ការប្រទាននូវឋានន្តរស័ក្តិជានាយឧត្តមសេនីយ៍ផុតលេខ ផ្កាយមាស៥ នៃកងយោធពលខេមរភូមិន្ទ ជាការឆ្លើយតបនឹងគុណបំណាច់ដែលបានបម្រើជាតិរបស់ឥស្សរជនទាំងពីររូប

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជាមានប្រសាសន៍ថា ការទទួលនូវការព្រះរាជទានពីព្រះមហាក្សត្រ ដំឡើងឋានន្តរស័ក្តិថ្នាក់ «នាយឧត្តមសេនីយ៍ផុតលេខ ផ្កាយមាស៥ នៃកងយោធពលខេមរភូមិន្ទ» សម្តេចពិជ័យសេនា ទៀ បាញ់ និងសម្តេចកិត្តិសង្គហបណ្ឌិត ម៉ែន សំអន បច្ចុប្បន្នគឺជាឧត្តមប្រឹក្សាផ្ទាល់ព្រះមហាក្សត្រនោះ គឺជាការឆ្លើយតបជាមួយនឹងគុណបំណាច់ដែលបានធ្វើកិច្ចការបម្រើជាតិ។

ក្នុងពិធីបំពាក់ឋានន្តរសក្ដិ ថ្នាក់នាយឧត្ដមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទ ជូនសម្ដេចពិជ័យសេនា ទៀ បាញ់ និងសម្ដេចកិត្តិសង្គហបណ្ឌិត ម៉ែន សំអន នាព្រឹកថ្ងៃទី ២១ ខែមីនា ឆ្នាំ២០២៥ នៅវិមានសន្តិភាព សម្ដេចតេជោ ហ៊ុន សែន បានថ្លែងថា បើនិយាយអំពីរាជានិយម មកដល់ពេលនេះ សម្ដេចទាំងពីរក៏ជាអ្នករួមចំណែកក្នុងការបង្កើតរាជានិយមឡើងវិញ ទាំងដំណាក់កាលនៃការចរចាស្វែងរកសន្តិភាព ទាំងការធ្វើរដ្ឋធម្មនុញ្ញ និងការការពារព្រះមហាក្សត្ររហូតមកដល់ពេលនេះ បាវចនា ជាតិ សាសនា ព្រះមហាក្សត្រ ត្រូវបានធ្វើទាំងអស់ ដូច្នេះវាស័ក្ដិសម។ សម្ដេចតេជោ ក៏បានអរគុណ និងថ្លែងនូវការកោតសរសើរចំពោះឥស្សរជនទាំងពីររូប ដែលបានរួមដំណើរ និងជួយសម្ដេច រួមដំណើរ ជាមួយឥស្សរជនដទៃទៀតរបស់គណបក្សប្រជាជនកម្ពុជា ក៏ដូជារាជរដ្ឋាភិបាល ក្នុងរយៈពេលដ៏យូរ។

សម្ដេចតេជោបានលើកឡើងថា តើមានបក្សប៉ុន្មានដែលលទ្ធភាពធ្វើបានដូចគណបក្សប្រជាជន ដែលមានប្រាំក្រុមមករួមរស់នៅជាមួយគ្នា ហើយបង្កើតបានជាមួយក្រុម នៅជាមួយគ្នាបានរយៈពេល៤៨ឆ្នាំ ហើយតើមានបក្សណានៅកម្ពុជាដែលធ្វើបានបែបនេះ។ សម្ដេចតេជោបានថ្លែងសង្កត់ធ្ងន់ជាថ្មីម្ដងទៀតថា៖ «សុំកុំព្យាយាមបំបែកគណបក្សប្រជាជន អ្នកកាន់តែធ្វើកាន់តែគ្រោះថ្នាក់ខ្លួនឯង» ។ ដូច្នេះត្រូវដឹងថា នៅពេលដែលគេវាយយើងៗ ក៏ត្រូវវាយចំណុចខ្សោយរបស់គេនៅកន្លែងណាមួយ ដែលត្រូវចាំ។ យកល្អទុកឱ្យទៅតាមដំណើរធម្មជាតិទៅ។ ប៉ុន្តែពួកអ្នកឯងគ្មានសមត្ថភាពទេ ផ្ទុយទៅវិញពួកអ្នកឯងបែកខ្លួនឯង មិនចាំបាច់ខ្ញុំទៅបំបែកទេ។» សម្ដេចតេជោប្រមុខរដ្ឋស្ដីទីថ្លែងបន្ថែមថា ពេលណាដែលរាជរដ្ឋាភិបាលរឹង ពេលនោះហើយដែលសត្រូវរបស់យើងនឹងបែកបាក់ដោយខ្លួនឯង។

គួរបញ្ជាក់ដែរថា សម្ដេចពិជ័យសេនា ទៀ បាញ់ និងសម្ដេចកិត្តិសង្គហបណ្ឌិត ម៉ែន សំអន ត្រូវបានទទួលនូវការសព្វព្រះទ័យប្រោសប្រទាន ពីព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ត្រាស់បង្គាប់ ដំឡើងឋានន្តរស័ក្តិថ្នាក់ «នាយឧត្តមសេនីយ៍ផុតលេខ ផ្កាយមាស៥ នៃកងយោធពលខេមរភូមិន្ទ» កាលពីថ្ងៃទី១៦ ខែមីនា ឆ្នាំ២០២៥កន្លងទៅ។ សម្តេចពិជ័យសេនា ទៀ បាញ់ និងសម្តេចកិត្តិសង្គហបណ្ឌិត ម៉ែន សំអន បច្ចុប្បន្នគឺជា ឧត្តមប្រឹក្សាផ្ទាល់ព្រះមហាក្សត្រ ។ សម្ដេចទាំងពីររូប សុទ្ធសឹងតែជាឥស្សរជនឆ្នើមមានគុណបំណាច់ និងស្នាដៃដ៏ធំធេង ដែលបានលះបង់កម្លាំងកាយចិត្ត ប្រាជ្ញាស្មារតី ពុះពារគ្រប់ឧបសគ្គប្រកបដោយឆន្ទៈមនសិការ ស្នេហាជាតិ និងគំរូវីរភាពខ្លាំងក្លា ក្នុងបុព្វហេតុរំដោះជាតិមាតុភូមិ ប្រជាជនពីរបបប្រល័យពូជសាសន៍ និងជាប្រតិបត្តិករមួយរូប មានសមត្ថភាពក្នុងការអនុវត្តគោលនយោបាយ ឈ្នះ ឈ្នះ នាំមកនូវការបង្រួបបង្រួមជាតិ ឯកភាពទឹកដី សន្តិភាព សុវត្ថិភាព របស់ប្រជាជន ហើយបាននិងកំពុងបំពេញបេសកកម្មយ៉ាងសកម្ម កសាងសមិទ្ធផលសង្គមជាច្រើន រួមចំណែកធ្វើឱ្យប្រទេសជាតិមានសុខសន្តិភាព វឌ្ឍនភាព ប្រជាធិបតេយ្យពេញលេញ ក្នុងដំណើរឆ្ពោះទៅកាន់នីតិរដ្ឋដ៏រឹងមាំ និងអភិបាលកិច្ចល្អ៕ by AKP
អរគុណសន្តិភាព