សត្វទន្សោងមួយក្បាលទម្ងន់ជិត ១តោន បាត់បង់ជីវិតដោយសារជាប់អន្ទាក់ព្រានព្រៃចង្រៃ

ខេត្តព្រះវិហារ៖ ប្រភេទសត្វទន្សោងព្រៃ ដែលជាសត្វកម្រមួយក្បាល ត្រូវបានមន្ត្រីឧទ្យាននុរក្សប្រទះឃើញដេកងាប់នៅក្នុងព្រៃមួយកន្លែង នៅក្នុងភូមិសាស្ត្រភូមិសែនរុងរឿងបី ឃុំមរតក ស្រុកជាំក្សាន្ត ខេត្តព្រះវិហារ ដោយសារតែជាប់អន្ទាក់ព្រានព្រៃចង្រៃ។

បើតាមរបាយការណ៍របស់មន្ត្រីបរិស្ថាន បានបញ្ជាក់ឱ្យដឹងថា នៅរសៀលថ្ងៃទី១៩ ខែកុម្ភៈ ឆ្នាំ២០២១នេះ មន្ត្រីឧទ្យាននុរក្សប្រចាំស្នាក់ការចល័ត៩១ បានដើរល្បាតដល់ចំណុចអូតាអែក ក៏បានជួបប្រទះនូវសត្វទន្សោងមួយក្បាលដេកងាប់ ដោយសារជាប់អន្ទាក់របស់ព្រានព្រៃ។

តាមរបាយការណ៍ដដែល បានបញ្ជាក់បន្ថែមថា សត្វទន្សោងព្រៃដែលងាប់នេះ គឺមានសំបុរក្រហម ទម្ងន់ប្រហែល ១តោន បានជាប់អន្ទាក់ជើងខាងស្តាំដេកងាប់ប្រហែលមួយយប់ មួយថ្ងៃមកហើយ ត្រូវបានក្រុមការងារដឹកជញ្ជូនតាមរថយន្តយកមកកប់នៅស្នាក់ការបរិស្ថានអូរកក់។

ជុំវិញករណីសត្វទន្សោងមួយក្បាលដែលងាប់ដោសារជាប់អន្ទាក់របស់ព្រានព្រៃនេះ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ ក្រសួងបរិស្ថាន បានបញ្ជាក់ប្រាប់ថា ក្នុងនាមលោករដ្ឋមន្ត្រី សាយ សំអាល់ និងថ្នាក់ដឹកនាំក្រសួង ព្រមទាំងប្រជាពលរដ្ឋទាំងអស់ មានការសោកស្តាយចំពោះការបាត់បង់សត្វទន្សោងមួយក្បាលនេះ ដែលជាសត្វទន្សោង ប្រភេទសត្វកម្រនៅលើពិភពលោក។

មន្ត្រីជាន់ខ្ពស់រូបនេះ បានឱ្យដឹងថា សម្រាប់ឆ្នាំ២០២០ កន្លងទៅ អន្ទាក់ជិត៥ម៉ឺនអន្ទាក់ ត្រូវបានមន្ត្រីឧទ្យានុរក្សដោះចេញពីតំបន់ការពារនៅទូទាំងប្រទេស “អន្ទាក់គឺជាឃាតករលាក់មុខ” ដែលបានសម្លាប់សត្វព្រៃកម្ពុជាជាច្រើនរាប់មិនអស់។

លោក នេត្រ ភក្ត្រា បានឱ្យដឹងដែរថា តាមរបាយការណ៍សិក្សារបាយប្រជាជនសត្វទន្សោង នៅក្នុងប្រទេសកម្ពុជាមានចន្លោះពី២៧០០ទៅ៥៧០០ក្បាល។ ចំនួននេះបានធ្វើឱ្យប្រទេសកម្ពុជា ជាកន្លែងដែលមានវត្តមានសត្វទន្សោងច្រើនជាងគេនៅលើពិភពលោក ខណៈចំនួនសត្វទន្សោងសរុបនៅលើពិភពលោក ត្រូវបានគេប៉ានស្មានថាមានចន្លោះពី ៥ ៩០០ ទៅ ១១ ០០០ក្បាលតែប៉ុណ្ណោះ។ ប្រទេសថៃ និងប្រទេសឥណ្ឌូនេស៊ី ក៏មានចំនួនសត្វទន្សោងប៉ុន្មានរយក្បាលប៉ុណ្ណោះ។

អ្នកនាំពាក្យក្រសួងបរិស្ថានរូបនេះ បានដឹងទៀតថា សត្វទន្សោងជាប្រភេទសត្វកម្រជិតផុតពូជនៅលើពិភពលោក កម្ពុជាមានមោទនភាពណាស់ ដែលមានសត្វប្រភេទនេះនៅក្នុងទឹកដីខ្លួនច្រើន ដែលប្រជាពលរដ្ឋទាំងអស់គ្នាត្រូវតែចូលរួមការពារ និងអភិរក្សសត្វព្រៃឱ្យបានគង់វង្ស ដោយត្រូវលះបង់ចំពោះការជួញដូរសត្វព្រៃ ការបរិភោគសាច់សត្វព្រៃ និងកុំបរបាញ់សម្លាប់ និងចាប់សត្វព្រៃ៕