រាជរដ្ឋាភិបាលក្រើនរំឭកឱ្យពលរដ្ឋប្រុងប្រយ័ត្នពីគ្រោះថ្នាក់ចរាចរណ៍ក្នុងឱកាសឆ្លងឆ្នាំសកល
រាជរដ្ឋាភិបាល ក្រើនរំឭកពីគ្រោះថ្នាក់ចរាចរណ៍ ដែលអាចនឹងកើនឡើងខ្ពស់ ក្នុងឱកាសប្រជាពលរដ្ឋធ្វើដំណើរកម្សាន្តទៅតាមគោលដៅនានា នៅចុងសប្តាហ៍នៃដំណាច់ឆ្នាំ២០២០ ឆ្លងចូលឆ្នាំ២០២១នេះ។
លោកជំទាវ មឹន មាណវី រដ្ឋលេខាធិការ ក្រសួង សាធារណការ និងដឹកជញ្ជូន និងជាអគ្គលេខាធិការគណៈកម្មាធិការសុវត្ថិភាពចរាចរណ៍ផ្លូវគោក ព្រមានថា ក្នុងឱកាសនេះ កំណើនគ្រោះថ្នាក់ចរាចរណ៍ និងការកកស្ទះចរាចរណ៍ អាចនឹងកើនឡើងខ្ពស់ខុសប្រក្រតី ដែលកត្តានេះទាមទារឱ្យអ្នកបើកបរយានយន្ត ត្រូវប្រុងប្រយ័ត្ន និងមានការទទួលខុសត្រូវខ្ពស់។
ក្នុងឱកាសចុះផ្សព្វផ្សាយពីច្បាប់ចរាចរណ៍ផ្លូវគោក និងចែកមួកសុវត្ថិភាពដល់អ្នកធ្វើដំណើរតាមម៉ូតូនៅតាមបណ្តោយផ្លូវជាតិលេខ៦A នាព្រឹកថ្ងៃទី៣១ ខែធ្នូនេះ លោកជំទាវ បានណែនាំឱ្យអ្នកបើកបរយានយន្តទាំងអស់ប្រតិបត្តិនូវច្បាប់ចរាចរណ៍ឱ្យបានខ្ជាប់ខ្ជួនដូចជា ពាក់មួកសុវត្ថិភាពក្នុងពេលបើកបរ មិនត្រូវប្រើប្រាស់ទូរស័ព្ទក្នុងពេលបើកបរ មិនត្រូវប្រលែងគ្នាក្នុងពេលកាន់ដៃចង្កូត មិនត្រូវបើកបរក្នុងស្ថានភាពស្រវឹង និងមិនត្រូវបើកបរលើសល្បឿនកំណត់ ជាដើម។
លោក គឹម បញ្ញា នាយកប្រតិបត្តិអង្គការមូលនិធិបង្ការរបួសអាស៊ីប្រចាំកម្ពុជា គាំទ្រការលើកកម្ពស់សុវត្ថិភាពចរាចរណ៍នៅកម្ពុជា តាមរយៈការជំរុញការឣនុវត្តសកម្មភាពរួមគ្នា ការពង្រឹងការអនុវត្តច្បាប់ស្តីពីចរាចរណ៍ផ្លូវគោក ការផ្សព្វផ្សាយអប់រំឱ្យបានទូលំទូលាយ និងវិធានការផ្សេងៗទៀត។
លោកមានប្រសាសនថា ការរួមចំណែករបស់បណ្តាញ និងដៃគូពាក់ព័ន្ធ នឹងជួយដល់ប្រទេសកម្ពុជាបន្តសម្រេចបាននូវគោលដៅរបស់ខ្លួនក្នុងការកាត់បន្ថយចំនួនអ្នកស្លាប់ និងអ្នករងរបួសដោយសារគ្រោះថ្នាក់ចរាចរណ៍បានច្រើនចាប់ពីឆ្នាំ២០២០នេះ និងឆ្នាំជាបន្តបន្ទាប់ទៀត។ យោងតាមប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកនៅកម្ពុជា បានបង្ហាញថា អ្នកស្លាប់ក្នុងឱកាសពិធីបុណ្យសំខាន់ៗ ដោយសារគ្រោះថ្នាក់ចរាចរណ៍ តែងមាននិន្នាការកើនឡើងខុសពីថ្ងៃធម្មតា ដោយសារការ បើកបរ ហួសល្បឿនកំណត់ ការបើកបរក្នុងពេលស្រវឹង ការបើកបរមិន គោរពសិទ្ធិអាទិភាពនៅលើដងផ្លូវនិងការជែងក្នុងស្ថានភាពគ្រោះថ្នាក់ បើកបរប្រើប្រាស់ទូរស័ព្ទដៃ និងប្រើប្រាស់គ្រឿងស្រវឹងក្នុងពេលបើកបរ ជាដើម៕ by AKP
