ជនពិការ៤៥៦នាក់ ទទួលបានជើង និងដៃសិប្បនិម្មិតថ្មី ពីក្រុមគ្រូពេទ្យនៃសមាគមប្រឹក្សាសុខភាពប្រជាជន-ក្រុមគ្រូពេទ្យសហរដ្ឋអាមេរិក-វៀតណាម
នៅខេត្តព្រះវិហារ នាថ្ងៃសុក្រ ទី២៤ ខែមិថុនា ឆ្នាំ២០២២ លោកជំទាវ ហ៊ាង ដារ័ត្ន តំណាង ឯកឧត្តម សួស យ៉ារ៉ា ប្រធានគណៈកម្មការទី ៥ នៃរដ្ឋសភា និងជាអ្នកតំណាងរាស្រ្តមណ្ឌលខេត្តព្រះវិហារ បានអញ្ជើញចូលរួមថ្លែងអំណរគុណក្នុងកម្មវិធីធ្វើដៃជើងសិប្បនិម្មិតដោយមិនគិតថ្លៃជូនដល់បងប្អូនប្រជាពលរដ្ឋទូទៅ ក្នុងនោះដែរក៏មានការអញ្ជើញចូលរួមពីថ្នាក់ដឹកនាំនិងអាជ្ញាធរពាក់ពន្ធ័នៅក្នុងខេត្តមានដូចជា លោកជំទាវ ប៉ាង រ៉ាវី អភិបាលរងខេត្តព្រះវិហារ តំណាងដ៏ខ្ពង់ខ្ពស់ឯកឧត្តម ប្រាក់ សុវណ្ណ អភិបាលគណៈអភិបាលខេត្តព្រះវិហារ ឯកឧត្តមវេជ្ជបណ្ឌិត គួង ឡូ ប្រធានមន្ទីរសុខាភិបាលខេត្តព្រះវិហារ ឯកឧត្តមវេជ្ជបណ្ឌិត ហ៊ាន សុខនាង ជំនួយការផ្ទាល់សម្តេចវិបុលសេនាភក្តី សាយ ឈុំប្រធានព្រឹទ្ធសភា និងជាប្រធានសមាគមប្រឹក្សាសុខភាពប្រជាជន។
កម្មវិធីនេះបានចាប់ផ្តើមពីតាំងពីថ្ងៃទី១២ ដល់ថ្ងៃទី២៤ ខែមិថុនា ឆ្នាំ២០២២ នៅក្នុងការិយាល័យអ្នកតំណាងរាស្រ្តមណ្ឌលខេត្តព្រះវិហារ ក្រោមការសហការគ្នារវាងក្រុមគ្រូពេទ្យនៃសមាគមប្រឹក្សាសុខភាពប្រជាជន និងក្រុមគ្រូពេទ្យសហរដ្ឋអាមេរិកនិងវៀតណាមមកពីសាកលវិទ្យាល័យ Mercer University បានធ្វើដៃជើងសិប្បនិម្មិតថ្មីចំនួន ៤៥៦នាក់ ក្នុងនោះប្រុស ៤០៣នាក់ ស្រី ៥៣នាក់ ពិការជើងចំនួន ៣៩៨នាក់ និងពិការដៃ ៥៨នាក់ ហើយត្រូវបានធ្វើឡើងជូនដល់ប្រជាពលរដ្ឋដែលមកពីបណ្តាខេត្តក្រុងមានដូចជា ព្រះវិហារ កំពង់ធំ សៀមរាប ក្រចេះ កំពត ស្ទឹងត្រែង បាត់ដំបង ឧត្តរមានជ័យ ត្បូងឃ្មុំ ខេត្តកណ្តាល ខេត្តព្រះសីហនុ និង រាជធានីភ្នំពេញ។
