គណៈបញ្ជាការឯកភាពខេត្ត សង់បង្គោលព្រំ និងលើកផ្លាកប៉ាណូផែនទី ដីតំបន់៣ ព្រៃលិចទឹកនៃបឹងទន្លេសាប ក្នុងខេត្តបន្ទាយមានជ័យ
ខេត្តបន្ទាយមានជ័យ៖ អនុវត្តតាមបទបញ្ជារបស់សម្ដេចតេជោហ៊ុនសែននាយករដ្ឋមន្ត្រីនៃកម្ពុជាបានឲ្យ លោក ជា សុផារ៉ា ឧបនាយករដ្ឋមន្ត្រី និងរដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថផ្ទៃប្រទេស លោកសាយ សំអាល់ រដ្ឋមន្ត្រីក្រសួង បរិស្ថាន លោកវេង សាខុន រដ្ឋមន្ត្រីកុរសួងកសិកម្ម រុក្ខាប្រមាញ់និងនេសាទ បើកកិច្ចប្រជុំបន្ទាន់មួយស្តីពីក្រុមការងារថ្នាក់ជាតិចុះពិនិត្យព្រៃលិចទឹកតំបន់បឹងទន្លេសាបក្នុងតំបន់៣ ក្នុងភូមិសាស្ត្រខេត្តបន្ទាយមានជ័យ ។
លុះព្រឹក ថ្ងៃទី១៣ ខែធ្នូ ឆ្នាំ ២០២១ គណៈបញ្ជាការឯកភាពខេត្តបន្ទាយមានជ័យ ក្នុងនោះលោក អ៊ុំរាត្រី អភិបាលខេត្តបន្ទាយមានជ័យបានដឹកនាំកំលាំង កងរាជអាវុធហត្ថមួយក្រុមដឹកនាំដោយលោកឧត្តមសេនីយ៍ត្រី បោនប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ កម្លាំងនគរបាល១ក្រុម ដឹកនាំដោយ លោកឧត្តមសេនីយ៍ទោសិទ្ធិឡោះ ស្នងការនគរបាលខេត្តបន្ទាយមានជ័យ បានចុះត្រួតពិនិត្យការសាងសង់បង្គោលព្រំ និងលើកផ្លាកប៉ាណូផែនទី កំណត់ព្រំប្រទល់ដី តំបន់៣ ព្រៃលិចទឹក នៃបឹងទន្លេសាប ស្ថិតក្នុងភូមិសាស្រ្តខេត្តបន្ទាយមានជ័យ ចំនួន២គោលដៅ ៖
១. នៅចំណុចវាលអន្លក់ ស្ថិតក្នុងភូមិស្រណាល ឃុំសំបួរ ស្រុកមង្គលបូរី ខេត្តបន្ទាយមានជ័យ
២. នៅចំណុចអាងលីសំអាង ស្ថិតក្នុងភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ។
ឯកឧត្តម អ៊ុំ រាត្រី បានប្រាប់អ្នកយកព័ត៍មានឲ្យដឹងថា ដំណើរការកំណត់និងបែងចែកតំបន់គ្រប់គ្រង និងការរៀបចំផផែនការគ្រប់គ្រងតំបន់ការពារធម្មជាតិនេះពិតជាមានសារៈសំខាន់ណាស់ និងមានគោលបំណង ដើម្បីផ្តល់ចំណេះដឹង ទូលំទូលាយ និងចែករំលែកបទពិសោធន៍ អំពីវិធីសាស្ត្រ នៃការរៀបចំកំណត់បែងចែកតំបន់គ្រប់គ្រង និងរៀបចំផែនការ គ្រប់គ្រងសម្រាប់ប្រព័ន្ធតំបន់ការពារធម្មជាតិ និងផ្សព្វផ្សាយតាមរយៈការបង្កើនសមត្ថភាព ដល់មន្ត្រី តំបន់ការពារធម្មជាតិ និងស្ថាប័នពាក់ព័ន្ធ ដើម្បីឱ្យយល់ច្បាស់ពីដំណើរការ នៃការកំណត់បែងចែកតំបន់គ្រប់គ្រង និងរបៀបនៃការរៀបចំផែនការគ្រប់គ្រងតំបន់ការពារធម្មជាតិ និងចូលរួមគ្រប់គ្រងប្រកបដោយប្រសិទ្ធភាពខ្ពស់ផងដែរ ។
លោកអ៊ុំរាត្រីបានបញ្ជាក់ឲ្យដឹងបន្តទៀតថាអាជ្ញាធរមានសមត្ថកិច្ចគ្រប់លំដាប់ថ្នាក់ត្រូវយល់ឲ្យបានច្បាស់អំពីគោលការណ៍ណែនាំ ស្តីពីការកំណត់ និងការបែងចែកតំបន់គ្រប់គ្រងក្នុងតំបន់ការពារធម្មជាតិ មូលដ្ឋាននៃការធ្វើសារពើភ័ណ្ឌព្រៃឈើ ការសិក្សាស្រាវជ្រាវអំពីជីវចម្រុះ និងការប្រមូលទិន្នន័យសម្រាប់កំណត់បែងចែកតំបន់គ្រប់គ្រងក្នុងតំបន់ការពារធម្មជាតិ ព្រមទាំងតំបន់សហគមន៍ តំបន់ប្រើប្រាស់ដោយចីរភាព ជាពិសេសការផ្ទៀងផ្ទាត់ផែនទី ជាមួយចូលរួមក្នុងការអនុវត្ត ឲ្យបានត្រឹមត្រូវ និងសមស្របបំផុតផងដែរ៕ អរគុណសន្តិភាព
