ស្ថានទូតជប៉ុន នឹងរៀបចំនូវព្រឹត្តិការណ៍ពិធីបុណ្យផ្កាយ អនឡាញ២០២០ ចាប់ពីថ្ងៃទី​១១ ដល់ថ្ងៃទី១២ ខែកក្កដាខាងមុខ

ក្នុងសេចក្ដីប្រកាសបានបញ្ជាក់ថា តាណាបាតា ឬពិធីបុណ្យផ្កាយ គឺជាព្រឹត្តិ​ការណ៍​ប្រពៃណីមួយរបស់ជប៉ុន ដែលតែងតែប្រារព្ធឡើងនៅថ្ងៃទី០៧ ខែកក្កដា នៅប្រទេសជប៉ុន​ដែលរម្លឹកដល់រឿងរបស់គូស្នេហ៍មួយគូនៅឋានសួគ៌ គឺនារីតម្បាញ និងបុរសគង្វាលគោ ដែលអ្នកទាំងពីរត្រូវបានបំបែកចេញពីគ្នាដោយទន្លេអាម៉ាណូហ្គាវ៉ា ហើយត្រូវបាន អនុញ្ញាតឱ្យជួបគ្នាវិញ តែម្តងគត់ក្នុងមួយឆ្នាំ គឺនៅថ្ងៃទី០៧ ខែកក្កដា។  សម្រាប់ពិធីបុណ្យ នៅថ្ងៃនោះប្រជាជនជប៉ុនសរសេរបំណងប្រាថ្នារបស់ពួកគេ ហើយព្យួរនៅលើដើមឫស្សី ដើម្បីឱ្យទទួលបានដូចបំណង។

សេចក្ដីប្រកាសបានបន្ដថា ក្នុងអំឡុងពេលនៃពិធីបុណ្យផ្កាយអនឡាញ២០២០ ចាប់​ពីថ្ងៃទី១១-១២ ខែកក្កដា ឆ្នាំ២០២០ នឹងមានកម្មវិធីវប្បធម៌ជប៉ុនតាមអន​ឡាញជា​ច្រើន​នៅលើទំព័រហ្វេសប៊ុក ព្រឹត្តិការណ៍ពិធីបុណ្យផ្កាយអនឡាញ២០២០ ដូចជារបៀបតុប​តែង​ដើមឫស្សីតាណាបាតា សិក្ខា​សាលាអនឡាញស្តីពីការបង្កើតគំនូរជីវចល ការបញ្ចាំង​គំនូរ​ជីវចល ដែលបាន​ទទួល​ពាន់រង្វាន់ Digicon6 របៀបស្លៀកសម្លៀកបំពាក់ប្រពៃណី​របស់​ជប៉ុន និងកម្ពុជា “យូកាតា” និង“ក្បិន”របៀបបត់ក្រដាស “អូរីហ្កាមិ” និងធ្វើគ្រឿងអលង្ការ របៀបធ្វើបង្អែមជប៉ុន និងកម្ម វិធីជាច្រើនទៀត៕ by AKP(ដោយ៖រិទ្ធី)