មិនមានការឲ្យសាលាណាមួយបើកចូលរៀនវិញនៅថ្ងៃទី១៨មេសានោះទេ

ភ្នំពេញ៖ នៅរសៀលថ្ងៃទី០៤ ខែមេសា ឆ្នាំ២០២០ អ្នកនាំពាក្យក្រសួងអប់រំ យុវជន និងកីឡា លោក ឌី ខាំប៉ូលី បានចេញមកច្រានចោលព័ត៌មានមួយ ដែលបានផ្សព្វផ្សាយលើបណ្តាញសង្គមថា ក្រសួងអប់រំ នឹងអនុញ្ញាតឱ្យសាលាទាំងអស់បើកបង្រៀនឡើងវិញនៅថ្ងៃទី១៨ ខែមេសា ឆ្នាំ២០២០ខាងមុខនេះ។
មន្ត្រីជាន់ខ្ពស់ក្រសួងអប់រំរូបនេះ បានឲ្យដឹងទៀតថា ក្រសួងធ្លាប់បានប្រកាសឲ្យវិស្សមកាលតូចមុនពេលកំណត់ ប៉ុន្តែការឲ្យបើកបវេសនកាលវិញ មិនទាន់បានកំណត់នោះទេ ដោយសារការរាតត្បាត នៃមេរោគកូវីដ១៩។
លោក ឌី ខាំប៉ូលី បានបញ្ជាក់ថា «សូមសាធារណជនមាតាបិតា អាណាព្យាបាល លោកគ្រូ អ្នកគ្រូ បុគ្គលិកអប់រំ ទាំងអស់សូមមេត្តាអនុវត្តន៍ ទៅតាមសេចក្តីណែនាំរបស់ក្រសួង ស្តីពីការចាប់ផ្តើមវិស្សមកាលតូច និងការឈប់សម្រាកមុនកាលកំណត់ សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទ ទាំងសាធារណៈ និងឯកជន នៅទូទាំងប្រទេស រហូតដល់មានការជូនដំណឹងសារជាថ្មី ខ្ញុំសូមបញ្ជាក់ឡើងវិញថា មិនមានការកំណត់នៅក្នុងការអនុញ្ញាតឲ្យគ្រឹះស្ថានសិក្សាគ្រប់ប្រភេទបើកការចូលរៀនឡើងវិញនៅថ្ងៃទី១៨ ខែមេសា ឆ្នាំ២០២០ទេ នេះជាព័ត៌មានមិនពិត ព័ត៌មានក្លែងក្លាយ សូមរង់ចាំការជូនដំណឹងជាថ្មីពីក្រសួងអប់រំយុវជន និងកីឡា»