ឯកឧត្តម ម៉ែន វិបុល អភិបាលខេត្តស្វាយរៀង អញ្ជេីញដឹកនាំកិច្ចប្រជុំត្រួតពិនិត្យការងារសាងសង់ស្ថានីយ៍បូមទឹកឆៅ របស់អង្គភាពរដ្ឋាករទឹក មានទីតាំងស្ថិតនៅក្នុងអាងទន្លេវ៉ៃគោ សង្កាត់ពោធិតាហោ ក្រុងស្វាយរៀង
នាព្រឹកថ្ងៃពុធ ទី២៩ ខែធ្នូ ឆ្នាំ២០២១នេះ នៅសាលប្រជុំព្រៃបាសាក់ អគារ ខ សាលាខេត្ត ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជេីញដឹកនាំកិច្ចប្រជុំត្រួតពិនិត្យការងារសាងសង់ស្ថានីយ៍បូមទឹកឆៅ របស់អង្គភាពរដ្ឋាករទឹក មានទីតាំងស្ថិតនៅក្នុងអាងទន្លេវ៉ៃគោ សង្កាត់ពោធិតាហោ ក្រុងស្វាយរៀង ខេត្តស្វាយរៀង។
កិច្ចប្រជុំនេះមានការអញ្ជេីញចូលរួមពីឯកឧត្តមអភិបាលរងខេត្ត លោកប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្ត លោកប្រធានមន្ទីរធនធានទឹក និងឧតុនិយមខេត្ត លោកប្រធានមន្ទីរសាធារណការ និងដឹកជញ្ជូនខេត្ត លោកប្រធានមន្ទីរព័ត៌មានខេត្ត លោកអភិបាលក្រុងស្វាយរៀង លោកអនុប្រធានអង្គភាពរដ្ឋាករទឹកខេត្ត និងមន្ត្រីពាក់ព័ន្ធមួយចំនួនទៀត។
សូមជម្រាបជូនថា ដើម្បីធានាបាននូវនិរន្តរភាពក៏ដូចជាការបំពេញសេចក្តីត្រូវការលេីការប្រើប្រាស់ទឹកស្អាត នៅក្នុងក្រុងស្វាយរៀង និងតំបន់ជាយក្រុង ឲ្យបានគ្រប់គ្រាន់ តាមសំណូមពររបស់ប្រជាពលរដ្ឋ រដ្ឋបាលខេត្តស្វាយរៀង ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាននិងកំពុងអនុវត្តគម្រោងផ្គត់ផ្គង់ទឹកស្អាតទីប្រជុំជន លេខ ៣២៣២ ឥណទានសម្បទានរបស់ធនាគារអភិវឌ្ឍន៍អាស៊ី (ADB) និងបដិភាគរបស់រាជរដ្ឋាភិបាលកម្ពុជា ដែលក្នុងនោះរួមមានការសាងសង់ប្រព័ន្ធប្រព្រឹត្តកម្មទឹកស្អាតថ្មីបន្ថែម ការពង្រីកបណ្តាញចែកចាយ និងស្ថានីយ៍បូមទឹកឆៅ មួយកន្លែងនេះស្ថិតនៅក្នុងអាងទន្លេវ៉ៃគោ ស្ថិតនៅខាងជើងទ្វារទឹកស្ពានតាហោ សង្កាត់ពោធិតាហោ ក្រុងស្វាយរៀង ខេត្តស្វាយរៀង។
ចំពោះការសាងសង់ស្ថានីយ៍បូមទឹកឆៅនេះ ត្រូវការចាក់អាចម៍ដីបំពេញជាបណ្តោះអាសន្នប៉ុណ្ណោះ ដើម្បីសម្រួលដល់ការដឹកជញ្ជូនសម្ភារៈចូលក្នុងការដ្ឋាន និងការបុកគ្រឹះស្ថានីយ៍បូមទឹកឆៅ (intake) បានត្រឹមត្រូវ តាមលក្ខណៈបច្ចេកទេស។ ចំពោះអាចម៍ដី ដែលបានចាក់ចូល ទៅក្នុងទន្លេ សម្រាប់បម្រើឱ្យការដ្ឋានខាងលើ នឹងត្រូវយកចេញវិញទាំងអស់ នៅពេលដែលការដ្ឋាន ត្រូវបានបញ្ចប់ ១០០%៕
