លោកជំទាវកិត្តិសង្គហបណ្ឌិត ម៉ែន សំអន ចែកអំណោយសប្បុរសធម៌ជូនប្រជាពលរដ្ឋចំនួន ១.០០០ គ្រួសារ នៅខេត្តកំពត

ខេត្តកំពត៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា ព្រឹទ្ធសភា និងអធិការកិច្ច បានចុះជួបសំណេះសំណាលជាមួយប្រជាពលរដ្ឋចំនួន ១០០០គ្រួសារ គ្រាដែលមកទទួលស្បៀងពីរដ្ឋបាលខេត្តកំពត នាព្រឹកថ្ងៃសុក្រ ២រោច ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី១៨ ខែកុម្ភៈ ឆ្នាំ២០២២ នៅសាលាខេត្តកំពត ដោយក្នុងមួយគ្រួសារៗ​ទទួលបានអង្ករ១០គីឡូក្រាម និងទឹកត្រី ១ដប ។

លោកជំទាវក៏បានមានប្រសាសន៍ថា ៖ ការជួបជុំនាថ្ងៃនេះ គឺយើងទាំងអស់គ្នាកំពុងស្ថិតនៅក្នុងស្ថានភាពប្រទេសមានសុខសន្តិភាព ដែលបានកើតចេញពីនយោបាយ ឈ្នះ ឈ្នះ របស់សម្តេចអគ្គមហាសេនាបតី​តេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ។

អំណោយជាសប្បុរសធម៌ ក៏ជាសិល្បៈនៃការចែករំលែក ហើយក៏ជាផ្នែកមួយនៃយុទ្ធសាស្ត្រ នៃការគិតគូររបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត លើជីវភាពរស់នៅប្រចាំថ្ងៃរបស់ប្រជាពលរដ្ឋទូទៅ ដោយមិនទុកឲ្យប្រជាពលរដ្ឋណាម្នាក់ស្លាប់ដោយសារដាច់ស្បៀងដែលយើងមិនបានដឹងនោះឡើយ ។

ដោយឡែកនៅក្នុងខេត្តកំពត បើតាមផែនការដែលរដ្ឋបាលខេត្តបានកំណត់ គឺការចែកស្បៀងនេះ ជារៀងរាល់ ៣ដង ក្នុងមួយសប្តាហ៍ គឺថ្ងៃ ច័ន្ទ ពុធ និងថ្ងៃសុក្រ ។

ទន្ទឹមនឹងនេះ លោកជំទាវកិត្តិសង្គហបណ្ឌិត បានមកនូវការផ្តាំផ្ញើរពីសំណាក់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់ប្រជាពលរដ្ឋដែលបានមកទទួលស្បៀងថ្ងៃនេះ និងបានផ្តាំផ្ញើរឲ្យប្រជាពលរដ្ឋបន្តអនុវត្តនូវវិធានការបីកុំ និងបីការពារ ឲ្យបានជាដាច់ខាត ដើម្បីការពារសុខភាពខ្លួនយើង គ្រួសារយើង សហគមន៍យើង និងប្រទេសជាតិយើង ចាកផុតពីជម្ងឺឆ្លងកូវីដ-៩ ។