រថយន្ដកុងទែន័រ រេចង្កូតចូលដូរលុយទាំងព្រឹកមាន់រងាវ បណ្ដាលឱ្យមានរបួសមនុស្ស និងខូតខាតរថយន្តសម្ភារៈផ្សេងៗ
ខេត្តកំពង់ស្ពឺ៖ កាលពីម៉ោង០៤ទាបភ្លឺ ថៃ្ងទី១២ ខែកុម្ភៈ ឆ្នាំ២០២១ នៅលើកំណាត់ផ្លូវជាតិលេខ៤ PK42+500 នៅចំណុចភូមិចំបក់ ឃុំវល្លិសរ ស្រុកសំរោងទង មានរថយន្ដ ១គ្រឿង ម៉ាកFUSO ពណ៌បៃតង ពាក់ស្លាកលេខ ភ្នំពេញ 3E-3936 សណ្ដោងសឺមីរ៉ឺម៉ក ពាក់ស្លាកលេខ ភ្នំពេញ 4A-5074 អ្នកបើកបរមិនស្គាល់អត្តសញ្ញាណ(រត់គេចខ្លួនក្រោយកើតហេតុ) បើកបរពីលិចទៅកើត មកដល់ចំណុចខាងលើបានបុករថយន្ដ១គ្រឿង ម៉ាកTUNDRA ពណ៌ស ពាក់ស្លាកលេខ ភ្នំពេញ 2AJ-7909 អ្នកបើកបរឈ្មោះ ថូម៉ាស់ ភេទប្រុស អាយុ៤៥ឆ្នាំ ជនជាតិជនបរទេស ស្នាក់នៅរាជធានីភ្នំពេញ ។
ក្នុងហេតុការណ៍គ្រោះថ្នាក់ខាងលេី ជនរងគ្រោះជាប់ក្នុងរថយន្ដ អ្នករួមដំណើរឈ្មោះ ឈិន ស្រីស្រស់ ភេទស្រី អាយុ២៥ឆ្នាំ រស់នៅភូមិភានសា ឃុំព្រះនិព្វាន ស្រុកគងពិសី ខេត្តកំពង់ស្ពឺ ត្រូវបានសមត្ថកិច្ចនគរបាល ជួយអន្ដរាគមន៍សង្រ្គោះបន្ទាន់ចេញពីក្នុងរថយន្ដ រួចបញ្ជូនទៅមន្ទីរពេទ្យ។
តាមរបាយការណ៍ជំនាញ រថយន្តសណ្ដោងសឺមីរឺម៉ក បើកបរបញ្ច្រាសទិស រេចង្កូតចូលទៅផ្នែកខាងឆ្វេង បុករថយន្ដដែលបេីកបញ្រ្ចាសទិសគ្នា រុញចូលទៅខាងក្នុងផ្ទះ វេរប្រាក់ Wing ។
បច្ចុប្បន្នមធ្យោបាយបង្ក យកមករក្សាទុកនៅអធិការដ្ឋាននគរបាលស្រុកសំរោងទង ដេីម្បីកសាងសំណុំរឿងចាត់ការតាមនីតិវិធី៕
