សមត្ថកិច្ចនគរបាល ជាអ្នកការពារសន្តិសុខសុវត្ថិភាព និងជាគំរូដល់ប្រជាពលរដ្ឋ បាញ់ជិត ២០គ្រាប់ សុទ្ធតែប៉ូលិសស្រុកសំរោងទង៧នាក់
ខេត្តកំពង់ស្ពឺ៖ លោកវរសេនីយ៍ទោ កង ភារី ហៅម៉ៅ អធិការរងទទួលការងារសន្តិសុខ នៃអធិការដ្ឋាននគរបាលស្រុកសំរោងទង និងកូនចៅ ៦នាក់ នៅវេលាថ្ងៃត្រង់ទី២២ ខែសីហា ឆ្នាំ២០២០ នេះ បានបញ្ជូនដល់តុលាការខេត្តកំពង់ស្ពឺហេីយ ដេីម្បីចាត់ការតាមច្បាប់ ។
ករណីពេលផឹកស៊ីស្រវឹង បែរជានាំគ្នាបាញ់បោះសេរី យ៉ាងអនាធិបតេយ្យ នៅក្នុងបរិវេណសាលាស្រុកសំរោងទងទៅវិញ ដែលនាំឲ្យមានការភ័យខ្លាចដល់ប្រជាពលរដ្ឋ ហើយមជ្ឈដ្ឋានជាច្រើនរិះគន់យ៉ាងខ្លាំងក្លា។ ជនសង្ស័យ៧នាក់រួមមានឈ្មោះ កង ភារី ម្ចាស់កាំភ្លើងឡុក អ្នកបាញ់ ឈ្មោះ កាន់ សៅលី ម្ចាស់កាំភ្លើងឡុក អ្នកបាញ់ ឈ្មោះ ដន សុខុម អ្នកបាញ់ ឈ្មោះ ម៉ាន់ ប៉ុណ្ណារ៉ា អ្នកបាញ់ ឈ្មោះ ម៉ាន់ ប៊ុនណ្ណារែក អ្នកបាញ់ ឈ្មោះ នី សុភាក់ អ្នកបាញ់ និងឈ្មោះ ព្រីង ឡង់ឌី អ្នកបាញ់ ។
យោងតាមរបាយការណ៍របស់លោកវរសេនីយ៍ឯក ឃុត សុផល អធិការនគរបាលស្រុកសំរោងទង កាលពីថ្ងៃទី២០ ខែសីហា ឆ្នាំ២០២០ថ្មីៗនេះ បញ្ជាក់ថា នៅថ្ងៃទី១៨ ខែសីហា ឆ្នាំ២០២០ វេលាម៉ោង៩ លោក កង ភារី បានយកអាវុធខ្លីរបស់ខ្លួនមួយដើមម៉ាក Lock ធ្វើសកម្មភាពឈរបាញ់បោះសេរីចំនួន ៣គ្រាប់ នៅក្នុងបរិវេណសាលាស្រុកសំរោងទង ពីខាងត្បូងចំណុចមាត់ស្រះទឹក ។
លុះដល់ថ្ងៃទី១៩ ខែសីហា ឆ្នាំ២០២០ វេលាម៉ោង១៨.៣០នាទី លោក កង ភារី បាននាំកូនចៅផឹកស៊ីស្រវឹង អួតអាង ហើយបានយកកាំភ្លើងមកឈរបាញ់បោះបន្ថែមទៀត ។
ប្រជាពលរដ្ឋ បានរិះគន់បញ្ហានេះថា ខ្លួនជាសមត្ថកិច្ច គប្បីធ្វើជាគំរូដល់ប្រជាពលរដ្ឋ មិនគួរណា ផឹកស៊ីស្រវឹង អាងបាញ់បោះសេរី បំភ័យដល់ប្រជាពលរដ្ឋបែបនេះសោះ ។
ទន្ទឹមនេះ ប្រជាពលរដ្ឋ ក៏បានគាំទ្រចំណាត់ការរបស់ថ្នាក់លើផងដែរ ដែលបានចាត់វិធានការភ្លាមៗ ចំពោះលោក កង ភារី ជាសមត្ថកិច្ច ជាអ្នកការពារសន្តិសុខសុវត្ថិភាព និងជាគំរូដល់ប្រជាពលរដ្ឋ តែបាញ់បោះសេរីជិត ២០គ្រាប់ ដែលធ្វើសកម្មភាពប្រឆាំង នឹងផ្គើនការដឹកនាំ និងអនុសាសន៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ដែលបានរៀបចំនឹងចាត់ចែងដាក់ឲ្យប្រើប្រាស់នូវ ៩ចំណុច ដើម្បីឲ្យភូមិឃុំមានសុវត្តិភាព ៕
