Updating រថយន្តយក្សដឹកជ្រូកបានវេរចង្កូតទៅបុកបង្កាន់ ដៃស្ពានបណ្តាលឲ្យធ្លាក់មកដីស្លាប់មនុស្ស ១នាក់ ៦នាក់របួសស្រាល និង ៦នាក់របួសធ្ងន់

លោកវរសេនីយ៍ឯក សែស វិបុល អធិការនគរបាលាស្រុកអូរជ្រៅ បានប្រាប់អ្នកយកព័ត៌មានឲ្យដឹងថា រថយន្តបង្កគ្រោះថ្នាក់ដោយ ខ្លួនឯងនេះ ម៉ាកហ៊ីយ៉ាន់ដាយ ពាក់ស្លាកលេខ កំពង់ចាម. MA.8759​ ជារថយន្តផ្ទុកទំនិញធុនធ្ងន់ដឹកសត្វជ្រូកបើកពីទិសខាងលិចទៅខាងកើតមានអ្នករួមចំនួន ១៣នាក់នៅក្នុងរថយន្ត។ នៅពេលដែលកំពុងបើកមកដល់ចំណុចកើតហេតុស្រាប់តែរថយន្តបានវេរចង្កូតទៅខាងស្តាំបុកនឹងបង្កាន់ដៃស្ពានពេញទំហឹងបណ្តាលឲ្យរថយន្តផ្លោងលើបង្កាន់ ដៃស្ពានជាប់ពាក់កណ្តាល ចំណែក្បាលរថយន្តបានធ្លាក់ទៅនឹងដីសង្កត់ស្លាប់អ្នករួមដំណើរម្នាក់ ចំនួន៦នាក់បានរងរបួសធ្ងន់ និង៦នាក់ទៀតរបួសស្រាល ត្រូវបានដឹកទៅសង្គ្រោះនៅមន្ទីរពេទ្យបង្អែក ក្រុងប៉ោយប៉ែត ចំណែកអ្នកបើកក្រោយពីកើតហេតុបានរត់គេចខ្លួនបាត់ស្រមោលតែម្តង ។

ក្រោយពីកើតហេតុហើយរថយន្តត្រូវបាននគរបាលជំនាញ ចរាចរណ៍ស្រុកអូរជ្រៅរៀបចំស្ទូចយកមកទុកនៅអធិការដ្ឋាន នគរបាលស្រុកអូរជ្រៅ ដើម្បីរកម្ចាស់និងអ្នកបើកចូលខ្លួនមកដោះស្រាយតាមច្បាប់នៅពេលខាងមុខនេះផងដែរ៕