ក្រោយពីបានធ្វើការស្រាវជ្រាវតាមប្រព័ន្ធស្វ័យប្រវត្តិកម្មចុះបញ្ជីយានយន្ត និងពិនិត្យលើសំណុំឯកសារពាក់ព័ន្ធ ក្រសួងសូមធ្វើការបំភ្លឺថារថយន្ត Hyundai Venue បានចុះបញ្ជីប្រើប្រាស់ស្លាកលេខស្របច្បាប់ ក្នុងឆ្នាំ ២០២១។ ក្រសួងសាធារណការ និងដឹកជញ្ជូន
ក្រសួងបានឱ្យដឹងកាលពីល្ងាចថ្ងៃសុក្រទី ២៤ ខែធ្នូថា ក្រោយពីបានធ្វើការស្រាវជ្រាវតាមប្រព័ន្ធស្វ័យប្រវត្តិកម្មចុះបញ្ជីយានយន្ត និងពិនិត្យលើសំណុំឯកសារពាក់ព័ន្ធ ក្រសួងសូមធ្វើការបំភ្លឺថារថយន្ត Hyundai Venue បានចុះបញ្ជីប្រើប្រាស់ស្លាកលេខស្របច្បាប់ ក្នុងឆ្នាំ ២០២១។
ក្រសួងបានបញ្ជាក់ថា៖ «រថយន្ត Lexus NX 200t ប្រើប្រាស់ស្លាកលេខក្លែងក្លាយ ផ្ទុយពីខ្លឹមសារច្បាប់ស្តីពីចរាចរណ៍ ផ្លូវគោក និងអនុក្រឹត្យស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ស្លាកលេខសម្គាល់ យានជំនិះ។ ករណីរថយន្ត Lexus NX 200t បំពាក់ស្លាកលេខក្លែងក្លាយខាងលើ ក្រសួងសាធារណការ និងដឹកជញ្ជូន បានធ្វើការជូនដំណឹងទៅអាជ្ញាធរមានសមត្ថកិច្ចពាក់ព័ន្ធរួមមាន អគ្គស្នងការដ្ឋាននគរបាលជាតិ អគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានពន្ធដារ ដើម្បីចាត់វិធានការតាមផ្លូវច្បាប់»។
ក្រសួងក៏បានជម្រាបជូនសាធារណជនផងដែរថា ការចុះបញ្ជីយានយន្តរបស់ក្រសួងសាធារណការ និងដឹកជញ្ជូន គឺត្រូវបានធ្វើឡើងតាមប្រព័ន្ធស្វ័យប្រវត្តិកម្មដំណើរការផ្ទៀងផ្ទាត់ភាពត្រឹមត្រូវដោយស្វ័យប្រវត្តិ ធានាមិនឱ្យមានការចុះបញ្ជីចេញស្លាកលេខស្ទួន ឬយានយន្តចុះបញ្ជីដោយគ្មានការបង់ពន្ធនាំចូល ព្រមទាំងមាន QR Code សម្រាប់ស្កេនផ្ទៀងផ្ទាត់គល់បញ្ជីជាសាធារណៈនៅលើស្លាកលេខ និងបណ្ណសម្គាល់យានយន្ត ថែមទៀតផង។
ក្រសួងបានអំពាវនាវថា ដើម្បីអាចដឹងថាយានយន្តមានចុះបញ្ជីបំពាក់ស្លាកលេខមាន QR Code ត្រឹមត្រូវ ឬក្លែងក្លាយ សូមសាធារណជន និងបណ្តាញសារព័ត៌មានចូលរួមស្វែងយល់ និងផ្សព្វផ្សាយសេចក្តីជូនដំណឹងចុះថ្ងៃទី ២៥ ខែកញ្ញា ឆ្នាំ ២០១៧ ស្តីពីវិធីផ្ទៀងផ្ទាត់ភាពត្រឹមត្រូវនៃបណ្ណសម្គាល់យានយន្ត បណ្ណបើកបរយានយន្ត វិញ្ញាបនបត្រ និងលតាបត្រត្រួតពិនិត្យលក្ខណៈបច្ចេកទេសយានយន្ត និងស្លាកលេខយានយន្តមាន QR Code។
ក្រសួង និងអាជ្ញាធរពាក់ព័ន្ធនឹងបន្តជំរុញការផ្សព្វផ្សាយដល់សមត្ថកិច្ចអនុវត្តច្បាប់ពាក់ព័ន្ធ និងសាធារណជនពីវិធីផ្ទៀងផ្ទាត់ភាពត្រឹមត្រូវនៃរាល់ឯកសារពាក់ព័ន្ធនឹងយានយន្ត និងបណ្ណបើកបរឱ្យបានទូលំទូលាយ ដើម្បីកាត់បន្ថយ និងឈានទៅរកការលុបបំបាត់ ការក្លែងបន្លំ ឯកសារសាធារណៈ និងធានាសន្តិសុខសណ្តាប់ធ្នាប់សង្គម ជាពិសេសការពារបងប្អូនប្រជាពលរដ្ឋពីភាពងាយរងគ្រោះដោយសារក្រុម ឬបុគ្គលទុច្ចរិត។
ក្រសួងក៏បានណែនាំឱ្យពលរដ្ឋទាំងអស់ត្រូវយករថយន្តរបស់ខ្លួនទៅធ្វើការចុះបញ្ជីបំពាក់ស្លាកលេខឱ្យបានស្របច្បាប់ មុននឹងយកទៅប្រើប្រាស់ និងសូមចៀសវាងការប្រើប្រាស់ យានយន្តដោយមិនបានចុះបញ្ជីបំពាក់ស្លាកលេខសម្គាល់ស្របច្បាប់ ឬបំពាក់ស្លាកលេខសម្គាល់ក្លែងក្លាយ ដូចករណីខាងលើ៕
