ប្រទេសមីយ៉ាន់ម៉ា ប្រកាសអាសន្ន នៅតំបន់ចំនួន ៦ទៀត ក្រោយពីមានគ្រោះរញ្ជួយដី និងកំពុងអំពាវនាវរកជំនួយពីអន្តរជាតិ
បរទេស( រដ្ឋធានីណៃពិដោរ ) ៖ រដ្ឋាភិបាលយោធាមីយ៉ាន់ម៉ា បានប្រកាសភាពអាសន្ន នៅតំបន់ចំនួន ៦ និងបានអំពាវនាវរកការផ្តល់ជំនួយមនុស្សធម៌ពីអន្តរជាតិ បន្ទាប់ពីមានគ្រោះរញ្ជួួយដី វាយប្រហារនៅភាគកណ្តាលនៃប្រទេសដ៏ធំសម្បើមមួយ បណ្តាលឲ្យជះឥទ្ធិពលញ័ររញ្ជួយដល់បណ្តាប្រទេសជិតខាងថែមទៀត ។ នេះបើតាមការចេញផ្សាយដោយភ្នាក់ងារព័ត៌មាន AFP នារសៀលថ្ងៃទី២៨ ខែមិនា ឆ្នាំ២០២៥ នេះ ។
ប្រមុខរាជរដ្ឋាភិបាលយោធា លោក Min AAung Hlaing ធ្វើដំណើរចុះទៅដល់មន្ទីរពេទ្យមួយកន្លែង នៅរដ្ឋធានីណៃពិដោរ ជាទីអ្នករងរបួសកំពុងទទួលការសង្រោះព្យបាល ក្រោយពីគ្រោះរញ្ជួយដីកម្រិត ៧.៧រុិចទ័រ បានវាយប្រហារតំបន់ Mandalay ភាគកណ្តាលនៃប្រទេស ។
យោងតាមទីភ្នាក់ងារតាមដានគ្រោះរញ្ជួយដីអាមេរិក USGS គឺនៅរសៀលថ្ងៃទសុក្រនេះ មានរញ្ជួយដីមួយកម្រិត ៧.៧រុិចទ័រ បានវាយប្រហារនៅចម្ងាយប្រហែល ១៧គីឡូម៉ែត ពីទីក្រុង Mandalay ជាទីដែលមានមនុស្សរស់នៅ ប្រហែល ១.២លាននាក់ ក្នុងជម្រៅត្រឹម ១០គីឡូម៉ែតក្រោមផ្ទៃដី ហើយប៉ុន្មាននាទីក្រោយមក ក៏មានការរញ្ជួយដីមួយថែមទៀតកម្រិត ៦.៤រុិចទ័រ កើតឡើងចំតំបន់ដដែល ។
គួរបញ្ជាក់ថា មកទល់ពេលនេះ រដ្ឋាភិបាលមីយ៉ាន់ម៉ា នៅតែមិនទាន់ផ្តល់ព័ត៌មានបឋម អំពីទំហ៊ុនៃការបំផ្លិចបំផ្លាញ ឬ មនុស្សរងគ្រោះថ្នាក់បាត់បង់ជីវិត និងរងរបួសនៅឡើយទេ ។ ប៉ុន្តែបើតាមប្រព័ន្ធផ្សព្វផ្សាយក្នុងស្រុក និងការចែកចាយរូបភាព ក៏ដូចជាវីដេអូ នៅលើបណ្តាញទំនាក់ទំនងសង្គម គ្រោះរញ្ជួយដីខាងលើនេះ បានធ្វើឲ្យអគារជាច្រើន ដួលរលំ ហើយបង្ករការខូចខាតចំពោះហេដ្ឋារចនាសម្ព័ន្ធ ផ្សេងៗ រួមមានទាំងស្ពាន និងផ្លូវថ្នល់ ។
ហេតុការរញ្ជួយផែនដីនេះ ក៏បានជះឥទ្ធិពល ញ័ររង្គើ ដល់ប្រទេសជិតខាងផងដែរ ជាពិសេសប្រទេសថៃ ដែលមានអគារខ្ពស់កំពុងសាងសង់មួយកន្លែង បានដួលរលំ ទាំងស្រុង ហើយអគារខ្ពស់ៗមួយចំនួនទៀត រងការខូចខាត៕ អរគុណសន្តិភាព