ច្រកទ្វារជប់គគីរ និងច្រកអូរស្មាច់ ជាប់ថៃ ត្រូវបិទជាបណ្តោះអាសន្ន

តាមរយៈសេចក្តីជូនដំណឹងរបស់រដ្ឋបាលខេត្តឧត្តរមានជ័យ ដែលទទួលបាននៅព្រឹកថ្ងៃទី២១ ខែមីនា ឆ្នាំ២០២០នេះ គឺយោងតាមស្ថានភាពជាក់ស្តែង និងស្ថិតក្នុងស្ថានភាពជំងឺកូវីដ១៩ ដែលកំពុងរីករាលដាលជាសកល និងផ្អែកតាមការជូនដំណឹងរបស់ភាគីថៃ ដើម្បីចូលរួមបង្ការ និងទប់ស្កាត់ការរាតត្បាតនៃជំងឺកូវីដ១៩ នៅទូទាំងពិភពលោកនោះ រដ្ឋបាលខេត្តឧត្តរមានជ័យ បានបញ្ជាក់ថា៖

*ទី១៖ ច្រកព្រំដែនជប់គគីរស្ថិតក្នុងស្រុកបន្ទាយអំពិល (ច្រកសាយតាគូ ស្រុកបានគ្រួត ខេត្តបុរីរ៉ាំ) នឹងបិទជាបណ្តោះអាសន្នចាប់ពីថ្ងៃទី១៩ ខែមីនា ឆ្នាំ២០២០នេះតទៅ រហូតដល់មានការជូនដំណឹងជាថ្មី។

*ទី២៖ ច្រកទ្វារព្រំដែនអន្តរជាតិអូរស្មាច់ ស្ថិតក្នុងក្រុងសំរោង (ច្រកទ្វារអន្តរជាតិឆងចម ស្រុកកាប់ជើង ខេត្តសុរិន្ទ) បិទជាបណ្តោះអាសន្នចាប់ពីថ្ងៃទី២១ ខែមីនា ឆ្នាំ២០២០នេះតទៅ ដោយមិនអនុញ្ញាតិឲ្យមនុស្ស យានជំនិះ និងទំនិញឆ្លងកាត់ចេញចូលជាបណ្តោះអាសន្ន រហូតមានការជូនដំណឹងជាថ្មី លើកលែងទំនិញមានលក្ខណៈពាណិជ្ជកម្ម និងស្របតាមបទដ្ឋានបច្ចេកទេសនៃប្រទេសទាំង២។

បើតាមសេចក្តីជូនដំណឹងដដែល ចំពោះច្រកទ្វារព្រំដែនអន្តរជាតិជាំ ស្ថិតក្នុងស្រុកអន្លង់វែង (ច្រកទ្វារព្រំដែនអន្តរជាតិសាង៉ាំ ស្រុកភូស៉ីង ខេត្តស៉ីសាកេត) គឺនៅដំណើរការជាប្រក្រតី ប្រជាពលរដ្ឋដែលប្រើប្រាស់លិខិតឆ្លងដែនឫបណ្ណព្រំដែនអាចឆ្លងចេញចូលបានធម្មតា តែមានការរឹតបណ្តឹងផ្នែកសុខភាពអនាម័យ។ ប៉ុន្តែផ្សារមឿងម៉ៃ ផ្សារព្រំដែនក្នុងទឹកដីថៃ ដែលបើកលក់រៀងរាល់ថ្ងៃព្រហស្បតិ៍ និងថ្ងៃអាទិត្យ នឹងបិទជាបណ្តោះអាសន្ន ចាប់ពីថ្ងៃអាទិត្យ ទី២២ ខែមីនា ឆ្នាំ២០២០ស្អែកនេះតទៅ ហើយការឆ្លងដែនចូលទៅរកសេវាពិនិត្យ ពិគ្រោះ និងព្យាបាលសុខភាពនៅមន្ទីរពេទ្យ អ៊ូ ប៊ុន និងមន្ទីរពេទ្យសាប់ផាស៉ីត ក្នុងខេត្តអ៊ូប៊ុនរាជធានី ក៏ភាគីថៃបានផ្អាកជាបណ្តោះអាសន្នដែរ៕