បុរសជនជាតិចិនម្នាក់ បើករថយន្តមួយគ្រឿង ខ្វះការប្រុងប្រយ័ត្ន រេចង្កូតទៅបុករបងថ្មផ្ទះប្រជាពលរដ្ឋ នៅស្វាយរៀង

ខេត្តស្វាយរៀង៖ កាលពីវេលាម៉ោងប្រមាណ១១និង១០នាទី ថ្ងៃទី២៥ ខែតុលា ឆ្នាំ២០២២ ស្ថិតក្នុងភូមិកោះក្បានខាងជើង ឃុំសំរោង ស្រុកចន្ទ្រា។

គេឃើញបុរសជនជាតិចិនម្នាក់ បានបើករថយន្តមួយគ្រឿងម៉ាកឡង់គ្រីស័រ ពណ៌ស ពាក់ស្លាកលេខភ្នំពេញ ២BD-០០០៣ ដោយធ្វើដំណើរពីកើតទៅលិចប្រើប្រាស់ល្បឿនលឿន ដោយខ្វះប្រុងប្រយ័ត្ន ក៏រេចង្កូតមកខាងស្ដាំដៃ បុករបងថ្មផ្ទះប្រជាពលរដ្ឋយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលតែម្ដង។

ក្រោយកើតហេតុគេឃើញបុរសជនជាតិចិននោះបើកទ្វារចេញពីក្នុងរថយន្តទាំងអាការទ្រេតទ្រោត ប៉ុន្តែមិនមានគ្រោះថ្នាក់អីនោះទេ ខណៈដែលរថយន្តខូចខាតខ្ទេចទាំងស្រុង។

សមត្ថកិច្ចបានឃាត់ខ្លួនជនជាតិចិនរូបនោះ យកទៅសាកសួរនៅអធិការដ្ឋាននគរបាលស្រុកចន្ទ្រាដើម្បីរង់ចាំដោះស្រាយសំណងជាមួយម្ចាស់ផ្ទះតាមផ្លូវច្បាប់៕ អរគុណសន្តិភាព