គ្រាន់តែកីឡាករម្នាក់ ធ្វើឲ្យប្រធានាធិបតីអាមេរិកាំង៣រូប ស្ថិតក្នុងចំណោមអ្នកដែលបានផ្ញើសារបង្ហាញនូវការសោកស្តាយ
បរទេស៖ គ្រាន់តែកីឡាករម្នាក់ ធ្វើឲ្យលោក ដូណាល់ ត្រាំ លោក បារ៉ាក់ អូបាម៉ា លោក ប៊ីល គ្លីនតុន ស្ថិតក្នុងចំណោមអ្នកដែលបានផ្ញើសារបង្ហាញនូវការសោកស្តាយចំពោះមរណភាពវីរបុរសបាល់បោះ។
ឥស្សរជននយោបាយ អត្តពលិក ក៏ដូចជាបុគ្គលល្បីៗលើពិភពលោក សុទ្ធតែរន្ធត់អារម្មណ៍ទាក់ទងនឹងមរណភាពរបស់អតីតកីឡាករបាល់បោះ Kobe Bryant និងកូនស្រី ជាមួយមនុស្ស៧នាក់ទៀតក្នុងគ្រោះថ្នាក់ធ្លាក់ឧទ្ធម្ភាគចក្រ នៅតំបន់ភ្នំនៅក្រុង Calabasas រដ្ឋកាលីហ្វនីញ៉ា កាលពីថ្ងៃទី២៦ ខែមករា ឆ្នាំ២០២០។
តាមរយៈ Twitter របស់ខ្លួន អតីតប្រធានាធិបតីអាមេរិក លោក បារ៉ាក់ អូបាម៉ា បានចាត់ទុក Kobe Bryant ជាវីរបុរសនៅលើទីលានប្រកួត ហើយទើបតែចាប់ផ្តើមជីវិតដ៏មានន័យបន្ថែមទៀត។ ការបាត់បង់ Gianna ជាអារម្មណ៍ដ៏សោកសៅបន្ថែមទៀតសម្រាប់គ្រួសារ។ «Michelle និងខ្ញុំ សូមផ្ញើក្តីស្រឡាញ់ និងការរំលែកទុក្ខចំពោះលោកស្រី Vanessa និងគ្រួសារទាំងមូលរបស់ Bryant នូវពេលវេលាសោកសៅដែលមិននឹកស្មានដល់នេះ»។ នេះជាសំណេររបស់លោក អូបាម៉ា។
អតីតប្រធានាធិបតី ប៊ីល គ្លីនតុន និងលោកស្រី ហ៊ីឡារី គ្លីនតុន អតីតរដ្ឋមន្ត្រីការបរទេសដែលជាភរិយា បានគូសបញ្ជាក់ថា Kobe Bryant បាននាំភាពរីករាយដល់អ្នកគាំទ្រកីឡាបាល់បោះនៅ Los Angeles បន្តដល់សហរដ្ឋអាមេរិក និងពិភពលោកទាំងមូល ហើយលោកបានជួយមនុស្សទុរគត និងជនឥតផ្ទះសម្បែងជាច្រើននាក់។
លោកប្រធានាធិបតី ដូណាល់ ត្រាំ បានចាត់ទុកជាដំនឹងដ៏អាក្រក់បំផុត។ លោកបានសរសេរសារនៅលើ Twitter ជាបន្តបន្ទាប់ទាក់ទងនឹងការសោកស្តាយរបស់លោកចំពោះការបាត់បង់ Kobe Bryant និងកូនស្រី។
ក្រៅពីមេដឹកនាំ និងអតីតមេដឹកនាំសហរដ្ឋអាមេរិក បុគ្គលល្បីៗជាច្រើនរូបទៀត សុទ្ធតែសម្តែងនូវការសោកស្តាយ ក្នុងនោះមានដូចជា Michael Jordan, Tiger Woods, Bernie Sanders, Joe Biden, Andrew Yang, Alexandria Ocasio-Cortez, Jennifer Lopez, Neymar ជាដើម។
Kobe Bryant និងកូនស្រី Gianna អាយុ១៣ឆ្នាំ រួមទាំងមនុស្ស៧នាក់ផ្សេងទៀត បានចេញដំណើរពី John Wayne Airport ក្នុង Orange County តាមឧទ្ធម្ភាគចក្រ Sikorsky S-76 ដែលជាកម្មសិទ្ធរបស់ Bryant ផ្ទាល់។ ឧទ្ធម្ភាគចក្រនោះ បានធ្លាក់នាអំឡុងវេលាម៉ោង ៩ និង៤៧នាទី ព្រឹកថ្ងៃទី២៦ ខែមករា ក្បែរកីឡដ្ឋាន Dodger Stadium ក្នុងតំបន់ Calabasas។
ក្រៅពី Kobe Bryant និងកូនស្រី សមត្ថកិច្ចមូលដ្ឋានមិនបានផ្តល់ព័ត៌មានលម្អិតពីអត្តសញ្ញាណជនរងគ្រោះផ្សេងទៀតឡើយ ប៉ុន្តែក្នុងចំណោមនោះ មាន លោក John Altobelli គ្រូបង្វឹកកីឡាបេស្បល៍ ភរិយាលោកឈ្មោះ Keri និងកូនស្រី Alyssa។ Alyssa និង Gianna ជាមិត្តរួមក្រុមបាល់បោះនៅសាលា Mamba Academy។
Kobe Bryant ដែលក្នុងបញ្ជីឈ្មោះដែលមានទ្រព្យសម្បត្តិច្រើនលើពិភពលោក ពោលគឺមានប្រមាណ៥០០លានដុល្លារអាមេរិក។ ក្នុងអាជីពជាកីឡាករបាល់បោះរយៈពេល២០ឆ្នាំ Kobe Bryant ត្រូវបានចាត់ទុកជាកីឡាករដ៏អស្ចារ្យក្នុងប្រវត្តិសាស្ត្រអាមេរិក។
លោកបានឈ្នះមេដាយមាសអូឡាំពិកពីរលើកសម្រាប់ក្រុមជម្រើសជាតិអាមេរិក ហើយជាមួយក្រុម Los Angeles Lakers លោក Bryant បានឈ្នះជើងឯក NBA ៥សម័យកាល និងជាប់ក្នុង NBA All-Star ១៨លើក រួមទាំងពានរង្វាន់ជាច្រើនទៀត។
Kobe Bryant មានភរិយាឈ្មោះ Vanessa Cornejo Urbieta ដែលបច្ចុប្បន្នវ័យ៣៧ឆ្នាំ។ ពួកគេបានរៀបការនៅឆ្នាំ២០០១ និងមានកូនស្រី៤នាក់។ កូនច្បង Natalia Diamnante កើតនៅខែមករា ឆ្នាំ២០០៣, Gianna Maria-Onore ដែលស្លាប់នោះ កើតនៅខែឧសភាឆ្នាំ២០០៦, Bianka Bella កើតនៅខែធ្នូ ឆ្នាំ២០១៦ និងCapri Kobe កើតនៅខែមិថុនា ឆ្នាំ២០១៩ ។
ក្រោយ Bryant ប្រកាសចូលនិវត្តន៍កាលពីឆ្នាំ២០១៥ អ្នកស្រី Vanessa បានថ្លែងថា អ្នកស្រីពិតជារីករាយដោយបានចាប់ផ្តើមជីវិតគ្រួសារដ៏រីករាយ។ ប៉ុន្តែពេលនេះ គាត់ត្រូវក្លាយជាស្ត្រីមេម៉ាយដោយមានកូនស្រីដល់ទៅ៤នាក់ក្នុងបន្ទុក៕