អាជ្ញាធរព្រះវិហារ ដំណើរការជួសជុលជណ្ដើរបុរាណខាងជើង នៃប្រាសាទព្រះវិហារ នៅថ្នាក់ទី២
ខេត្តព្រះវិហារ៖ នៅថ្ងៃ១៣កើត ខែជេស្ឋ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃចន្ទ ទី២៤ ខែឧសភា ឆ្នាំ២០២១ ក្រុមអ្នកអភិរក្ស និង ក្រុមការងារបច្ចេក ទេសរបស់គម្រោងអភិរក្ស និង ជួសជុលជណ្ដើរបុរាណខាងជើង នៃប្រាសាទព្រះវិហារ នាយកដ្ឋានរមណីយដ្ឋាន និងបុរាណវិទ្យានៃអាជ្ញាធរជាតិព្រះវិហារ បាននិងកំពុងបន្ដអភិរក្ស និងជួសជុលជណ្ដើរបុរាណ នៅថ្នាក់ទី២យ៉ាងមមាញឹក។
ការងារជួសជុលជណ្ដើរបុរាណខាងជើង នៃប្រាសាទព្រះវិហារ រួមមាន ការរៀបចំការដ្ឋានថ្មីនៅថ្នាក់ទី២ ការចុះលេខសម្គាល់ និងធ្វើបញ្ជីសារពើភណ្ឌឱ្យថ្មនីមួយៗ ទៅតាមស្រទាប់នីមួយៗ ការរុះរើថ្មធ្នាក់ដៃទាំងសងខាង និងកាំជណ្ដើរ ការសម្រង់ប្លង់រួមនៅថ្នាក់ទី២ ទាំងធ្នាក់ដៃខាងកើត ខាងលិច និងកាំជណ្ដើរ ការពិសោធន៍គ្រឹះដោយប្រើប្រាស់ឧបករណ៍ DCPT (Dynamic Cone Penetration Test) មុនពេលជួសជុល ដើម្បីលទ្ធភាពទ្រទ្រង់របស់គ្រឹះជណ្ដើរ ការព្យាបាលថ្មប្រេះធ្នាក់ដៃខាងកើតបានចំនួន ៣ដុំ ធ្នាក់ដៃខាងលិចបានចំនួន ៤ដុំ និងថ្មកាំជណ្ដើរបានចំនួន ១ដុំ ដោយស្វានតដាក់ស្នូលជាមួយកាវញី-ឈ្មោល ដើម្បីរក្សាគុណភាពថ្មឱ្យមានភាពរឹងមាំ បានប្រសើរឡើងវិញ។
