មន្ត្រីនគរបាលម្នាក់ចាប់រំលោភថៅកែហាងស្រាក្រឡុកដល់ក្នុងបន្ទប់ទឹក ប្អូនគេទាន់ រត់បាត់សល់តែកាតនគរបាល
ភ្នំពេញ៖ ស្ត្រីម្នាក់ជាថៅកែហាងស្រាក្រឡុកមួយកន្លែង ទាមទាររកភាពយុត្តិធម៌ ក្រោយនាងបានអះអាងថា ត្រូវបានអនុសេនីយ៍ត្រី ប៉ែន ច័ន្ទរស្មី អត្តលេខ៨៣២៣១ ធ្វើសកម្មភាពចាប់នាងពេលនាងកំពុងនៅក្នុងបន្ទប់ទឹក ដោយការចូលមកពីក្រោយរួចខ្ទប់ទ្វារ ប្រតាយប្រតប់ជាមួយនាង បម្រុងចាប់រំលោភនាង នៅក្នុងបន្ទប់ទឹកនោះតែម្តង តែសំណាងប្អូនប្រុសរបស់នាងមកទាន់ ជនសង្ស័យជាអនុសេនីយ៍ត្រី ប៉ែន ច័ន្ទរស្មី នេះក៏រត់ចេញមកក្រៅ តែពួកគាត់ស្រវាចាប់ទាញបានកាតសម្គាល់ខ្លួនជានគរបាលជាតិនេះ ចំណែកជនសង្ស័យរត់បាត់ ។
ហេតុការណ៍នេះបានកើតឡើងកាលពីវេលាម៉ោង ៤និង១០នាទីព្រឹក ថ្ងៃទី៥ ខែមីនា ឆ្នាំ២០២០នេះ នៅហាងលក់ស្រាក្រឡុក តាមមហាវិថីឈ្នះ ឈ្នះ ភូមិត្រាំងទារ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
តាមសម្តីជនរងគ្រោះឈ្មោះ ច.ដ ជាថៅកែហាងស្រាក្រឡុក ស្នាក់នៅក្នុងខណ្ឌពោធិ៍សែនខាងលើ បានអះអាងថា កាតដែលខ្លួនដណ្តើមបានពីជនសង្ស័យនេះ គឺជាកាតសម្គាល់ខ្លួន មានតួនាទីមន្ត្រីនគរបាលជាតិ ឈ្មោះ ប៉ែន ច័ន្ទរស្មី ភេទប្រុស អាយុ៣១ឆ្នាំ មានឋានន្តរសក្តិ ជាអនុសេនីយ៍ត្រី អត្តលេខ ៨៣២៣១ នគរបាលជាតិ ស្នាក់នៅផ្ទះលេខ២៣ ផ្លូវ៣៣៥ សង្កាត់បឹងកក់១ ខណ្ឌទួលគោក ហើយគាត់មិនដែលស្គាល់ជនសង្ស័យនោះទេ។ លុះមុនកើតហេតុ ជនសង្ស័យរួមជាមួយបក្ខពួកមួយក្រុម ចូលទៅផឹកស៊ីនៅហាងរបស់គាត់ ខណៈដែលគាត់ដើរទៅចូលបន្ទប់ទឹកនៅផ្សារបឹងបៃតង ចម្ងាយពីកន្លែងលក់ប្រមាណ៨០ម៉ែត្រ រៀបចេញមកវិញ ក៏ត្រូវជនសង្ស័យដើរចូល ហើយរុញគាត់ឲ្យចូលក្នុងបន្ទប់ទឹកវិញ រួចចាប់ឱបជាប់ខ្ទប់មាត់ ថើប បម្រុងចាប់រំលោភគាត់ ត្រូវបានប្អូនប្រុសរបស់គាត់ ដែលនៅជួយលក់ទីនោះដើរមកតាមហៅ ព្រោះមានភ្ញៀវកម្ម៉ង់ម្ហូបច្រើន ទើបឃើញស្តែងៗក៏ស្រែកឆោឡោនិងប្រតាយប្រតប់គ្នា ចាប់ទាញបាន អត្តសញ្ញាណប័ណ្ណនគរបាលជាតិនេះតែម្តង ។ ចំណែកជនសង្ស័យភ័យរត់គេច ទៅបាត់ទាំងបក្ខពួក លុះមួយសន្ទុះក្រោយមក ជនសង្ស័យ និងបក្ខពួកបានវិលត្រឡប់មកវិញ ព្យាយាមយកកាតទៅវិញ តែជនរងគ្រោះមិនឲ្យ ថែមទាំងត្រូវបានក្រុមជនសង្ស័យទាំងនោះ រករឿង គំរាមវាយលើជនរងគ្រោះ២នាក់បងប្អូនថែមទៀត។
ពេលនេះសមត្ថកិច្ចបាននាំស្ត្រីរងគ្រោះទៅចង្អុលបង្ហាញទីតាំងកើតហេតុ ដាក់ពាក្យបណ្តឹង និងកំពុងស្រាវជ្រាវតាមចាប់ជនសង្ស័យមកផ្តន្ទាទោសតាមច្បាប់៕
