អាជ្ញាធរខេត្តតែងតែបានយកចិត្តទុកដាក់ ប្រឹងប្រែងគិតគូរជំរុញការជួសជុលឡើងវិញ នូវរាល់ផ្លូវដែលរងការខូចខាតនៅតាម បណ្តាស្រុកក្រុងឃុំសង្កាត់ភូមិទូទាំងខេត្ត
ខេត្តរតនគិរី៖ ឯកឧត្តម ថង សាវុន អភិបាលខេត្តរតនគិរី នៅព្រឹកថ្ងៃសុក្រ ទី១៦ ខែតុលា ឆ្នាំ២០២០នេះ មានប្រសាសន៍ថា៖កន្លងមក អាជ្ញាធរខេត្តតែងតែបានយកចិត្តទុកដាក់ប្រឹងប្រែងគិតគូរជំរុញការជួសជុលឡើងវិញ នូវរាល់ផ្លូវដែលរងការខូចខាតនៅតាម បណ្តាស្រុក.ក្រុង.ឃុំ.សង្កាត់.ភូមិនៅទូទាំងខេត្តដោយកន្លែងខ្លះការស្ថាបនាឡើង ដោយចាក់បេតុង ក្រាលកៅស៊ូ និងខ្លះទៀតជួសជុលដោយក្រាលក្រួសក្រហម ទៅតាមលទ្ធភាពថវិកា ដែលយើងមានដើម្បីឆ្លើយតបសេចក្តីត្រូវការរបស់ប្រជាពលរដ្ឋ។
ការលើកឡើងរបស់អភិបាលខេត្តរតនគិរីរូបនេះ គឺក្នុងឱកាសដែលឯកឧត្តមដឹកនាំមន្ត្រីជំនាញនិងអង្គភាពជុំវិញខេត្តអញ្ជើញ ចុះពិនិត្យការជួសជុលថែទាំផ្លូវជាតិ៧៨Cប្រវែង២៨,៥២m តភ្ជាប់ត្រង់ចំណុចរង្វង់មូលស្រុកអូរជុំ ដល់ស្រុកវើនសៃ។
ឯកឧត្តមអភិបាលខេត្តបានបន្ថែមថា ជានិច្ចកាលរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជានាយរដ្ឋមន្ត្រី តែងផ្ដោតសំខាន់បន្តការយកចិត្តទុកដាក់លើការអភិវឌ្ឍវិស័យផ្លូវថ្នល់ក្នុងនោះមិនថា ផ្លូវជាតិ ផ្លូវលំនៅគ្រប់ទីកន្លែងនោះទេ ត្រូវបានស្ថាបនាពីតំបន់ដែលគ្មានផ្លូវ ទៅជាមានផ្លូវ ក្រាលគ្រួសក្រហម ប្រែក្លាយទៅជាផ្លូវបេតុង ឬកៅស៊ូផ្សារភ្ជាប់ពីទីជនបទមកទីប្រជុំជន ខេត្ត ស្រុក ក្រុង ដើម្បីឆ្លើយតបទៅនឹងអនុសាសន៍របស់សម្តេចតេជា គឺ “ មានផ្លូវមានក្តីសង្ឃឹម “។
ក្នុងឱកាសនោះ ឯកឧត្តម ថង សាវុន បានថ្លែងការកោតសរសើរដល់ដល់មន្ទីរសាធារណការ និងដឹកជញ្ជូនខេត្ត ដែលបានអនុវត្តតួនាទីភារកិច្ចបានទាន់ពេលវេលា តាមការណែនាំរបស់អាជ្ញាធរខេត្តនិងជំរុញឱ្យមន្ទីរសាធារណការនិងដឹកជញ្ជូន រួមសហការជាមួយអាជ្ញាធរដែនដី ត្រូវបន្តការយកចិត្តទុក ដាក់ពិនិត្យមើលផ្លូវថ្នល់ដែលរងការខូចខាត ត្រូវប្រញាប់ ប្រញាល់ធ្វើការជួសជុលឡើងវិញ មិនត្រូវទុកចាំដល់ខូចធ្ងន់ធ្ងរនោះទេ និងបានអំពាវនាវ ដល់ប្រជាពលរដ្ឋនៅទូទាំងខេត្ត សូមឱ្យចូលរួមទាំងគ្នាថែទាំផ្លូវថ្នល់ដែលបានជួសជុល ស្ថាបនាហើយនៅតាមមូលដ្ឋានឱ្យប្រើប្រាស់បានយូរអង្វែង។
បើតាមការបញ្ជាក់ពីលោក សាយ សាមាន ប្រធានមន្ទីរសាធារណការនិងដឹកជញ្ជូនខេត្ត បានឲ្យដឹងថា ឆ្នាំកន្លងមក ដោយសារមានភ្លៀងជោគជាំខ្លាំង ទើបបណ្តាលឲ្យផ្លូវជាតិ៧៨Cដែលជាផ្លូវក្រាលគ្រួសក្រហមនេះ បានទទួលរងការខូចខាតយ៉ាងដំណំជាហេតុពិបាកក្នុងធ្វើដំណើរទៅមករបស់ប្រជាពករដ្ឋទូទៅ។ លោកប្រធានមន្ទីរបន្តថា ដោយមានការគិតគូរយកចិត្តទុកដាក់ពីសំណាក់ឯកឧត្តម ថង សាវុន អភិបាលខេត្តបានឲ្យមន្ទីរសាធារណការនិងដឹកជញ្ជូនខេត្តធ្វើការជួសជុលថែទាំផ្លូវនេះ ដោយក្រាលគ្រួសក្រហម ដែលមានប្រវែង ២៨,៥២m ទទឹង ៩ម៉ែត្រ ដើម្បីសម្រួលដល់ធ្វើចរាចរណ៍ផ្លាស់ប្តូរពាណិជ្ជកម្មទៅមករបស់ប្រជាពលរដ្ឋបានងាយស្រួលឡើងវិញ ដោយប្រើប្រាស់ថវិការបស់ក្រសួងទម្លាក់ជូនមន្ទីរប្រមាណ ២.៥៧០លានរៀល។ លោកបន្តថា បច្ចុប្បន្ន ការជួលជុលថែទាំសម្រេចបានប្រមាណ ៨៦%ហើយ គ្រោងនឹងបញ្ចប់ឲ្យរួចរាល់នាពេលឆាប់ៗនេះ៕
