ភ្នំពេញ៖ អ្នកនាំពាក្យក្រសួងការបរទេសវៀតណាម លោកស្រី Le Thi Thu Hang មាននិយាយ​ថា ប្រទេសវៀតណាមកំពុងផ្តោតការយកចិត្តទុកដាក់យ៉ាងខ្លាំងទៅលើការអនុវត្តតួនាទីជាប្រធានអាស៊ានឆ្នាំ ២០២០។

លោកស្រី Hang បានធ្វើសេចក្តីថ្លែងការណ៍នេះ នៅឯសន្និសីទសារព័ត៌មានជាទៀងទាត់របស់ក្រសួងនៅទីក្រុងហាណូយ កាល​ពីថ្ងៃទី១៤ ខែឧសភា ខណៈដែលឆ្លើយទៅនឹងសំណួររបស់អ្នកសារព័ត៌មានទាក់ទងនឹងព័ត៌មានដែលថា ប្រទេសវៀតណាមត្រូវការ​រយៈពេលមួយឆ្នាំបន្ថែមទៀត ក្នុងនាមជាប្រធានអាស៊ាន ដើម្បីជម្នះនឹងការរំខានរបស់ជំងឺកូវីដ-១៩ ។

លោកស្រីបាននិយាយថា ក្នុងរយៈពេលកន្លងមក បើទោះបីមានការលំបាកដែលបង្កឡើងដោយការវិវដ្តដ៏ស្មុគស្មាញនៃការរាល​ដាលនៃជំងឺរាតត្បាតក៏ដោយ ក៏ប្រទេសវៀតណាមបានដើរតួនាទីជាប្រធាន អាស៊ាន ក្នុងការលើកកម្ពស់ការរួបរួមគ្នាជាក្រុម និងការឆ្លើយ​តបយ៉ាងសកម្មចំពោះការរាតត្បាតនេះ រក្សាកិច្ចសហប្រតិបត្តិការ និងអនុវត្តន៍សកម្មភាពអាទិភាពប្រកបដោយប្រសិទ្ធភាពនៅក្នុងឆ្នាំនេះ។ លោកស្រី Hang បានបញ្ជាក់ថា មិនទាន់មានអនុសាសន៍ណាមួយដើម្បីបន្តធ្វើជាប្រធានអាស៊ានរបស់វៀតណាមនោះទេ៕ by AKP

(ប្រភព VNA បកប្រែដោយ លោក យា ចិន្តាខន្តី)