ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អញ្ជើញពិនិត្យមើលក្រុមការងារកងកម្លាំងចម្រុះ គ្រូពេទ្យ សម្របសម្រួលពិនិត្យសុខភាព ធ្វើតេសរហ័ស បងប្អូនត្រឡប់មកពីប្រទេសថៃ

ខេត្តបន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អមដំណើរដោយ លោកឧត្តមសេនីយ៍ទោ ឈុន ម៉ៅ មេបញ្ជាការងយោធភូមិភាគទី៥ មេបញ្ជាការទិសទី១ ថ្នាក់ដឹកនាំមន្ត្រីសុខាភិបាលខេត្ត កងកម្លាំងប្រដាប់អាវុធ បានអញ្ជើញពិនិត្យមើលក្រុមការងារកងកម្លាំងចម្រុះ គ្រូពេទ្យ សម្របសម្រួលពិនិត្យសុខភាព ធ្វើតេសរហ័ស បងប្អូនត្រឡប់មកពីប្រទេសថៃ នៅច្រកអូរបីជាន់ និងច្រកបឹងត្រកួន ដើម្បី​យកទៅធ្វើចត្តាឡីស័កបន្តនៅតាមមណ្ឌលចត្តាឡីស័ក និងករណីមានអ្នកវិជ្ជមានកូវីដ១៩ យកទៅកន្លែង​ព្យបាលនៅថ្ងៃទី១៣ ខែសីហា ឆ្នាំ២០២១ ។

ដោយសាររយៈពេល១៤ថ្ងៃមកនេះ បងប្អូនពលករដែលមកពីប្រទេសថៃ មិនអនុញ្ញាត្តអោយចូលមកក្នុងប្រទេសតាមសារាចរណែនាំរបស់រាជរដ្ឋាភិបាល ក្នុងថ្ងៃទី១៣ ខែសីហា ចាប់ផ្តើមបើកដំណើរការទទួលបងប្អូនមកពីប្រទេសតាមច្រកមួយចំនួនដែលបានរៀបចំក្រុមការងារប្រចាំក្នុងភូមិសាស្ត្រខេត្តបន្ទាយមានជ័យ ដូចជាច្រកអូរបីជាន់ ច្រកបឹងត្រកួន និងច្រកចំបក់ជាដើម គេសង្កេតឃើញមានបងប្អូនពលករបានត្រឡប់មកវិញ និងអ្នកមកមុនដែលស្នាក់នៅតាមព្រំដែន មានចំនួនច្រើនជាងសព្វមួយដង។

ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានបញ្ជាក់ថា ទោះបីជាបងប្អូនមកមានចំនួនច្រើនជាងធម្មតា តែក្នុងនាមគណៈបញ្ជការឯកភាពខេត្ត រួមជាមួយកងកម្លាំងទាំងអស់ មន្ត្រីសុខាភិបាល មន្ត្រីពាក់ព័ន្ធ បានរៀបចំត្រៀមលក្ខណៈទាំងអស់ ដើម្បីចាត់ចែងសម្របសម្រួលបងប្អូនពលករឲ្យបានល្អ តាមវិធានសុខាភិបាល និងបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលសម្តេចតែងគិតគូរខ្ពស់ចំពោះសុខទុក្ខប្រជាពលរដ្ឋទាំងអស់ គ្រប់កាលៈទេសៈ។