ម្ដាយសុខចិត្តស្លាប់ ដើម្បីកូនរស់

ខេត្តកំពង់ឆ្នាំង៖ ស្រ្តីម្នាក់បានប្រើកូនឲ្យឡើងកាប់ស្លឹកត្នោត តែអកុសល បានដាច់បង្អោងធ្លាក់មកដី ក៏ព្រោះតែខ្លាចកូនស្លាប់ ទើបសុខចិត្តនៅទ្រកូនពីក្រោម បណ្តាលឲ្យសង្កត់ពីលើស្រ្តីជាម្តាយស្លាប់មួយរំពេច។

ហេតុការណ៍នេះ បានកើតឡើង កាលពីវេលាម៉ោង៨និង៥៥នាទី នៅថ្ងៃទី៥ ខែមីនា ឆ្នាំ២០២០ នៅចំណុចខាងក្រោយផ្ទះជនរងគ្រោះចម្ងាយប្រហែល ៣០ម៉ែត្រ ក្នុងភូមិវត្តថ្មី ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បណ្ដាលឲ្យស្លាប់ ។

ជនរងគ្រោះឈ្មោះ តឹក លី ភេទស្រី អាយុ៤៩ឆ្នាំ រស់នៅភូមិឃុំកើតហេតុខាងលើ សមត្ថកិច្ចបានឲ្យដឹងថា មុនពេលកើតហេតុ ស្រ្តីរងគ្រោះបានប្រើកូនប្រុសអាយុ១៣ឆ្នាំ ឲ្យឡើងកាប់ត្នោត លុះពេលឡើងដល់ខាងលើក៏បានដាច់ខ្សែចងបង្អោង បណ្ដាលឲ្យធ្លាក់ក្មេងប្រុសនោះមកសង្កត់លើម្ដាយ ដែលអង្គុយចាំនៅខាងក្រោម បណ្ដាលឲ្យស្លាប់ភ្លាមៗនៅកន្លែងកើតហេតុ។

ក្រោយកើតហេតុ សមត្ថកិច្ចបានចុះអន្តរាគមន៍ពិនិត្យដល់កន្លែង រួចប្រគល់សពស្រ្តីរងគ្រោះជូនក្រុមគ្រួសារចាត់ចែងរៀបចំធ្វើបុណ្យតាមប្រពៃណី៕