ភ្នំពេញ៖ ពិតជាគ្រោះថ្នាក់ណាស់ ដោយការធ្វេសប្រហែសរបស់ម្ចាស់ម៉ៅការសាងសង់ នៅព្រឹកថ្ងៃទី៨ ខែសីហា ឆ្នាំ២០២២នេះ គេឃើញមានរថយន្ត៣គ្រឿងត្រូវបានខូចខាត និងមនុស្សម្នាក់រងរបួសធ្ងន់ធ្ងរ ខណៈដុំដែកទីពច្រើនដើមបានធ្លាក់ពីលើសំណង់អគារ​ខុនដូរ​មួយកន្លែងនៅក្បែរសាលាខណ្ឌ​ទួលគោក ក្នុងរាជធានីភ្នំពេញ ។

ប្រភពព័ត៌មានពីប្រជាពលរដ្ឋនៅក្បែរខាងបានឲ្យដឹងថា មានករណីធ្លាក់ដែកបំពង់ទីព​ពី២​ទៅ៤ដើមពីសំណង់អគារ​ខុនដូរ​មួយកន្លែង ត្រូវចំរថយន្ត៣គ្រឿង និងបណ្ដាលឲ្យមេការសំណង់​​​ម្នាក់រងរបួសយ៉ាងធ្ងន់ធ្ងរ ត្រូវបានបញ្ជូនទៅកាន់មន្ទីរពេទ្យយ៉ាងឆាប់រហ័សបំផុត។

ភ្លាមៗនោះ គេសង្កេតឃើញសមត្ថកិច្ចបានចុះមកដល់ទីតាំងកើតហេតុខាងលើ និងបានកំពុងធ្វើការស្រាវជ្រាវលើករណីនេះផងដែរ ប៉ុន្តែលទ្ធផលយ៉ាងណាគេនៅមិនទាន់ទទួលបានព័ត៌មានពិស្តារនៅឡើយ៕