អភិបាលខេត្តសៀមរាប ចុះពិនិត្យស្ថានភាព និងសួរសុខទុក្ខប្រជាពលរដ្ឋ ក្នុងតំបន់ក្រហម និងនាំយកសម្ភារមួយចំនួនប្រគល់ជូនកងកម្លាំងមានសមត្ថកិច្ច ដើម្បីបង្ក្រាបអ្នកដែលល្មើសបំរាមក្នុងពេលបិទខ្ទប់ ក្នុងតំបន់ក្រហម
ថ្ងៃទី២២ ខែកញ្ញា ឆ្នាំ២០២១ ឯកឧត្តម ទៀ សីហា អភិបាលនៃគណៈអភិបាលខេត្ត បានចុះពិនិត្យស្ថានភាព និងសួរសុខទុក្ខរបស់ប្រជាពលរដ្ឋ ក្នុងតំបន់ក្រហម ព្រមទាំងប្រគល់សម្ភារដល់កងកម្លាំងមានសមត្ថកិច្ច ដើម្បីបង្ក្រាបអ្នកដែលល្មើសបម្រាបក្នុងពេលបិទខ្ទប់ ក្នុងតំបន់ក្រហម បន្ទាប់ពីរដ្ឋបាលខេត្តសៀមរាប បានសម្រេចដាក់សង្កាត់ទាំង៦ ក្នុងក្រុងសៀមរាប ជាតំបន់ក្រហម ដើម្បីកាត់ផ្តាច់នូវការឆ្លងរីករាលដាលដោយជំងឺកូវីដ-១៩ កាលពីថ្ងៃទី១៧ ខែកញ្ញា ឆ្នាំ២០២១។
ការចុះពិនិត្យស្ថានភាព សួរសុខទុក្ខ របស់ប្រជាពលរដ្ឋ ក្នុងតំបន់ក្រហម ឯកឧត្តអភិបាលខេត្ត បានអំពាវនាវដល់បងប្អូនប្រជាពលរដ្ឋ មានការយោគយល់ សហការល្អជាមួយនឹងអាជ្ញាធរមូលដ្ឋាន កុំចាកចេញពីលំនៅដ្ឋានរបស់ខ្លួន ហើយមានការអត់ធ្មត់ក្នុងរយៈពេលនេះ ដើម្បីកុំអោយមានការឆ្លងរាដាលនៃជំងឺដ៏កាចសាហាវមួយនេះនៅតែកើតមានឡើង ហើយប្រសិនបើបងប្អូនប្រជាពលរដ្ឋ ខ្វះខាតស្បៀងអាហារសូមផ្តល់ដំណឹងដល់មេភូមិ ឬចៅសង្កាត់ ដែលកំពុងស្នាក់នៅ។
ជាមួយគ្នានេះ ឯកឧត្តមអភិបាលខេត្ត ក៏ស្នើដល់ប្រជាពលរដ្ឋទាំងអស់ ចូលរួមអនុវត្តអោយបានខ្ជាប់ខ្ជួន តាមវិធានការនានា របស់ក្រសួងសុខាភិបាល ជាពិសេសវិធានការរបស់រាជរដ្ឋាភិបាល ៣កុំ ៣ការពារ ហើយត្រូវគិតថាអំណត់ក្នុងរយៈពេលខ្លី ដើម្បីកាត់ផ្តាច់ខ្សែចម្លងចេញពីសហគមន៍យើង នូវការឆ្លងរីករាលដាលដោយជំងឺកូវីដ-១៩ អោយមានប្រសិទ្ធភាព នៅក្នុងភូមិសាស្ត្រខេត្តសៀមរាប កុំអោយមានការឆ្លងរីករាលដាលដល់អ្នកដទៃ និងទៅតំបន់ផ្សេងៗទៀត។ គួររំលឹកផងដែរថា ការដាក់ជាតំបន់ក្រហមនេះ ដោយមូលហេតុបងប្អូនប្រជាពលរដ្ឋមួយចំនួនមិនសហការ មិនអនុវត្តតាមការណែនាំ មិនចេះការពារខ្លួន និងក្រុមគ្រួសាររបស់ខ្លួន បន្តនាំឆ្លងដល់អ្នកដទៃ។
បន្ទាប់ពីសួរសុខទុក្ខបងប្អូនប្រជាពលរដ្ឋ ឯកឧត្តម អភិបាលខេត្តក៏ជួបសំណេះសំណាលជាមួយកម្លាំងដែលបានល្បាតនៅតំបន់ក្រហម ដោយណែនាំដល់កងកម្លាំងទាំងអស់ត្រូវអនុវត្តឱ្យបានម៉ឺងម៉ាត់ក្នុងការបង្ក្រាបដល់ជនណាដែលមិនបានចូលរួម និងល្មើសនូវវិធានការនៃការបិទខ្ទប់នេះ។
រដ្ឋបាលខេត្តសង្ឃឹមយ៉ាងមុតមាំថា បងប្អូននឹងចូលរួមជាមួយនឹងក្រសួង និងអាជ្ញាធរមានសមត្ថកិច្ចពាក់ព័ន្ធ ដើម្បីរួមចំណែកក្នុងការប្រយុទ្ធប្រឆាំង ទប់ស្កាត់ និងកាត់ផ្តាច់ជំងឺកូវីដ-១៩ចេញពីសហគមន៍យើង ដើម្បីឱ្យសេដ្ឋកិច្ចគ្រួសារក៏ដូចជាសង្គមជាតិមានការរីកចម្រើនឡើងវិញ៕
