ភ្នំពេញ៖ នារីរងគ្រោះ ជាកូនស្រីតារាកំប្លែងនាយត្រដក់ ដែលចងកស្លាប់នេះ មានឈ្មោះ វ៉ាន់ ដានីត ជនជាតិខ្មែរ អាយុ៣២ឆ្នាំ ស្រុកកំណើតនៅសង្កាត់លេខ៥ ក្រុងភ្នំពេញ ទីលំនៅបច្ចុប្បន្នផ្ទះ៩អឺ១ ផ្លូវ៤៧ ភូមិ១១ សង្កាត់ស្រះចក ខណ្ឌដូនពេញ។

ក្រុមគ្រួសារនារីរងគ្រោះ បានឲ្យដឹងថា មុនកើតហេតុ នារីរងគ្រោះ បានចេញពីផ្ទះរយ:ពេល៤ថ្ងៃហើយ ដោយមិនមានឈ្លោះអ្វីជាមួយក្រុមគ្រួសារទ្បើយ ហើយក៏មិនដឹងថា នាងទៅជាមួយអ្នកណា និងនៅទីកន្លែងណាដែរ លុះមកដល់ថ្ងៃកើតហេតុ ទើបក្រុមគ្រួសារនាងទទួលដំណឹងថា នារីរងគ្រោះចងកស្លាប់បាត់ទៅហើយ ធ្វើឲ្យក្រុមគ្រួសាររន្ធត់ចិត្តជាខ្លាំង និងធ្វើដំណើរប្រញាប់មកចំណុចកើតហេតុ បន្ទាប់មកក៏បានឃើញនារីរងគ្រោះចងកស្លាប់មែន។

ក្រោយកើតហេតុ កម្លាំងជំនាញបានចុះទៅដល់ទីតាំងខាងលើ រួចរាយការណ៍ជូនព្រះរាជអាជ្ញាការិយាល័យបច្ចេក​ទេស ការិយាល័យព្រហ្មទណ្ឌកម្រិតធ្ងន់ និងគ្រូពេទ្យកោសលវិច័យរាជធានី ដើម្បីបង្កើតគណ:កម្មាការធ្វើកោសល្យវិច័យ ត្រួតពិនិត្យសព។

តាមព័ត៌មានដែលប្រមូលបាន និងការពិនិត្យរបស់លោកវេជ្ជបណ្ឌិត នង សុវណ្ណរ័ត្ឋ គ្រូពេទ្យកោសលវិច័យ បានបញ្ជាក់ នារីរងគ្រោះពិតជាស្លាប់ដោយចងកសម្លាប់ខ្លួនប្រាកដមែន មិនមានពាក់ព័ន្ធនឹងករណីអ្វីទេ បន្ទាប់មកបានធ្វើកំណត់ហេតុប្រគល់ឲ្យទៅក្រុមគ្រួសារ យកទៅធ្វើបុណ្យតាមប្រពៃណី ទាំងក្តៅសោកអាល័យជាពន់ពេក។

បើតាមប្រភពពីក្រុមគ្រួសារថា កូនស្រីតារាកំប្លែងជើងចាស់ នាយត្រដក់ ក្រោយពីបាត់ខ្លួន៤ថ្ងៃ ស្រាប់តែគិតខ្លីចងកសម្លាប់ខ្លួន យ៉ាងអាណោចអាធ័ម ហើយក៏បានបង្កឲ្យមានការភ្ញាក់ផ្អើល កាលពីវេលាម៉ោងប្រមាណ១.៤០នាទីរសៀល ថ្ងៃទី៣០ ខែមីនា ឆ្នាំ២០២០ ត្រង់ចំណុចក្នុងផ្ទះសំណាក់អាស៊ាន បន្ទប់លេខ០៧ ជាន់ឡៅតឿ ផ្ទះលេខ១៤ ផ្លូវលេខ៤៧ ក្រុម១១៣ ភូមិ៨ សង្កាត់ស្រះចក ខណ្ឌដូនពេញ៕