ធ្លាប់តែឮពាក្យប្រដូច រថភ្លើងបុកគ្នា គឺ ប្រពន្ធដើម និងប្រពន្ធបន្ទាប់ឈ្លោះគ្នា ថ្ងៃនេះចំឡែក រថភ្លើង២ខ្សែបុកគ្នា លាន់ដូចរន្ទះក្រឡាប់ផ្ងារជើងនៅក្រុងព្រះសីហនុ បណ្តាលឲ្យតៃកុងម្នាក់រងរបួស

ខេត្តព្រះសីហនុ៖ តាមប្រភពសមត្ថកិច្ចឲ្យដឹងថា ករណី គ្រោះថ្នាក់ចរាចរណ៍ផ្លូវដែកនេះបានកើតឡើងក្នុង ទិសដៅផ្ទុយគ្នា នាវេលាម៉ោងជាង១២ថ្ងៃត្រង់ថ្ងៃ២៥ ខែមករា ឆ្នាំ២០២២ ត្រង់ចំណុចភូមិ១ សង្កាត់លេខ​៣ ក្រុងព្រះសីហនុ ។

យោងតាមរបាយការណ៍បឋមពីសមត្ថកិច្ចបានឲ្យដឹងថា៖ មានរថភ្លើង បុកជាមួយរថភ្លើង បណ្តាលឲ្យទូររថភ្លើងមួយចំនួនបានក្រឡាប់ធ្លាក់ និងមានសេចក្តីរាយការណ៍បន្ត មានមនុស្សម្នាក់ដែលជាអ្នកបើកបររថភ្លើងបានរងរបួស ប៉ុន្តែមិនធ្ងន់ធ្ងរដែលធ្វើឲ្យប៉ះពាល់ដល់អាយុជីវិតនោះទេ។

ព័ត៌មានបឋមពីសមត្ថកិច្ចឲ្យដឹងថា រថភ្លើង២ខ្សែនេះ បើកបរទិសដៅបញ្ច្រាសគ្នា ក្នុងនោះម្ខាងមកពីភ្នំពេញ ឯម្ខាងទៀតចេញពីស្ថានីយ៍ក្រុងព្រះសីហនុ បានបុកគ្នាពេលកំពុងបើកបរលើផ្លូវដែក។

ភ្លាមៗនោះ គេនៅមិនទាន់ដឹងពីមូលហេតុអំពីការបុកគ្នារវាងរថភ្លើងទាំង២ខ្សែនេះនៅឡើយទេ ក្នុងនោះ ក្រោយកើតហេតុ សមត្ថកិច្ចបានចុះទៅពិនិត្យជួយសម្រួលនិងបន្តដោះស្រាយតាមនីតិវិធី ៕ អរគុណសន្តិភាព