ផឹកស៊ីស្រវឹងបាញ់ត្រូវមនុស្សរបួសនៅខណ្ឌដង្កោ សមត្ថកិច្ចកំពុង…

រាជធានីភ្នំពេញ៖ ករណីក្រុមជនប្រមឹកបាញ់បោះសេរីនេះ បានកើតឡើងកាលពីវេលាម៉ោង៨និង​១០​នាទី​យប់ថ្ងៃទី២៦ ខែមករា ឆ្នាំ២០២០ ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ ។

ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេឃើញជនរងគ្រោះកំពុងលេងបុកប៊ីយែរ ចំណែក ជនសង្ស័យកំពុងអង្គុយផឹកស៊ីនៅក្បែរនោះដែរ ដែលមានគ្នាប្រហែល៤ទៅ៥នាក់។ លុះពេលស្រវឹងធ្លាក់ភ្នែក ជនប្រមឹកទាំងនោះ បានដកកាំភ្លើងខ្លីមកអួតគ្នាចុះឡើង ហើយពេលនោះ មានជនម្នាក់ឈ្មោះណូ បានទាញកាំភ្លើងពីគ្នីគ្នា មកបាញ់ផ្ទុបដី បណ្ដាលឲ្យគ្រាប់កាំភ្លើងហោះចំជនរងគ្រោះតែម្តង។ក្រោយកើតហេតុ ជនរងគ្រោះបានក្រុមគ្រួសារនាំទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ដង្កោ និងទៅមន្ទីរពេទ្យដើម្បីព្យាបាលមុខរបួស។ ជនរងគ្រោះឈ្មោះ ឃិន ឆៃយ៉ា មុខរបរដើរទិញអេតចាយ ស្នាក់នៅភូមិម័ល សង្កាត់/ខណ្ឌដង្កោ រាជធានីភ្នំពេញ រងរបួសជើងឆ្វេង។

ចំណែក ក្រុមជនដៃដល់ជាខ្មាន់កាំភ្លើងបាននាំគ្នារត់គេចខ្លួនអស់ តែទោះបីជាយ៉ាងណា ក៏គេបានស្គាល់អត្តសញ្ញាណអស់ហើយ ដោយសមត្ថកិច្ចខណ្ឌដង្កោ កំពុងតែតាមប្រមាញ់ចាប់ជនដៃដល់ជាខ្មាន់កាំភ្លើង នាំមកចាត់ការតាមច្បាប់៕ by PATHOM