បន្ទាប់ពីទទួលបាននូវដៃជើងសិប្បនិម្មិតថ្មីរួចមក បងប្រុសម្នាក់ដែលជាអតីតទាហ៊ានការពារព្រំដែនដែលមានគ្រោះថ្នាក់ដាច់ជើងទាំងសងខាងបានបង្ហាញពីអារម្មណ៍រំភើបរបស់គាត់លាយឡំជាមួយនិងទឹកភ្នែកថា គាត់មិនដែលបានដើរដោយជើងទាំង២ នេះរយៈពេល ១២ឆ្នាំមកហើយ។ ចំណែកឯលោកពូម្នាក់ទៀតជាកសិករហើយបានរងគ្រោះថ្នាក់ជាន់គ្រាប់មីនដូចគ្នានៅពេលដែលចូលទៅភ្ជួររាស់ដីដាំកសិកម្មបានសំដែងពីអារម្មណ៍របស់គាត់ថារយៈពេល ៣០ឆ្នាំ ហើយដែលគាត់ពិការដោយសារតែគាត់បានជាន់គ្រាប់មីនដែលបន្សល់ទុកពីសម័យសង្គ្រាមនេះ
រីឯកុមារាម្នាក់ដែលរងគ្រោះពិការជើងដោយសារគ្រោះថ្នាក់ចរាចរណ៍និងកុមារីម្នាក់ទៀតរងគ្រោះថ្នាក់ដាច់ដៃខាងស្តាំដោយសារតែគ្រឿងម៉ាសុីននាក់ទាំង២ បានសម្តែងនូវទឹកចិត្តសប្បាយរីករាយជាមួយគ្នាថា ពេលនេះគាត់អាចដើរទៅរៀនដោយមិនចាំបាច់ប្រើឈើច្រត់និងដៃរបស់គាត់អាចចាប់កាន់វត្ថុផ្សេងៗទៀតបានវិញហើយ។ ដោយសារតែបានគុណបុណ្យបារមីដ៏ឧត្តុងឧត្តមរបស់ព្រះមហាក្សត្រ នៃព្រះរាជាណាចក្រកម្ពុជា និងក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងការផ្តួលរលំរបបប្រល័យពូជសាសន៍ប៉ុលពតនិងឈានទៅដល់ការបង្រួបបង្រួមជាតិទាំងស្រុងក្រោមគោលនយោបាយឈ្នះឈ្នះហើយបានដឹកនាំប្រទេសអោយមានសុខសន្តិភាពការអភិវឌ្ឍន៍និងភាពរីកចំរើនដូចសព្វថ្ងៃនេះ។
ជាចុងក្រោយលោកជំទាវ ហ៊ាង ដារ័ត្ន សួស យ៉ារ៉ា បានរៀបចំកម្មវិធីពិសាអាហារសាមគ្គីតាមបែបប្រពៃណីខ្មែរ ដើម្បីថ្លែងអំណរគុណជូនដល់ក្រុមគ្រូពេទ្យកម្ពុជា និងក្រុមគ្រូពេទ្យនៃសាកលវិទ្យាល័យ Mercer University ក្នុងដំណើរនិវត្តន៍ត្រលប់ទៅសហរដ្ឋអាមេរិកវិញ ហើយក្នុងឱកាសនោះផងដែរ លោកវេជ្ជបណ្ឌិត Han Van Vo ជាប្រធានដឹកនាំក្រុមគ្រូពេទ្យបានបង្ហាញពីចំណាប់អារម្មណ៍ថា ក្រោយពីឃើញស្នាមញញឹមរបស់បងប្អូនជនពិការដែលទទួលបានដៃជើងសិប្បនិម្មិតថ្មីនេះមក លោកនិងក្រុមការងារគឺមានសេចក្តីរំភើបឥតឧបមា ហើយសន្យាថា នឹងវិលត្រលប់មកវិញជាថ្មីម្តងទៀតនៅពេលវេលាមួយសមស្រប ប្រសិនបើមានតម្រូវការចាំបាច់។ ខេត្តព្រះវិហាររីករាយទទួលស្វាគមន៍បងប្អូនដែលមកពីបណ្តារាជធានីខេត្តផ្សេងទៀតក្នុងការមកទទួលយកការព្យាបាលរបស់ក្រុមគ្រូពេទ្យកម្ពុជា វៀតណាម និងសហរដ្ឋអាមេរិកក្នុងឱកាសក្រោយៗទៀត ។
