សម្តេចភក្តី សាយ ឈុំ ចុះសួរសុខទុក្ខមន្ត្រី និងអាជ្ញាធរសង្កាត់គោករការ ខណ្ឌព្រែកព្នៅ

ដោយឡែកនៅកម្ពុជាយើង អាស្រ័យដោយរាជរដ្ឋាភិបាល និងក្រសួងជំនាញពាក់ព័ន្ធទាំងអស់ ក្តាប់ជាប់ និងគ្រប់គ្រងសភាពការណ៍បានល្អ ហើយបានត្រៀមលក្ខណៈទុកជាមុន និងបានដាក់ចេញនូវបណ្តាវិធានការទប់ស្កាត់ ការពារ បានល្អ ឆាប់រហ័ស និងទាន់ពេលវេលា ម្យ៉ាងទៀតកងកម្លាំង អាជ្ញាធរគ្រប់ថ្នាក់ ប្រជាពលរដ្ឋគ្រប់រូបម្នាក់ៗសុទ្ធតែមានការយល់ដឹង និងចូលរួមសហការអនុវត្តយ៉ាងសស្រាកស្រាំ នោះទើបស្ថានភាពនៃជម្ងឺនេះ មិនមានសភាពធ្ងន់ធ្ងរហើយ ការចម្លងទៀតសោតក៏នៅតែមិនមានរីករាលដាលដល់ក្នុងសហគមន៍។ មកទល់ថ្ងៃនេះ ករណីឆ្លងមានត្រឹមតែ ១៣០នាក់ តែការព្យាបាលឲ្យជាសះស្បើយ គឺមានចំនួនច្រើន “១២៧នាក់ ” គឺនៅសល់តែអ្នកជម្ងឺ៣នាក់ប៉ុណ្ណោះ ដែលកំពុងសម្រាកព្យាបាលនៅមន្ទីរពេទ្យ និងមិនទាន់មានអ្នកស្លាប់នៅឡើយ។ តែទោះជា យ៉ាងនេះក្តី សភាពការណ៍កើតមាននូវរលកទី២ នៃការចម្លងកូវីដ-១៩ នៅបណ្តាប្រទេសជាច្រើននាពេលថ្មីៗនេះ គឺជាហេតុផលដែលកម្ពុជាយើងត្រូវតែបង្កើនការប្រុងប្រយ័ត្ន ក្នុងការការពារទប់ស្កាត់ជាបន្តទៀត ហើយ ដែលចំពោះមុខយើងត្រូវខិតខំផ្សព្វផ្សាយអប់រំដល់ប្រជាពលរដ្ឋយើងឲ្យប្រុងប្រយ័ត្ន និងអនុវត្តន៍ខ្ជាប់ខ្ជួននូវបណ្តាវិធានការនានា ដែលរាជរដ្ឋាភិបាល និងក្រសួងជំនាញបានណែនាំ ជាក់ស្តែងគឺ៖

-ការអនុវត្តអនាម័យខ្លួនប្រាណ។

– ការអនុវត្តគម្លាតសុវត្ថិភាពសង្គម និងគម្លាតសុវត្ថិភាពបុគ្គល។

-និងត្រូវពាក់ម៉ាស់ការពារក្នុងករណីចាំបាច់ ដូចជាការធ្វើដំណើរ និងការចូលរួមពិធីនានា ឬនៅកន្លែងដែលមានមនុស្សច្រើនៗ។

ក្នុងករណីមានការសង្ស័យ ឬមានអាការៈមិនស្រួលខ្លួន ដែលអាចពាក់ព័ន្ធនឹងជម្ងឺនេះ ត្រូវប្រញាប់ទៅជួបគ្រូពេទ្យជំនាញ ឬទាក់ទងផ្តល់ព័ត៌មានទៅខ្សែទូរស័ព្ទលេខ ១១៥ ជាបន្ទាន់…។ប្រជាពលរដ្ឋម្នាក់ៗ ត្រូវបង្កើនការប្រុងប្រយ័ត្ន និងចេះការពារខ្លួនដោយខ្លួនឯង គឺដើម្បីការពារខ្លួនយើងផ្ទាល់ ការពារក្រុមគ្រួសារ មនុស្សជាទីស្រឡាញ់របស់ខ្លួន និងការពារសហគមន៍ និងសង្គមជាតិទាំងមូលផងដែរ៕ (អត្ថបទ និងរូបភាព៖ ខុទ្ទកាល័យសម្តេចប្រធានព្រឹទ្ធសភា)