អាវុធហត្ថក្រុងឃាត់ខ្លួនយុវជន៣នាក់ជិះម៉ូតូ ២គ្រឿង ដាក់ដាវកែច្នៃ១ដើមតាមខ្លួន ពេលណាជួបគូរសត្រូវ ត្រូវប្រយុទ្ធតតាំង
ខេត្តបន្ទាយមានជ័យ៖ យុវជនសម័យឥឡូវមិនធម្មតា គ្រាន់តែជិះម៉ូតូដើរលេងនៅពេលយប់សោះ ក៏មានដាក់ដាវកែច្នៃតាមខ្លួន ពេលណាជួបនឹងគូសត្រូវ ត្រូវប្រយុទ្ធតតាំង មិនឲ្យចាញ់គូរសត្រូវឡើយ ស្របពេលនោះកំលាំងអាវុធហត្ថ ដឹកនាំដោយលោកវរសេនីយ៍ត្រី យ៉ាន់ សុវណ្ណ មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានចុះល្បាតការពារ និងរក្សាសន្តិសុខ សណ្ដាប់ធ្នាប់ជូនប្រជាពលរដ្ឋក្នុងភូមិសាស្រ្តក្រុងសិរីសោភ័ណរហូតដល់វេលាម៉ោង១២យប់និង១០នាទី ឈានចូលថ្ងៃទី១៣ ខែមីនា ឆ្នាំ២០២២ បានប្រទះឃើញយុវជនទាំង៣នាក់នេះដូចកំពុងធ្វើសកម្មភាពអ្វីមួយ ដោយមានការសង្ស័យ សមត្ថិកច្ចបានធ្វើការសួរនាំ រួចឆែកក្នុងខ្លួនរកឃើញកាំបិតកែឆ្នៃ១ដើម នៅចំណុចសួនមានជ័យ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យហើយបញ្ជូនមកមូលដ្ឋានកងរាជអាវុធហត្ថក្រុងដើម្បីសួរនាំ ។
លោកវរសេនីយ៍ត្រី យ៉ាន់ សុវណ្ណ បានប្រាប់អ្នកយកព័ត៌មានយើងឲ្យដឹងថា ជនសង្ស័យទាំង៣នាក់ មាន ១-ឈ្មោះ សុភាព រក្សា ភេទប្រុស អាយុ២៣ឆ្នាំ រស់នៅភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ២-ឈ្មោះ តែម ចាន់ភិគុណ ហៅ ពៅ ភេទប្រុស អាយុ១៧ឆ្នាំ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ៣-ឈ្មោះ វី សាវង់ ហៅ វ៉ាវ ភេទប្រុស អាយុ១៧ឆ្នាំ រស់នៅភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ត្រី យ៉ាន់ សុវណ្ណ បានបញ្ជាក់ឲ្យដឹងបន្តទៀតថា ជនសង្ស័យទាំង៣នាក់ ក្រោយពីកម្លាំងជំនាញសួរនាំរួចមក បានឆ្លើយសារភាពថា ពួកខ្លួនបាននាំគ្នាជិះម៉ូតូចំនួន២គ្រឿងមកហូបអីនៅសួនមានជ័យ និងអង្គុយលេងនៅក្នុងបរិវេណសួន ចំពោះដាវកែច្នៃ១ដើមនោះ ពួកខ្លួនដាក់មកដើម្បីការពារខ្លួន ពេលមានសត្រូវប៉ុនប៉ងសម្លាប់។គួរបញ្ជាក់់ថា យុជនទាំង៣នាក់ ពេលធ្វើតេស្តទឹកនោមរកឃើញមានវិជ្ជមានថ្នាំញៀនទាំង៣នាក់ និងបានបញ្ជូនមកទីបញ្ជាការដ្ឋានកងរាជអាវុធហត្ថខេត្តចាត់ការបន្ត ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឲ្យដឹងថា ការឃាត់ខ្លួនជនសង្ស័យទាំង៣នាក់ដោយមានការអនុញ្ញាតពីលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្ដម កើត វណ្ណារ៉េត ព្រះរាជអាជ្ញាអមសាលាដំបូងខេត្តជនសង្ស័យបានបញ្ជូនទៅតុលាការដើម្បីដាក់ទោសទៅតាមផ្លូវច្បាប់ហើយ៕ អរគុណសន្តិភាព