លោក ឃួង ស្រេង “គ្រប់ផ្នែក ពិនិត្យឱ្យបានច្បាស់លាស់ មុននិងអនុញ្ញាតិឱ្យមានការ ជីក ឬខួងផ្លូវ នៅក្នុងរាជធានី”

កន្លងមកនេះឃើញថា កំណាត់ផ្លូវដ៏ល្អស្អាតមួយចំនួនបានទទួលរងការខូចខាត ដោយសារការជីកកកាយដោយស្ថាប័នរដ្ឋ និងក្រុមហ៊ុនឯកជនមួយចំនួន ដើម្បីកប់បណ្តាញក្រោមដី ហើយពេលធ្វើសងវិញ មិនមានការទទួលខុសត្រូវ ទើបអភិបាលរាជធានីភ្នំពេញ លោក ឃួង ស្រេង បានជម្រុញឱ្យអាជ្ញាធរនិងមន្ត្រីពាក់ព័ន្ធចំណុះអោយរដ្ឋបាលរាជធានីជាពិសេសអភិបាលខណ្ឌទាំង១៤ ត្រូវបន្តយកចិត្តទុកដាក់បន្ថែមទៀត ក្នុងការពិនិត្យរាល់ការខួងឆ្លងផ្លូវ ឬ ជីកកាយកប់ខ្សែកាប្លិ៍ក្រោមដី ដោយស្ថាប័នរដ្ឋនានា និងក្រុមហ៊ុនឯកជនទាំងនោះឡើងវិញ ដោយសារតែវាបង្កអោយមានភក់ជ្រាំ គង្ហុកទុកចោល និងដីហុយជាដើមដែលទទួលរងនូវការរិះគន់ពីប្រជាពលរដ្ឋយ៉ាងខ្លាំង ។

ការជម្រុញបែបនេះរបស់លោក ឃួង ស្រេង បានធ្វើឡើង នៅក្នុងកិច្ចប្រជុំ ស្តីពីការជួសជុលគន្លងខ្សែកាប្លអាកាសដែលបានជីកកប់ក្រោមដី ក្នុងភូមិសាស្រ្តរាជធានីភ្នំពេញ កាលពីរសៀលថ្ងៃទី២៦ ខែឧសភានេះ ដោយមានការចូលរួមពីអ្នកពាក់ព័ន្ធ ទាំងរដ្ឋ និងឯកជនជាច្រើននាក់ នៅសាលារាជធានីភ្នំពេញ។

លោកអភិបាលបញ្ជាក់ថា បើទោះជាមានលិខិតអនុញ្ញាតិក៏ដោយ ក៏ត្រូវតែចុះពិនិត្យស្ថានភាពជាក់ស្តែងដែរ ដើម្បីដឹងថា ការជីកឬខួងផ្លូវរបស់អង្គភាពទាំងនោះ មានផលប៉ះពាល់អ្វីខ្លះ និងមានការទទួលខុសត្រូវបែបណា ពីអង្គភាពទាំងនោះ ត្រូវតែមានកិច្ចសន្យាជាក់លាក់ថាក្រោយពេលជីកកាយកប់ឬឃួងផ្លូវហើយ ក្រុមហ៊ុនទាំងនោះ ត្រូវតែជួសជុលឱ្យបានត្រឹមត្រូវតាមបទដ្ឋានដើម ដោយធានានូវគុណភាពផ្លូវ។

លោកអភិបាលក៏បាន ស្នើឱ្យអាជ្ញាធរមូលដ្ឋាន មាន សង្កាត់ ខណ្ឌ និងមន្ទីរជាដើម ត្រូវតែពិនិត្យមើលជាប្រចាំ ដើម្បីឱ្យបានដឹងថា ក្នុងមូលដ្ឋានរបស់ខ្លួន មានកន្លែងណាជីកកាយឬខួងផ្លូវធ្វើអ្វី ព្រោះថាកន្លងមកនេះ មានការណីលួចជីកកាយនិងឃួងផ្លូវហើយអាជ្ញាធរមិនបានដឹង ធ្វើឱ្យខូចផ្លូវហើយគ្មានអ្នកទទួលខុសត្រូវ ក្នុងការជួសជុលឡើងវិញ។លើសពីនេះ លោកអភិបាលស្នើឱ្យពិនិត្យឡើងវិញចំពោះរថយន្តដឹកខ្សាច់ ដែលបង្ករឱ្យជ្រុះខ្សាច់ប្រឡាក់ផ្លូវ និងមានដីហុយ ធ្វើឱ្យប៉ះពាល់បរិស្ថាន និងសោភណ្ឌភាពក្នុងរាជធានីភ្នំពេញ បើរកឃើញក្រុមហ៊ុនដឹកដី ឬខ្សាច់​ណាមិនទទួលខុសត្រូវ លើបញ្ហាបោសសំអាតត្រូវបញ្ឈប់ជាបន្ទាន់ ជាពិសេស​តាមបណ្តោយផ្លូវជាតិលេខ៥។

លោក ឃួង ស្រេង ក៏បានស្នើផងដែរថា រាល់សកម្មភាពការងារ ក្នុងមូលដ្ឋាន រាជធានីភ្នំពេញ ត្រូវតែមានកិច្ចប្រជុំពិភាក្សាគ្នា និងមានរបាយការណ៍បញ្ជូនមកតាមឋានានុក្រម ឱ្យបានច្បាស់លាស់ និងជាប់លាប់ ដើម្បីឲ្យបានដឹង និងពិនិត្យលទ្ធក្នុងការដោះស្រាយ រាល់ផលប៉ះពាល់ ដែលបង្ករឡើង ដោយសកម្មភាពទាំងនោះ ក្រោមការទទួលខុសត្រូវរៀងៗខ្លួន ដើម្បីជាប្រយោជន៍ដល់សង្គមជាតិ៕