គ្រោះថ្នាក់ចរាចរណ៍ ៖ «បុ.កគេស្លា.ប់ បង់លុយហើយរួចខ្លួន» លែងមានទៀតហើយ
ករណីគ្រោះថ្នាក់ចរាចរណ៍បុកមនុស្សស្លា.ប់ហើយបង់លុយរួចខ្លួន លែងមានទៀតហើយ គឺត្រូវអនុវត្តទោសតាមច្បាប់ ។ នេះបើតាមអ្នកនាំពាក្យក្រសួងយុត្តិធម៌ ។
តាមបណ្តាញសង្គមតេឡេក្រាម ឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌ បានឲ្យដឹងថា កាលពីថ្ងៃទី១០ ខែកក្កដា ឆ្នាំ២០២៤ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួង យុត្តិធម៌ និងជាប្រធានគណៈបញ្ជាការដឹកនាំយុទ្ធនាការបានដឹកនាំកិច្ចប្រជុំបូកសរុបលទ្ធផលការងារក្នុងការអនុវត្តយុទ្ធនា ការរយៈពេល៦ខែ ដោយមានការចូលរួមពីសំណាក់ថ្នាក់ដឹកនាំនៃសាលាជម្រះក្តី និងអង្គការអយ្យការអមសាលាជម្រះក្តីទូទាំងប្រទេស ។
ឯកឧត្តម អ្នកនាំពាក្យបានបញ្ជាក់ថា ៖«ក្នុងកិច្ចប្រជុំនេះគណៈបញ្ជាការដឹកនាំយុទ្ធនាការបានពិនិត្យ និងវា.យតម្លៃឃើញថា ពាក្យថា «បុកគេស្លា.ប់បង់លុយហើយរួចខ្លួន» លែងមានទៀតហើយ» ។
ជាមួយគ្នានោះដែរ អ្នកនាំពាក្យបានលើកឡើងថា គណៈបញ្ជាការដឹកនាំយុទ្ធនាការក៏បានពិនិត្យឃើញផងដែរថា ការដោះស្រាយសំណងជូនដល់ជនរងគ្រោះដោយគ្រោះថ្នាក់ចរាចរណ៍ត្រូវបានគិតគូរយ៉ាងយកចិត្តទុកដាក់ និងឆាប់រហ័ស ។ទន្ទឹមនេះ, ចំណាត់ការផ្លូវច្បាប់ទៅលើជនបង្កគ្រោះថ្នាក់ចរាចរណ៍ត្រូវបានធ្វើឡើងដោយត្រឹមត្រូវ និងម៉ឺងម៉ាត់ ស្របតាមនីតិវិធីច្បាប់ជាធរមាន ។ ឯកឧត្តមបញ្ជាក់ថា ៖«នៅក្នុងសំណុំរឿងចរាចរណ៍នេះក៏ដូចជា នៅក្នុងសំណុំរឿងផ្សេងទៀតដែរ, «ខុស ឬត្រូវ គឺអាស្រ័យទៅលើអង្គហេតុ អង្គច្បាប់ និងភស្តុតាង» ហើយគណៈបញ្ជាការដឹកនាំយុទ្ធនាការក៏សូមអំពាវនាវដល់ប្រជាពលរដ្ឋទាំងអស់ សូមយកចិត្តទុកដាក់ក្នុងការចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន ។
ប្រភពបានបន្តថា អ្នកបើកបរដែលមានកំហុសទៅនឹងច្បាប់ចរាចរណ៍ និងបានបង្កគ្រោះ ថ្នាក់ចរាចរណ៍បណ្តាលឱ្យអ្នកដទៃស្លា.ប់ គឺត្រូវតែទទួលខុសត្រូវតាមច្បាប់ដោយម៉ឺងម៉ាត់ និងដោយត្រឹមត្រូវតាមច្បាប់ ហើយពាក្យថា «បុកគេស្លា.ប់ បង់លុយ ហើយរួចខ្លួន» គឺលែងមានទៀតហើយ នៅក្នុងក្របខណ្ឌនៃការកែទម្រង់នេះ ។
អ្នកនាំពាក្យក្រសួងយុត្តិធម៌បានឲ្យដឹងថា គណៈបញ្ជាការដឹកនាំយុទ្ធនាការបន្តលើកទឹកចិត្តដល់ប្រជាពលរដ្ឋដែលយល់ឃើញថា ចំណាត់ការរបស់តុលាការលើសំណុំរឿងរបស់ខ្លួនមានភាពយឺតយ៉ាវ ឬមានភាពមិនប្រក្រតី សូមដាក់ពាក្យបណ្តឹងមកយន្តការផ្លូវការនៃយុទ្ធនាការទាំង២ របស់ក្រសួងយុត្តិធម៌តាមរយៈលេខទូរស័ព្ទ 099 444 181៕ By Koh Santepheap
