” ថ្នាំញៀន ថ្នាំឆ្កួត ” យុវជន២នាក់ត្រូវបានកម្លាំងនគរបាលឃាត់ខ្លួន ក្នុងការបង្រ្កាបគ្រឿងញៀន

ខេត្តកណ្តាល: កម្លាំងនគរបាលស្រុកស្អាងខេត្តកណ្តាល បានចុះធ្វើការបង្រ្កាបការជួញដូរដោយខុសច្បាប់នូវសារធាតុញៀន(ម៉ាទឹកកក) នៅថ្ងៃ ព្រហស្បតិ៍ ១២រោច ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២០ ខែកុម្ភៈ ឆ្នាំ២០២០ វេលាម៉ោង១៣និង៣០នាទី នៅចំណុចភូមិដំរីឆ្លង ឃុំស្អាងភ្នំ ស្រុកស្អាង ខេត្តកណ្តាល ។
សមត្ថកិច្ចឃាត់ខ្លួនជនសង្ស័យចំនួន ២នាក់ ទី១.ឈ្មោះ ណាង ស៊ីណេត ហៅ ប៉េវ ភេទប្រុស អាយុ២២ឆ្នាំ ជនជាតិខ្មែរ មុខរបរមិនពិតប្រាកដ ទី២.ឈ្មោះ រុន រ័ត្ន ភេទ អាយុ២០ឆ្នាំ ជនជាតិខ្មែរ មុខរបរកសិករ ដែលមានទីលំនៅបច្ចុប្បន្នភូមិ​ដំរីឆ្លង ឃុំស្អាងភ្នំ ស្រុកស្អាង ខេត្តកណ្តាល (ជាមួយគ្នា) ។
យោងតាមសមត្ថកិច្ចបានឲ្យNTVយើងដឹង ក្រោយពីទទួលបានព័ត៍មានពីប្រជាពលរដ្ឋថា មានករណី​ជួញដូរគ្រឿងញៀន ភ្លាមនោះកម្លាំងផ្នែកប្រឆាំងបទល្មើសគ្រឿងញៀន នៃអធិការស្រុកបានចុះសហការជាមួយកម្លាំងអន្តរាគមន៍ កម្លាំងប៉ុស្តិ៍នគរបាលស្អាងភ្នំ កម្លាំងប៉ុស្ដិក្រាំងយ៉ូវ កម្លាំងប៉ុស្តិ៍ព្រែកគយ ទៅដល់ចំណុចកើតហេតុ ក៍បានធ្វើការត្រួតពិនិត្យទៅលើឈ្មោះ រុន រ័ត្ន កម្លាំងនគរបាលប្រមូលបានវត្ថុតាងរួមមាន ម្សៅក្រាមពណ៌សថ្លា សង្ស័យជាសារធាតុញៀន(ម៉ាទឹកកក) ចំនួន ២កញ្ចប់តូចនៅនឹងខ្លួន នឹងម៉ូតូ ១គ្រឿង ម៉ាកហុងដាគុបជ្រុង ពណ៍ខ្មៅ ជារបស់ឈ្មោះ រុន រ័ត្ន ទូរស័ព្ទដៃព៍ណស ១គ្រឿងម៉ាកសាំស៊ុង រួចឃាត់ខ្លួនដើម្បីសាកសួរ ។
នៅចំពោះមុខសមត្ថកិច្ចឈ្មោះ រុន រ័ត្ន បានសារភាពថា ខ្លួនបានទទួលលុយ១៦០០០០៛​ ពីឈ្មោះ ណាង ស៊ីណេត ហៅ ប៉េវ (នៅថ្ងៃទី២០ ខែគុម្ភៈ ឆ្នាំ២០២០)ដើម្បីយកទៅទិញគ្រឿងញៀន(ម៉ាទឹកកក)​ចំនួន១កញ្ចប់ នៅភូមិលេខ១សង្កាត់ស្វាយរលំ រួចប្រគល់ឲ្យឈ្មោះណាង សីុណេតហៅ ប៉េវ បន្ទាប់មក ខ្លួន(រុន រ័ត្ន) ទិញគ្រឿងញៀនពីឈ្មោះ ប៉េវ ចំនួន ២កញ្ចប់តូច តម្លៃ ៤០០០០៛ ដើម្បីយកមកលក់បន្ត ក្នុង១កញ្ចប់តូច តម្លៃ ២៥ ០០០៛ ។

បច្ចុប្បន្នជនសង្ស័យ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវីធី ៕