងកន្លែងមួយរំពេច។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង១និង១០នាទីរំលងអធ្រាត្រ ឈានចូលថ្ងៃទី១៨ ខែកុម្ភៈ ឆ្នាំ២០២០នេះ នៅចំណុចជិតដើមពោធិ៍(ក្បែររូបសំណាកព្រះបរមរតនកោដ្ឋ) លើផ្លូវសុរាម្រិត ភូមិ៣ សង្កាត់ចតុមុខ ខណ្ឌដូនពេញ ។
បុរសរងគ្រោះដែលរថយន្តបុកស្លាប់នេះ មានឈ្មោះ កង អឿន អាយុ៧៧ឆ្នាំ មានស្រុកកំណើត នៅភូមិព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្តាល ។
ស្ត្រីដែលជិះស៊ីក្លូរបស់ជនរងគ្រោះ បានប្រាប់ឲ្យដឹងថា មុនពេលកើតហេតុ នាងបានហៅស៊ីក្លូបុរសរងគ្រោះជិះ ។ លុះមកដល់ចំណុចកើតហេតុបុរសរងគ្រោះ បានលើកដៃខាងឆ្វេង ឆ្លងផ្លូវបាន ពាក់កណ្ដាល ស្រាប់តែមានរថយន្ត១គ្រឿង ម៉ាកព្រុស ពណ៌ស (មិនចាំស្លាកលេខ) បើកបរយ៉ាងលឿនដូចហោះ មកបុកស៊ីក្លូពីក្រោយយ៉ាងពេញទំហឹង បណ្ដាលឲ្យរូបនាង ដែលជាអ្នកជិះខាងមុខខ្ទាត ទៅលើថ្នល់ របួសរលាត់ដៃ រលាត់ជើង ចំណែកស៊ីក្លូ និងបុរស រងគ្រោះបានជាប់នៅខាងមុខរថយន្ត អូសនឹងថ្នល់រាប់សិបម៉ែត្រ បណ្តាលឲ្យបុរសរងគ្រោះ ស្លាប់មួយរំពេចនឹង កន្លែងយ៉ាងអាណោចអាធ័ម រីឯរថយន្តបង្កមិនឈប់ទទួលខុសត្រូវទេ ដោយបានបន្ថែមល្បឿនបើករត់គេចខ្លួនបាត់ស្រ មោល។
ក្រោយកើតហេតុ កម្លាំងសមត្ថកិច្ច បានចុះអន្តរាគមន៍ធ្វើការវាស់វែង និងកំណត់ហេតុ យកស៊ីក្លូទៅ រក្សាទុក នៅ អធិការដ្ឋាននគរបាលខណ្ឌដូនពេញ ដើម្បីរងការស្រាវជ្រាវរករថយន្តបង្ក និងអ្នកបើកបរ មកធ្វើការដោះស្រាយ តា មផ្លូវច្បាប់។
ចំណែក សពជនរងគ្រោះ បានប្រគល់ជូនក្រុមគ្រួសារ យកទៅ ចាត់ចែងរៀបចំធ្វើបុណ្យតាមប្រពៃណី៕