សារធាតុគីមីបូរ៉ាក់ មន្ត្រីកាំកុងត្រូលខេត្ត រកឃើញដាក់ក្នុងបង្អែមបាញ់ឌុក នៅផ្សារសំរោងយ៉ោង
ខេត្តតាកែវ ៖ មន្ត្រីកាំកុងត្រូលខេត្ត បានធ្វើតេស្តរកឃើញសារធាតុគីមីបូរ៉ាក់នៅក្នុងនំបង្អែមបាញ់ឌុក ដាក់លក់នៅក្នុងផ្សារសំរោងយ៉ោង ដែលស្ថិតនៅក្នុងស្រុកបាទី នាព្រឹកថ្ងៃទី២០ ខែកុម្ភៈ ឆ្នាំ២០២០នេះ ។
បើតាមមន្ត្រីកាំកុងត្រូលថ្លែងថា បន្ទាប់ពីចុះត្រួតពិនិត្យទំនិញ និងចំណីអាហារជាច្រើនមុន រួមនឹងគ្រឿងកំប៉ុងជាច្រើនមុខ នៅក្នុងផ្សារសំរោងយ៉ោង មន្ត្រីជំនាញបានធ្វើតេស្តបឋមបានរកឃើញវត្តមានសារធាតុគីមី ប៉ូរ៉ាក់ នៅក្នុងនំបាញ់ឌុក ហើយក៏បានធ្វើការដកហូតបានជិត១០គីឡូក្រាម យកមកកម្ទេចចោលភ្លាមៗផងដែរ ព្រោះថា សារធាតុគីមីប៊ូរ៉ាក់នេះ មានផលប៉ះពាល់យ៉ាងធ្ងន់ធ្ងរទៅដល់សុខភាពប្រជាពលរដ្ឋណាដែលបរិភោគដោយមិនដឹងខ្លួន ក្នុងបរិមាណច្រើន គីមីនេះ វាបង្កឲ្យមានបញ្ហាតម្រងនោម ឈឺក្បាល រលាកប្រព័ន្ធរំលាយអាហារ ក្រពះ ពោះវៀន ថ្លើម រមាស់ស្បែក ហើយសម្រាប់មនុស្សពេញវ័យ បើសិនសារធាតុនេះចូលក្នុងខ្លួន ចាប់ពីកម្រិត៧ដល់៣៥ក្រាម បណ្តាលឲ្យស្លាប់ សម្រាប់មនុស្សចាស់១៥ក្រាម និងកុមារ៥ក្រាម អាចបង្កឲ្យក្អូតធ្លាក់ឈាម និងស្លាប់ផងដែរ ។
ដើម្បីទប់ស្កាត់បញ្ហា លាយសារធាតុគីមីបូរ៉ាក់ ក្នុងនំបាញ់ឌុកនេះ មន្ត្រីកាំកុងត្រូល ក៍បានតម្រូវអោយបងប្អូនអាជីវករពាក់ព័ន្ធ ទាំងអ្នកបោះដុំ និងទាំងអ្នកលក់រាយ ត្រូវតែបញ្ឈប់ ចំណីអាហារមានដាក់លាយគីមីបន្តទៀត ជាដាច់ខាត ក្នុងករណីសមត្ថកិច្ចរកឃើញលើកក្រោយ អាចនឹងប្រឈមមុខតាមផ្លូវច្បាប់ ជាក់ជាមិនខាន៕
