អ្នកផ្ទុកជម្ងឺCOVID -19 ចំនួន ២នាក់ ឥឡូវបានសះស្បើយ
ខេត្តបន្ទាយមានជ័យ៖ នៅខេត្តបន្ទាយមានជ័យអ្នកជម្ងឺCOVID -19 ចំនួន២នាក់ ក្រោយបានថែទាំនិងដាក់នៅដោយឡែកក្នុងមន្ទីរពេទ្យ ឥឡូវបានសះស្បើយហើយគ្រូពេទ្យនៃមន្ទីរពេទ្យខេត្តមិត្តភាពកម្ពជា.ជប៉ុនមង្គលបូរី អនុញ្ញាតិអោយវិលទៅផ្ទះ ។
លោក អ៊ុំ រាត្រី អភិបាលខេត្ត លោកវេជ្ជបណ្ឌិត កែវ សុភ័ក្ត្រា ប្រធានមន្ទីរសុខាភិបាលខេត្ត លោកវេជ្ជបណ្ឌិត ចន្ទ វិឌ្ឍីណាវុឌ្ឍ ប្រធានមន្ទីរពេទ្យនិងគ្រូពេទ្យជំនាញ លោក រ័ត្ន ដាស៊ីណង់ អភិបាលស្រុកមង្គលបូរី និងមន្ត្រីក្រុមការងារបានអបអរសាទរជូនដំណើរ ព្រមទាំងផ្តល់ការឧបត្ថម្ភដល់អ្នកឈ្នះជម្ងឺកូវីដ១៩ នេះទាំង២លើក ចំណែកលោក ហ៊ឹល រ៉ាយ៉ា អភិបាលក្រុងសិរីសោភ័ណនិងមន្ត្រីក្រុមការងារបានរង់ចាំទទួលស្វាគមន៍នៅផ្ទះ។ លោកអភិបាលខេត្ត និងមន្ត្រីសុខាភិបាល រួមទាំងគ្រូពេទ្យបានកត់សម្គាល់ឃើញថា នេះជាជោគជ័យថ្មីលើកដំបូង លើផ្នែកទទួលថែទាំ ព្យបាលអ្នកជម្ងឺនៅខេត្តបន្ទាយមានជ័យ គឺជាជោគជ័យនៃការអនុវត្តគោលនយោបាយរបស់ក្រសួងសុខាភិបាលនៃរាជរដ្ឋាភិបាលលើការប្រយុទ្ធនឹងមេរោគកូវីដ១៩។ មន្ត្រីសង្ឃឹមថា លទ្ធផលនេះនឹងជួយធ្វើឲ្យប្រជាពលរដ្ឋនិងមហាជន លែងមានការភ័យខ្លាច រើសអើង បើទោះយ៉ាងណា ក៏វារឹងរឹតតែជម្រុញឲ្យយើងរួមគ្នាប្រុងប្រយ័ត្ន បង្ការទប់ស្កាត់ នូវមេរោគកូវីដ១៩ ក៏ដូចជាយកចិត្តទុកដាក់លើសេវាថែទាំបំប៉ន ព្យាបាលបន្ថែមទៀតលើអ្នកជម្ងឺ។ សូមបញ្ជាក់ថា បុរសពលករខ្មែរធ្វើការនៅថៃ អាយុ៣១ឆ្នាំរូបនេះ បានជាសះស្បើយពីជម្ងឺកូវីដ១៩ គាត់បានវិលទៅផ្ទះនៅព្រៃឫស្សី សង្កាត់ព្រះពន្លា ក្រុងសិរីសោភ័ណ កាលពីរសៀលថ្ងៃទី២៩ ខែមីនា ឆ្នាំ២០២០ បុរសនេះនឹងស្ថិតនៅដាច់ដោយឡែក១៤ថ្ងៃទៀតនៅបរិវេណផ្ទះ មុននឹងអាចស្និតស្នាលនឹងសមាជិកគ្រួសារ ៧នាក់របស់គាត់។ ចំណែកបុរសជនជាតិខ្មែរឥស្លាម អាយុ៤១ឆ្នាំ ដែលវិលពីចូលរួមកម្មវិធីសាសនានៅប្រទេសម៉ាឡេស៊ី គាត់បានវិលទៅផ្ទះភូមិគោរដ្ឋាន សង្កាត់អូរអំបិល ក្រុងសិរីសោភ័ណ កាលរសៀលថ្ងៃទី២៧ ខែមីនារួចហើយ ក្រោយស្ថិតនៅដាច់ដោយឡែក១៤ថ្ងៃ ក៏នឹងអាចស្និតស្នាលនឹងសមាជិកគ្រួសារ ៥នាក់របស់គាត់ដែរ អ្នកទាំង២ ត្រូវបានរកឃើញវិជ្ជមានចំពោះមេរោគកូវីដ១៩ ហើយបានចូលសម្រាកនៅមន្ទីរពេទ្យកាលពី១៧ ដល់ថ្ងៃទី២៧,២៩ ខែមីនាឆ្នាំ២០២០ ។ អ្នកឈ្នះជម្ងឺកូវីដ១៩ ទាំង២នាក់ បានថ្លែងអំណរគុណគ្រូពេទ្យជំនាញដែលពិនិត្យ ថែទាំអោយលោកបានសះស្បើយ ហើយក៏អរគុណថ្នាក់ដឹកនាំ មន្ត្រីនិងអ្នកទាំងឡាយដែលបានឧបត្ថម្ភ និងផ្តល់កម្លាំងចិត្ត និងមិនរើសអើងចំពោះពួកគាត់ ។
លោក អ៊ុំ រាត្រី អភិបាលខេត្តបន្ទាយមានជ័យបានថ្លែងថា សម្តេចតេជោប្រមុខរាជរដ្ឋាភិបាលនិងរដ្ឋមន្ត្រីក្រសួងសុខាភិបាល ដោយឡែកក្រុមគ្រូពេទ្យបានធ្វើពលិកម្មធំណាស់ក្នុងការថែទាំ ព្យបាលអ្នកជម្ងឺកូវីដ១៩ ដោយឡែក នៅខេត្តនេះមានអ្នកជម្ងឺចំនួនតែ ២នាក់ដំបូងទេ និងបានជាសះស្បើយ ចំណែកក្រុមការរងារវិញ ក៏បន្តយុទ្ធនាផ្សព្វផ្សាយការបង្ការទប់ស្កាត់មេរោគកូវីដ១៩នេះបន្ថែមទៀត ៕
