លួចសម្ភារៈពីបន្ទប់ដូនជី ទៅដេករងចាំចូលគុកនៅចេតិយក្នុងវត្ត

ខេត្តកណ្តាល៖ សមត្ថកិច្ចបានឃាត់ខ្លួនជនសង្ស័យម្នាក់ពាក់ព័ន្ធករណីលួច នៅចំណុចវត្តពិជ័យរង្សី ភូមិអញ្ជែងលើ ឃុំពុកឫស្សី ស្រុកខ្សាច់កណ្តាល ខេត្តកណ្ដាល ដែលបានកើតហេតុនៅថ្ងៃច័ន្ទ ១រោច ខែផល្គុន ឆ្នាំកុរ ឯកសក័ ព.ស ២៥៦៣ ត្រូវនឹងថ្ងៃទី០៩ ខែមិនា ឆ្នាំ២០២០ វេលាម៉ោង១៩ៈ០០នាទី ។

ជនរងគ្រោះមានឈ្មោះ គង់ សុផល ភេទស្រី អាយុ៦៣ឆ្នាំ ជនជាតិខ្មែរ មុខរបរសុំសីលនៅក្នុងវត្តពិជ័យរង្សី មានទីលំនៅភូមិស្វាយអាត់ក្រោម ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។

ជនសង្ស័យមានឈ្មោះ ភី ឃាង ហៅ តុល ឃាង ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិអញ្ជែងលើ ឃុំពុកឫស្សី ស្រុកខ្សាច់កណ្តាល ខេត្តកណ្តាល(ឃាត់ខ្លួន)។ វត្ថុតាងចាប់យកមាន -ខ្សែកចំនួន ២ខ្សែ – ក្រវិល ចំនួន ១គូ -លុយចំនួន ១០០ដុល្លារ -កាំបិតខ្វែវ ចំនួន១ – ញញួរ ចំនួន១ -ថ្មសំលាងកាំបិត ចំនួន១ ។

សភាពរឿងហេតុរយៈពេលជាយូរមកហើយ ដែលជនរងគ្រោះមកបួស ជាដូនជី នៅក្នុងវត្តពិជ័យរង្សី និងបានសង់ តូបធ្វើពីឈើជញ្ជាំងបាំងស័ង្គសីស្នាក់នៅ ដោយកន្លងមកជនសង្ស័យឈ្មោះ ភី ឃាង ធ្លាប់បាន​លួចរបស់របរនៅក្នុងវត្តពិជ័យរង្សី ជាច្រើនលើកមកហើយ និងនៅថ្ងៃទី០៧.០៣.២០២០ ជនរងគ្រោះ និងព្រះសង្ឃព្រះនាម ឈួន ធឿន បានទៅធ្វើបុណ្យ នៅភ្នំសំពៅ ខេត្តបាត់ដំបង ដល់ថ្ងៃទី០៩.០៣.២០២០ វេលាម៉ោង១៩ៈ០០នាទី ជនសង្ស័យឈ្មោះ ភី ឃាង បាន​លួច​យក​ញញួររបស់ជាងសំណង់ក្នុងវត្ត យកទៅគាស់ជញ្ជាំងតូបរបស់ជនរងគ្រោះ ហើយយកទ្រព្យសម្បត្តិរបស់ជនរងគ្រោះ មានខ្សែកមាស ២ខ្សែ ទម្ងន់ ២តម្លឹង៦ជី ក្រវិលមាស១គូរ ទម្ងន់៥ហ៊ុន លុយ ១០០ដុល្លារ កាំបិតខ្វែវចំនួន១ ថ្មសំលៀងកាំបិតចំនួន១ អង្រឹងចំនួន១ ពេលធ្វើសកម្មភាពហើយជនសង្ស័យឈ្មោះ ភី ឃាង បានរត់ទៅដេកក្នុងចេតិយ នៅពីក្រោយសាលារៀនបឋមសិក្សាពិជ័យរង្សី ។

រហូតដល់ម៉ោង១៩ៈ៣០នាទី ជនរងគ្រោះបានត្រលប់មកដល់វត្តវិញ ហើយឃើញជញ្ជាំងតូបខ្លួនរហែក និងបាត់បង់ទ្រព្យសម្បត្តិអស់ ក៏រាយការណ៌ជូនសមត្ថកិច្ចនគរបាលប៉ុស្តិ៍ពុកឫស្សី លុះដល់ថ្ងៃទី១០ ខែមិនា ឆ្នាំ២០២០ ទើបសមត្ថកិច្ចនគរបាលចុះស្រាវជ្រាវឃាត់ខ្លួនជនសង្ស័យ រួមទាំងវត្ថុតាងបញ្ជូន​មក​អធិការដ្ឋាននគរបាលស្រុកខ្សាច់កណ្ដាល បន្តអនុវត្តតាមនីតិវិធី៕