ឯកឧត្តម សាម៉ន បណ្ឌិត្យ អនុរដ្ឋលេខាធិការក្រសួងព័ត៌មាន ឧបត្ថម្ភថវិកា១លានរៀល ដល់កវីនិពន្ធ សូ វិសិដ្ឋ ដែលធ្លាក់ខ្លួនឈឺធ្ងន់ កំពុងព្យាបាលនៅមន្ទីរពេទ្យកាល់ម៉ែត
ភ្នំពេញ៖ បន្ទាប់ពីមានព័ត៌មានក្នុងស្រុកបានធ្វើការចុះផ្សាយនូវស្ថានភាពជំងឺ និងអាការៈរោគរបស់តន្ត្រីករ និងជាកវីនិពន្ធបទ «ព្រះឥន្ទទាត់សី» លោក សូ វិសិដ្ឋ បានធ្លាក់ខ្លួនឈឺធ្ងន់ ចូលសង្គ្រោះបន្ទាន់ នៅមន្ទីរពេទ្យកាល់ម៉ែតរួចមក ឯកឧត្តម សាម៉ន បណ្ឌិត្យ អនុរដ្ឋលេខាធិការក្រសួងព័ត៌មាន បានឧបត្ថម្ភថវិកាចំនួន ១លានរៀល ដើម្បីជួយសម្រាលទុក្ខលំបាកគ្រួសារ ក្នុងការព្យាបាលជំងឺរបស់លោកគ្រូ នៅក្នុងមន្ទីរពេទ្យកាល់ម៉ែត។
ដោយសារ ឯកឧត្តម សាម៉ន បណ្ឌិត្យ បានស្គាល់ និងធ្លាប់រាប់អានគ្នាជាយូរមកហើយ ជាមួយនឹងលោកគ្រូ សូ វិសិដ្ឋ ហើយពេលឃើញស្ថានភាពបែបនេះ ទើបលោកជួយឧបត្ថម្ភជាថវិកា ដើម្បីសម្រាលទុក្ខលំបាកបានខ្លះ។ គួរំលឹកថា លោកគ្រូ សូ វិសិដ្ឋ មានស្នាដៃច្រើនណាស់ ជាពិសេសគឺការនិពន្ធបទចម្រៀង ជូនបក្សប្រជាជនកម្ពុជា ត្រូវបានគេស្គាល់ថា ជាតន្រ្តីករ និងជាកវីនិពន្ធបទចម្រៀង “ព្រះឥន្ទទាត់សី” និងបទ “មេម៉ាយសប្បាយចិត្ត”… ព្រមទាំងបទចម្រៀងអប់រំ តាមក្រសួង និងស្ថាប័នរដ្ឋនានារាប់រយបទ បានធ្លាក់ខ្លួនឈឺធ្ងន់ និងត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យកាល់ម៉ែត កាលពីថ្ងៃទី១០ ខែកក្កដា ឆ្នាំ២០២០កន្លងមកនេះ ខណៈដែលលោកមានអាការៈងងឹតមុខ ពិបាកដកដង្ហើម ចុកក្នុងទ្រូង និងជាតិខ្លាញ់ក្នុងខ្លួនឡើងខ្លាំង កន្លងមកលោកមិនដែលមានអាការៈបែបនេះទេ ពោលគឺលោកមានកម្លាំងកំហែងធម្មតា។
ប៉ុន្តែនៅថ្ងៃម្សិលមិញនេះ ពេលដែលលោកកំពុងជិះម៉ូតូ ស្រាប់តែខ្លួនរបស់លោកបែកញើសជោគ ហើយងងឹតមុខឈឹងតែម្ដង។ ពេលនោះលោកបង្ខំចិត្តឈប់ម៉ូតូ ហើយបានខលទូរស័ព្ទទៅកូន ដើម្បីឲ្យបញ្ជូលរូបលោកទៅមន្ទីរពេទ្យ។ ប៉ុន្តែពេលទៅដល់មន្ទីរពេទ្យឯកជនមួយ គឺគេមិនទទួលព្យាបាលនោះទេ ព្រោះអាការៈកាន់តែធ្ងន់ពេក ទើបបញ្ជូនបន្តទៅមន្ទីរពេទ្យកាល់ម៉ែត។ បើតាមប្រភពបន្តទៀតថា ក្រោយពីលោកគ្រូពេទ្យពិនិត្យ និងតាមដានព្យាបាលរួចមក គឺបានបង្ហាញលទ្ធផល ថា លោកមានជំងឺគៀបសរសៃបេះដូង ជំងឺទឹកនោមផ្អែម លើសជាតិស្ករ និងជាតិខ្លាញ់ឡើងខ្លាំង ដែលត្រូវធ្វើការតាមដាន និងពិនិត្យច្រើនថ្ងៃទៀត ទើបបានធូរស្រាល។
លោកបន្តថា ដោយសារមានជំងឺភ្លាមៗបែបនេះ ធ្វើឲ្យការងារសិល្បៈរបស់លោក ដូចជាការផលិតបទចម្រៀងអប់រំផ្នែកចរាចរចំនួន ១៤បទ ត្រូវបានរាំងស្ទះ បទចម្រៀងនិពន្ធជូនគណបក្សប្រជាជនកម្ពុជា ជាច្រើនបទត្រូវបានផ្អាកទាំងពាក់កណ្ដាលទី និងកម្មវិធីប្រគំតន្រ្តីជាច្រើនទៀត ត្រូវបានផ្ទេរទៅអ្នកផ្សេង។
សូមបញ្ជាក់ថា លោកគ្រូ សូ វិសិដ្ឋ គឺជាតន្ត្រីករ និងជាអ្នកនិពន្ធបទចម្រៀងដ៏ល្បីមួយរូប ឲ្យផលិតកម្មក្រៅប្រទេស ជាពិសេសលោកមានស្នាដៃច្រើន ក្នុងការតាក់តែងនិពន្ធបទជូនគណបក្សប្រជាជនកម្ពុជា និងនិពន្ធចម្រៀងអប់រំលើច្បាប់ចរាចរណ៍ និងបញ្ហាគ្រឿងញៀន ក្មេងទំនើង ការអប់រំតាមគោលការណ៍ភូមិ-ឃុំសុវត្ថិភាព ដែលមានរហូតដល់រាប់រយបទផងដែរ៕
