ឯកឧត្តម ប៉ែន កុសល្យ អភិបាលខេត្តឧត្តរមានជ័យ ដឹកនាំក្រុមការងារចុះសម្របសម្រួលបងប្អូនពលករដែលកំពុងធ្វើចត្តាឡីស័កនៅមណ្ឌលពហុកីឡដ្ឋានខេត្ត ឲ្យទៅបន្តធ្វើចត្តាឡីស័កតាមបណ្តាខេត្តដែលជាខេត្តសាមី
ខេត្តឧត្តរមានជ័យ៖ នាព្រឹកថ្ងៃព្រហស្បតិ៍ទី១១ ខែមីនា ឆ្នាំ២០២១ ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ ដឹកនាំក្រុមការងារចុះសម្របសម្រួលបងប្អូនពលករដែលកំពុងធ្វើចត្តាឡីស័កនៅមណ្ឌលពហុកីឡដ្ឋានខេត្ត ឲ្យទៅបន្តធ្វើចត្តាឡីស័កតាមបណ្តាខេត្តដែលជាខេត្តសាមីខ្លួនដែលមានពលករ ពលការិនី ចំនួន ៦០៩នាក់ ក្នុងនោះមានដូចជាខេត្តបាត់ដំបង ខេត្តបន្ទាយមានមានជ័យ ខេត្តពោធិសាធិ៍សាត់ ខេត្តកំពង់ឆ្នាំង ខេត្តកំពត ខេត្តសៀមរាប ខេត្តកំពង់ធំ ខេត្តត្បូងឃ្មុំ ខេត្តកំពង់ចាម និងខេត្តព្រៃវែង ដែលត្រូវប្រើប្រាស់រថយន្តសរុបចំនួន ៤៦គ្រឿង។
នៅក្នុងឱកាសចុះសម្របសម្រួល និងបែងចែកពលករទៅតាមបណ្ដាខេត្ត ឯកឧត្ដមអភិបាលខេត្ត បានមានប្រសាសន៍លើកឡើងថា ការដឹកជញ្ជូនបងប្អូនពលករដែលធ្វើចំណាកស្រុកពីប្រទេសថៃចូលមកប្រទេសកម្ពុជានៅពេលនេះ ដោយគោរពតាមអនុសាសន៍របស់សម្ដេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា ដែលបានសម្រេចឱ្យពលករអាចធ្វើចត្តាឡីស័កនៅតាមបណ្ដាខេត្តក្រោមការគ្រប់គ្រងរបស់រដ្ឋបាល ខេត្តរៀងៗខ្លួន។
ឯកឧត្តមអភិបាលខេត្ត បានអំពាវនាវដល់បងប្អូនពលករដែលបានធ្វើដំណើរទៅកាន់ខេត្តរបស់ខ្លួនតាមរយៈរថយន្តកងទ័ពនាពេលនេះ សូមបន្តការធ្វើចត្តាឡីស័កឱ្យបានគ្រប់១៤ ថ្ងៃ និងត្រូវអនុវត្តខ្ជាប់ខ្ជួននូវវិធានការអនាម័យ តាមការណែនាំរបស់មន្ត្រីសុខាភិបាល និងតាមដានការប្រែប្រួលនៃសុខភាពរបស់បងប្អូន ដោយត្រូវរាយការណ៍ជាបន្ទាន់ទៅដល់មន្ត្រីសុខាភិបាលដែលប្រចាំការ។ ឯកឧត្តមអភិបាលខេត្ត ក៏បានផ្តាំផ្ញើរដល់បងប្អូនពលករ ដែលត្រឡប់ទៅលំនៅដ្ឋានវិញ ត្រូវបន្តបង្កើនការប្រុងប្រយ័ត្នខ្ពស់ និងត្រូវចូលរួមជាមួយអាជ្ញាធរមូលដ្ឋាន ក្នុងអនុវត្តនូវវិធានការការពារ ទប់ស្កាត់ការឆ្លងរីករាលដាលនៃជំងឺកូវីដ-១៩ ដោយត្រូវអនុវត្តនូវវិធានការ “៣ការពារ និងបីកុំ” ដើម្បីការពារក្រុមគ្រួសារ និងសហគមន៍របស់បងប្អូន ឱ្យជៀសផុតពីការឆ្លងរីករាលដាលរាតត្បាតនៃជំងឺកូវីដ-១៩៕
