អ្នកបើកបរបានបាត់បង់ជីវិតដោយសារឆេះរថយន្តម៉ាកស៊ីណាមួយគ្រឿង

ខេត្តកំពង់ធំ៖ ថ្ងៃព្រហស្បតិ៍ ១១រោច ខែផល្គុន ឆ្នាំកុរ ឯកស័ក ព.ស២៥៦៣ ត្រូវនិងថ្ងៃទី១៩ ខែមីនា ឆ្នាំ ២០២០ វេលាម៉ោង២៣ និង៤៥នាទី លើផ្លូវជាតិលេខ៦ គីឡូម៉ែត្រលេខ១០៧.១០៨ ចំណុចភូមិរំចេក ឃុំទ្រៀល ស្រុកតាំងគោក ខេត្តកំពង់ធំ មានករណីគ្រោះថ្នាក់ចរាចរណ៍ បង្កដោយខ្លួនឯង រថយន្តម៉ាកស៊ីណាដឹកទឹកអាកុល ក្នុងទិសដៅត្បូងមកជើង បានរ៉េចង្កូត ធ្លាក់ផ្លូវមកបុករះបង្គោលភ្លើង និងរបងមុខផ្ទះ ខាងស្តាំដៃ បណ្តាលអោយឆេះរថយន្ត និងស្លាប់អ្នកបើកបររថយន្តនៅនិងកន្លែងកើតហេតុ។

កិច្ចប្រតិបត្តិការនេះ សមត្ថកិច្ចប្រើប្រាស់កម្លាំងចូលរួមអន្តរាគមន៍ ចំនួន ១៩នាក់ ប្រើប្រាស់បំពង់ពន្លត់អគ្គីភ័យអស់ចំនួន ៥បំពង់ រថយន្តទឹកអគ្គីភ័យ មកពីអធិការរដ្ឋានស្រុកបារាយណ៍ ១គ្រឿង ប្រើប្រាស់ទឹកអស់ចំនួន ១រថយន្ត ស្មើនិង ៤ម៉ែត្រគូប ទើបរលត់ទាំងស្រុង តែមិនបណ្តាលឲ្យឆេះរាលដាលដល់កន្លែងដ៏ទៃនោះទេ។

តាមប្រភពពីសមត្ថកិច្ច បានអោយដឹងថា អ្នកបើកបររថយន្ត បើកបរមានល្បឿនលឿន ហើយស្ថិតក្នុងស្ថានភាពងងុយដេក អ្នកបើកបរមិនស្គាល់អត្តសញ្ញាណ និងរថយន្តម៉ាកស៊ីណា ពាក់ផ្លាកលេខ ភ្នំពេញ 2BA-4837 ឆេះអស់ទាំងស្រុង ករណីខាងលើនេះ សមត្ថកិច្ចកំពង់ធ្វើការស្រាវជ្រាវរកសាច់ញាតិ និងសាកសពយកមកតម្កល់ទុកនៅក្នុងវត្តដា ស្ថិតក្នុងឃុំទ្រៀល វត្ថុតាងរថយន្ត ១គ្រឿងយកមករក្សាទុកនៅកន្លែងកើតហេតុ៕