បុរសម្នាក់រត់តាក់ស៊ី បាត់ពីផ្ទះ៣ថ្ងៃ ស្រាប់តែប្រទះឃើញសាកសពហើមស្អុយនៅក្នុងរថយន្តចតលើចិញ្ចើមផ្លូវទៅវិញ

ភ្នំពេញ ៖ ហេតុការណ៍នេះបង្កឱ្យមានការភ្ញាក់ ផ្អើលនៅវេលាម៉ោង៧និង៣០នាទីព្រឹកថ្ងៃទី២៨ ខែធ្នូ ឆ្នាំ២០២០នេះ ស្ថិតតាមបណ្តោយផ្លូលេខ១៥ កែងផ្លូវលេខ២១៤ ក្នុងសង្កាត់បឹងរំាង ខណ្ឌដូនពេញ។
ជនរងគ្រោះមានឈ្មោះ នួន រ៉ាន អាយុ៥១ឆ្នាំ មុខរបរអ្នករត់តាក់ស៊ី ស្នាក់នៅផ្ទះលេខ១៤០ ផ្លូវលំ ភូមិសាងួន សង្កាត់កាកាបទី១ ខណ្ឌពោធិ៍សែនជ័យ។ តាមប្រភពពីក្រុមគ្រួសារ បានប្រាប់ឱ្យថា មូនពេលកើតហេតុ ជនរងគ្រោះបានបាត់ ខ្លួនចេញពីផ្ទះចំនួន ៣ថ្ងៃមកហើយ ហើយក្រុមគ្រួសារក៏ព្យាយាមទំនាក់ទំនងទូរស័ព្ទទៅជនរងគ្រោះដែរ តែជនរងគ្រោះមិនលើក ។

រហូតព្រឹកថ្ងៃទី២៨ ខែធ្នូ ឆ្នាំ២០២០ ទើបអ្នករត់តាក់ស៊ីដូចគ្នា ឃើញរថយន្តជនរងគ្រោះចតចោលនៅ​ចញ្ចើមផ្លូវ ក៏ចុះទៅមើល ស្រាប់តែឃើញជនរងគ្រោះអង្គុយស្លាប់ហើមស្អុយនៅក្នុងរថយន្តបាត់ទៅហើយ បង្កភាពភ្ញាក់ផ្អើល និងប្រាប់ដល់ក្រុមគ្រួសារឱ្យចុះមកទីតាំងកន្លែងកើតហេតុតែម្ដង។
ក្រោយពេលកើតហេតុ កម្លាំងសមត្ថកិច្ចមូលដ្ឋានរួមកម្លាំងសមត្ថកិច្ចជំនាញបានចុះមកធ្វើកោសល្យវិច័យ រួចធ្វើកំណត់ហេតុប្រគល់សពជនរងគ្រោះឱ្យក្រុមគ្រួសារយកទៅធ្វើបុណ្យតាមប្រពៃណី ៕