គម្រោងបង្កើតរោងចក្រផលិតសម្ភារៈសំណង់ ត្រូវបានកិច្ចប្រជុំអន្តរក្រសួងអនុម័ត
ភ្នំពេញ៖ យោងលើអត្ថបទព័ត៌មាន នារសៀលថ្ងៃព្រហស្បតិ៍ ១៣កើត ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៦ ខែកុម្ភៈ ឆ្នាំ២០២០ ដែលចេញផ្សាយដោយក្រសួងបរិស្ថានបានឱ្យដឹងថា គម្រោងបង្កើតរោងចក្រផលិតសម្ភារៈសំណង់(Concrete Block/ Brick & Precast Concrete) គ្រប់ប្រភេទលើផ្ទៃដីទំហំ ២៨.៦៧០ម៉ែត្រក្រឡា ដែលមានទីតាំងស្ថិតនៅក្នុងភូមិគិរីរស្មី ឃុំព្រៃរំដួល ស្រុកភ្នំស្រួច ខេត្តកំពង់ស្ពឺ របស់ក្រុមហ៊ុន យ៉ុង ដេ ស៊ីន (ខេមបូឌា) ឯ.ក (ម្ចាស់គម្រោង) ដែលបានសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថានដោយក្រុមហ៊ុនទីប្រឹក្សា សាស្ទីណាតិ៍ ហ្រ្គីន។
កិច្ចប្រជុំនេះ មានសមាសភាពចូលរួមពី ឯកឧត្តម លោកជំទាវ ថ្នាក់ដឹកនាំក្រសួង លោក លោកស្រី តំណាងអគ្គនាយកដ្ឋានពាក់ព័ន្ធនៃក្រសួងបរិស្ថាន និងអគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍ដោយចីរភាព តំណាងអន្តរក្រសួងពាក់ព័ន្ធ ក្រុមប្រឹក្សាអភិវឌ្ឍន៍កម្ពុជា មន្ទីរបរិស្ថានខេត្តកំពង់ស្ពឺ តំណាងនាយកដ្ឋានវាយតម្លៃផលប៉ះពាល់បរិស្ថាន តំណាងក្រុមហ៊ុន យ៉ុង ដេ ស៊ីន (ខេមបូឌា) ឯ.ក (ម្ចាស់គម្រោង) និងក្រុមហ៊ុនទីប្រឹក្សា សាស្ទីណាតិ៍ ហ្រ្គីន ចំនួន ៣២នាក់។
អង្គប្រជុំបានទទួលលទ្ធផល ដូចខាងក្រោម៖
១- អង្គប្រជុំ បានគាំទ្រចំពោះគម្រោងបង្កើតរោងចក្រផលិតសម្ភារៈសំណង់នេះ។
២- ក្រុមហ៊ុនម្ចាស់គម្រោង ត្រូវទទួលយកនូវរាល់មតិយោបល់របស់អង្គប្រជុំ និងកែសម្រួលរបាយការណ៍នេះស្របតាមស្មារតីអង្គប្រជុំ។
៣- ក្រុមហ៊ុន ត្រូវត្រួតពិនិត្យគុណភាពផេះដែលយកទៅផលិតឱ្យមានគុណភាពល្អ ចៀសវាងបង្កបញ្ហាដល់អ្នកប្រើប្រាស់។
៤- ក្រុមហ៊ុន ត្រូវត្រួតពិនិត្យឡចំហាយចំពោះការបញ្ចេញផ្សែងនេះឱ្យស្ថិតនៅក្រោមស្តង់ដាររបស់ក្រសួងបរិស្ថាន លើសពីនេះក្រុមហ៊ុនត្រូវធ្វើការអប់រំបណ្តុះបណ្តាលដល់បុគ្គលដែលបញ្ជាលើឡចំហាយ ហើយត្រូវទទួលស្គាល់ពីក្រសួងឧស្សាហកម្ម បច្ចេកវិទ្យា និងនវានុវត្តន៍។
៥- ក្រុមហ៊ុន ត្រូវរៀបចំគ្រប់គ្រងសំណល់រឹង.រាវឱ្យបានត្រឹមត្រូវចៀសវាងប៉ះពាល់ដល់ប្រជាពលរដ្ឋដែលរស់នៅក្បែរតំបន់គម្រោង។
៦- ក្រុមហ៊ុន ត្រូវកាត់បន្ថយការបំពុលខ្យល់ដែលចេញពីការ ក្រឡុកស៊ីម៉ងត៍ និងការដឹកសម្ភារៈសំណង់ធ្វើការគ្រប និងដាំដើមឈើក្នុងទីតាំងគម្រោង ព្រមទាំងធ្វើការសម្អាតជាប្រចាំ ដើម្បីកាត់បន្ថយការហុយធូលីឱ្យត្រឹមត្រូវ
៧- ក្រុមហ៊ុនត្រូវរៀបចំកន្លែងស្នាក់នៅរបស់បុគ្គលិក-កម្មករឱ្យបានត្រឹមត្រូវ ករណីកំពុងសាងសង់ ក្រុមហ៊ុនមិនត្រូវអនុញ្ញាតឱ្យកម្មករសម្រាកនៅក្នុងអគារនោះទេ
៨- ក្រុមហ៊ុនត្រូវអប់រំបុគ្គលិក-កម្មករអំពីសុខភាព និងសុវត្ថិភាព ក្នុងការបំពេញការងាររួមទាំងផ្តល់ឧបករណ៍សុវត្ថិភាពក្នុងការបំពេញការងារ។
៩- ក្រុមហ៊ុន ត្រូវផ្តល់ប័ណ្ណ ប.ស.ស ដល់បុគ្គលិក-កម្មករ ដើម្បីឱ្យពួកគាត់ទទួលបានផ្នែកការពារព្យាបាលសុខភាពសង្គម។
១០- ក្រុមហ៊ុនម្ចាស់គម្រោង ត្រូវសហការជាមួយជំនាញពាក់ព័ន្ធឱ្យបានល្អប្រសើរ។
១១- ក្រុមហ៊ុន ត្រូវរៀបចំស្លាកសញ្ញាចរាចរណ៍ចេញ-ចូល និងអប់រំដល់អ្នកបើកបរចៀសវាងគ្រោះថ្នាក់ចរាចរណ៍។
ឯកឧត្តម នេត្រ ភក្រ្តា រដ្ឋលេខាធិការក្រសួងបរិស្ថាន បានដឹកនាំកិច្ចប្រជុំអន្តរក្រសួងដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) លើគម្រោងបង្កើតរោងចក្រផលិតសម្ភារសំណង់(Concrete Block/ Brick & Precast Concrete) គ្រប់ប្រភេទ បានបញ្ចប់នានារសៀលថ្ងៃព្រហស្បតិ៍ ១៣កើត ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៦ ខែកុម្ភៈ ឆ្នាំ២០២០ ដដែល៕
