ទើបវិលមកពីស្រុក ដើរស្វែងរកការងារធ្វើ មិនទាន់បានសម្រេចផង ប៉ះចំក្រុមទម្លាក់យោង ល្បួងបញ្ឆោតដោះយកគ្រឿងអលង្ការអស់រលីង សល់ទឹកភ្នែក
ភ្នំពេញ៖ ហេតុការណ៍នេះ បានកើតឡើង កាលពីវេលាម៉ោង៧និង៣០នាទីព្រឹកថ្ងៃទី២៥ ខែមករា ឆ្នាំ២០២១ នៅតាមផ្លូវបេតុង ក្នុងភូមិព្រៃសាលា សង្កាត់កាកាប២ ខណ្ឌពោធិ៍សែនជ័យ ។
មុនពេលកើតហេតុ ជនរងគ្រោះ បានដើរចេញពីផ្ទះជួល ដោយថ្មើរជើង ក្នុងបំណងឆ្ពោះទៅរោងចក្រ ដើម្បីធ្វើតេស្ត មានកាន់ទាំងឯកសារ មួយចំនួន មិនទាន់ដល់រោងចក្រផង ក៏ជួបជាមួយស្ត្រីជនសង្ស័យ សួរនាំរឿង មានគេបាត់កាបូបលុយ ទាក់ពាក្យទាក់សម្តី ល្បួងនាំជិះម៉ូតូ ដោយជនសង្ស័យគ្នា ៤នាក់ ប្រុស២នាក់ ស្រី២នាក់ ជិះម៉ូតូ ចេញដល់កន្លែងស្ងាត់ ដោះយកគ្រឿងអលង្ការ រួចឲ្យខ្សែក កាឡៃ បានសម្រេចហើយ ជនសង្ស័យ គេចខ្លួនបាត់អស់ ។
ប្រជាពលរដ្ឋ បានលើកឡើងថា សកម្មភាពបទល្មើសឆបោក (ទម្លាក់យោង) កើតឡើងតាំងពីទសវត្សរ៍ឆ្នាំ៨០ មកម្ល៉េះ ។
មកដល់ឆ្នាំ២០២១ ទៅហើយ នៅតែមាន អ្នកចិត្តលោភចង់បាន ត្រូវចាញ់ល្បិច ជនអស់ទាំងនេះទៀត មិនដែលនៅសុខៗ គេយកមាស យកលុយ មកចែកយើងនោះទេ បងប្អូនប្រជាពលរដ្ឋ គួរស្វែងយល់ ប្រុងប្រយ័ត្ន ជៀសវាងការបន្តចាញ់បោក តាមរយៈក្រុមឆបោកទាំងនេះទៀត ។
នារីរងគ្រោះ ក្រោយកើតហេតុ បានត្រឹមកាន់ខ្សែកកាឡៃ យកវិលត្រឡប់ទៅផ្ទះវិញ ដោយមិនបានទៅ ដាក់ពាក្យបណ្តឹង នៅប៉ុស្តិ៍នគរបាលឡើយ នារីរងគ្រោះ មានអាយុជាង ២០ឆ្នាំ ស្វែងរកការងារធ្វើស្នាក់នៅក្នុង ភូមិ-សង្កាត់ កើតហេតុ សម្ភារៈបាត់បង់ ខ្សែកប្លាទីន ១ខ្សែ កងដៃ ២ចិញ្ចៀន ២វង់ ចុងក្រោយបានត្រឹមថ្នូរជាខ្សែក កាឡៃ កាន់ទុកយកទៅបង្ហាញម៉ែ៕