បង្ក្រាបកន្លែងលួចបើកល្បែងស៊ីសងអេឡិចត្រូនិច ក្នុងសង្កាត់ទន្លេបាសាក់
រាជធានីភ្នំពេញ៖ គណៈបញ្ជាការឯកភាពខណ្ឌចំការមន ដែលដឹកនាំដោយលោក កែវ សំណាង ជាអភិបាលរងខណ្ឌចំការមន បានដឹកនាំកម្លាំងកងរាជអាវុធហត្ថ, នគរបាល និងប្រជាការពារខណ្ឌជាច្រើននាក់ ឆ្មក់ចូលបង្ក្រាបកន្លែងលួចបើកល្បែងស៊ីសងអេឡិចត្រូនិចយីហោ មជ្ឈមណ្ឌលកំសាន្ត ហ៊ួយ ឈៀវ ដែលបង្កប់ល្បែងស៊ីសងខុសច្បាប់ ដោយបានដកហូតទូហ្គេមមួយចំនួនធំ និងធ្វើការឃាត់ខ្លួនប្រុសស្រីជាបុគ្គលិក រួមជានឹងភ្ញៀវចូលលេង ចំនួន ១២នាក់ផងដែរ ។
ប្រតិបត្តិការបង្ក្រាបល្បែងស៊ីសងខុសច្បាប់នេះ បានធ្វើឡើងកាលពីយប់ថ្ងៃទី០៥ ខែវិច្ឆិកា ឆ្នាំ២០២០ ដែលស្ថិតនៅក្នុងមជ្ឈមណ្ឌលពាណិជ្ជកម្ម Golden Street ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ក្រោយការបង្ក្រាប មជ្ឈមណ្ឌលកម្សាន្តមានបង្កប់ល្បែងស៊ីសងខុសច្បាប់ ត្រូវបានកម្លាំងគណៈបញ្ជាការឯកភាពខណ្ឌ ផ្អាកទីតាំងអាជីវកម្ម ហើយធ្វើការដកហូតទូហ្គេម និងឃាត់ខ្លួនអ្នកទាំង១២នាក់ យកមកធ្វើការអប់រំណែនាំដោយមានអាណាព្យាបាលមកធានាអោយត្រលប់ទៅវិញ ៕
