ឯកឧត្តម សុខ សប្បាយណា សមាជិកគណៈអចិន្រៃយ៍គណៈកម្មាធិការកណ្តាលនៃសហភាពសហព័ន្ធយុវជនកម្ពុជា និងជាប្រធានក្រុមការងារប្រតិបត្តិនៃព្រឹត្តិការណ៍អង្គរសង្រ្កាន្ត បានអញ្ជើញជួបពិភាក្សាការងារអំពីការផ្សព្វផ្សាយព្រឹត្តិការណ៍ «អង្គរសង្រ្កាន្ត» ជាមួយគណៈប្រតិភូក្រសួងទេសចរណ៍ និងភ្នាក់ងារទេសចរណ៍
ភ្នំពេញ៖ កាលពីព្រឹកថ្ងៃទី៣១ ខែមីនា ឆ្នាំ២០២៤ ឯកឧត្តម សុខ សប្បាយណា សមាជិកគណៈអចិន្រៃយ៍គណៈកម្មាធិការកណ្តាលនៃសហភាពសហព័ន្ធយុវជនកម្ពុជា និងជាប្រធានក្រុមការងារប្រតិបត្តិនៃព្រឹត្តិការណ៍អង្គរសង្រ្កាន្ត បានអញ្ជើញជួបពិភាក្សាការងារអំពីការផ្សព្វផ្សាយព្រឹត្តិការណ៍ «អង្គរសង្រ្កាន្ត» ជាមួយគណៈប្រតិភូក្រសួងទេសចរណ៍ និងភ្នាក់ងារទេសចរណ៍ ដឹកនាំដោយឯកឧត្តម ហ៊ុល សីលា អនុរដ្ឋលេខាធិការក្រសួងទេសចរណ៍។ កម្មវិធីនេះបានប្រពឹត្តទៅនៅមជ្ឈមណ្ឌលម៉ានី អគារ (The Kampus)ដោយមានអញ្ជើញចូលរួមក្នុងកម្មវិធីនេះរួមមាន ក្រុមការងារចូលរួមរៀបចំព្រឹត្តិការណ៍អង្គរសង្ក្រាន្ត លោកជំទាវ លោក លោកស្រី ថ្នាក់ដឹកនាំក្រសួងទេសចរណ៍ តំណាងសមាគមភ្នាក់ងារទេសចរណ៍ មគ្គុទេសក៍ និងអ្នកផលិតមាតិកាទេសចរណ៍ ជាច្រើនរូបចូលរួម ។
ជាកិច្ចចាប់ផ្តើម ឯកឧត្តម ហ៊ុល សីលា បានថ្លែងអំណរគុណនិងវាយតម្លៃខ្ពស់ចំពោះសហភាពសហព័ន្ធយុវជនកម្ពុជាដែលបានខិតខំប្រឹងប្រែងអស់ពីសមត្ថភាពរៀបចំព្រឹត្តិការណ៍អង្គរសង្រ្កាន្តដោយមានការជោគជ័យ យ៉ាងធំធេងជូនជាតិមាតុភូមិនាពេលកន្លងមក។ ព្រឹត្តិការណ៍នេះជាព្រឹត្តិការណ៍មួយដែលបង្ហាញអំពីមោទនភាពជាតិខ្មែរយើង ហើយក៏ជាព្រឹត្តិការណ៍ដែលយើងអាចទាក់ទាញភ្ញៀវទេសចរណ៍ទូទាំងពិភពលោកមកទស្សនាព្រះរាជាណាចក្រកម្ពុជាយើង សមនឹងពាក្យឯកឧត្តមរដ្ឋមន្រ្តី ក្រសួងទេសចរណ៍ពោលពាក្យមួយឃ្លាថា «ពេលនេះជាពេលដែលយើងអាចនាំយកកម្ពុជាទៅកាន់ពិភពលោក»។
ឯកឧត្តម សុខសប្បាយណា បានធ្វើការសំណូមពរទៅកាន់អង្គពិធីទាំងមូល ចូលរួមផ្សព្វផ្សាយអំពីព្រឹត្តិការណ៍អង្គរសង្រ្កាន្តឲ្យបានទូលំទូលាយ ព្រោះយើងចង់ផ្សព្វផ្សាយមិនត្រឹមតែអង្គរសង្រ្កាន្តនោះទេ គឺចង់ផ្សព្វផ្សាយពីខេត្តសៀមរាបទាំងមូលតែម្តង បើយើងផ្សព្វផ្សាយតែអង្គរសង្រ្កាន្ត ចប់អង្គរសង្រ្កាន្ត ភ្ញៀវទេសចរណ៍ក៏នៅបន្តដំណើរកំសាន្ត ជាពិសេសនោះគឺយើងចូលរួមលើកស្ទួយសេដ្ឋកិច្ចដល់បងប្អូនជាម្ចាស់អាជីវកម្មនៅតំបន់នេះ។
កិច្ចជំនួបក៏មានការបង្ហាញនូវកម្មវិធី និងទីតាំងនានា នៃព្រឹត្តិការណ៍អង្គរសង្រ្កាន្ត ព្រមទាំងបានទទួលមតិយោបល់ និងសំណូមពរល្អៗជាច្រើនពីបណ្តាប្រតិបត្តិករក្នុងវិស័យទេសចរណ៍ផងដែរ៕ រូបភាព អត្ថបទ សសយក
អរគុណសន្តិភាព
អរគុណសន្តិភាព